ނަވާރަވަނަ ގަރުނުގެ ތެރޭގައި އިނގިރޭސި އިސްތިއުމާރުގެ ދަށުގައި އިންޑިއާ އޮތް ދުވަސްވަރު، ވެރިރަށް ނިއު ދިއްލީގައި އާދަޔާ ޚިލާފަށް ވިހަ ގަދަ "ކޯބްރާ" ހަރުފަ ގިނަވެ، ހަރުފައިގެ ނުރައްކަލާ ކުރިމަތިލާން ޖެހުނެވެ. ހަރުފަތަކުގެ ސަބަބުން ރައްޔިތުންނާއި ވެރިންގެ ހިތުގައި އިންތިހާއަށް ބިރުވެރިކަން އުފެދުނެވެ. އެއިން ސަލާމަތްވުމަށް ސަރުކާރުން ކަނޑައަޅާ ތަންފީޒު ކުރަންފެށި ޕޮލިސީއަކީ އެއިން ކޯބްރާ ހަރުފައެއް މަރާލައި ކަމާބެހޭ ފަރާތަކަށް ދެއްކުމުން އަގު ބޮޑު އިނާމެއް ދިނުމެވެ.
އިސާހިތަކު އެތައް ސަތޭކަ ހަރުފައެއް މަރައިގެން އެތައްހާސް ރުޕީސްގެ އަގުހުރި އެތައް އިނާމެއް ކޮންމެ ދުވަހަކު މީހުން ހޯދަން ފަށައިފި އެވެ. މިގޮތުގައި މިކަން ދަމުން ގޮސް ދައުލަތުގެ ހަޒާނާއަށް ބާރުބޮޑުވެފައި ވަނިކޮށް، ފަހުން އެގުނު ގޮތުގައި މަރާލާއިގެން ގެންނަ ގިނަ ހަރުފަތަކަކީ ބްރީޑް ކޮށްގެން ނުވަތަ ވިއްސާ ބޮޑުކޮށްގެން މަރާ ހަރުފަތަކެއް ކަމެވެ. މިކަން ފަޅާއެރިއިރު ވާގޮތަކީ ބޮޑެތި ހަރުފަ ދަނޑުތައް ނުވަތަ ކޯބްރާ ފާމްތައް އުފައްދައިގެން އެތަންތާގައި ހަރުފަ ވިއްސާ ބޮޑުކޮށް މަރަނީ އެވެ. އެކަން ކުރަނީ ސަރުކާރުގެ ނުފޫޒު ގަދަ ސިޔާސީ މީހުންނާ ގުޅިގެން ތަނަވަސް ވިޔަފާރި ވެރިންނެވެ. ދައުލަތުގެ ހަޒާނާއިން އަމިއްލަ ޖީބުތައް ފުރާލުމަށް ލިބުނު ރަނުގެ ފުރުސަތެއްގެ ބޭނުން ހިފުމަށެވެ.
މި ހާދިސާއަށް ފަހު، ދިމާވާ ބައެއްކަހަލަ ޒަރޫރީ އަދި ހައްސާސް މައްސަލަތައް ހައްލު ކުރުމުގެ ރަނގަޅު ނިޔަތުގައި ކުއްލިއަކަށް ހަދާ އުސޫލުތަކުން ނުރަނގަޅު ނަތީޖާ ނުކުންނަން ފެށުމުން އެއަށް "ކޯބްރާ އިފެކްޓް" އޭ ކިޔަން ފެށި އެވެ.
ރަނގަޅު މަގުސަދެއް ހާސިލް ކުރުމަށް އެކުލަވައިލެވޭ މިފަދަ ޕޮލިސީތަކުގެ ބޭނުން ނަހަމަ ގޮތުގައި ހިފާ، އެކަންކަމުން ނެރެވޭނެ ކަމަށް އުންމީދުކުރި ނަތީޖާއާއި ދިމާ އިދިކޮޅު ނަތީޖާއެއް ނުކުންނާން ފެށުމުން މިގޮތަށް ބުނެއުޅެއެވެ.
ކޮވިޑާއި ގުޅިގެން ރާއްޖެއަށް ވެސް ދިމާވެފައިމިވާ ކާރިސާގެ ވަގުތުގައި ސަރުކާރުން ހެދިހާ ޕޮލިސީއެއްގެ މިއަދުގެ ހާލަތަކީ އެއީ ކަމަށް ވެފައި ވެއެވެ.
ކޮވިޑް-19 އިގެ ބަލިމަޑުކަން ފެށުމާއެކު ގައުމަށް ކުރިމަތިވެދާނެ ސިއްހީ އިޖްތިމާއީ އަދި މާލީ ކާރިސާއަކުން ރައްޔިތުން ސަލާމަތްކޮށް ރައްކާތެރިކަން ކަށަވަރު ކޮށްދިނުމަށް ކުރަންޖެހިފައިވާ މަސައްކަތުގެ ބުރަކަމާއި ބޮޑުކަން އިހުސާސް ކުރެވި ރައްޔަތުންގެ ލާބަޔާއި މަންފާ ކަށަވަރު ކުރުމަށް ކުރަންޖެހުނު ހުރިހާ ކަމެއް ކުރުމަށް ނިންމި އެވެ. ރައްޔިތުންގެ ދިފާއުގައި ކުރަންޖެހުނު އެއްވެސް ކަމެއް، ގައުމުގެ ޚަޒާނާގައި އެންމެ ލޯލާރި ފޮއްޗެއް އޮއްވައި ވެސް ހުއްޓަވާ ނުލާނެ ކަމުގެ އުންމީދާއި ކަށަވަރުކަން ދިނެވެ. މިއަށްވުރެ ވަކިން މަތިވެރި މަގުސަދެއް އޮންނާނެ ބާވައެވެ؟
ދައުލަތުގެ މުއައްސަސާތަކުން ކަންކަން ރާވާ ހިންގާ ތަންފީޒުކޮށް ބަލަހައްޓާނެ އުސޫލުތައް ހަދާ ޓާސްކްފޯސްތައް އުފައްދާ ކަންކަން ކުރަން ފެށުމުން ރައްޔިތުން ތިބީ އުންމީދުގައި ކިޔަމަންތެރި ކަމާއެކު ގޭގަ އެވެ. ރާއްޖޭގެ އާބާދީގެ ދެބައިކުޅަ އެއްބައި ދިރިއުޅޭ ވެރި ރަށް މާލެ ފުރަބަންދުގައި އޮތުމާ ވެސް އެކުގައެވެ.
ބޭނުންވާ ވަސީލަތްތައް ހޯދުމާއި ވަސީލަތްތައް ގާއިމުކުރުމަގައި ހޭބޯނާރާ އެތައްބަޔަކު އެތައް ވަގުތެއް ހޭދަ ކުރިއެވެ. ވެންޓިލޭޓަރުތައް ހޯދާ ކަރަންޓީނު ފެސިލިޓީތައް ގާއިމްކޮށް، ބައެއް ފަޅުރަށްރަށާއި، ރިސޯޓްތަކާއި ހޮޓާތައް ދައުލަތައް ނަގާ ބޭރުން އަންނަ މީހުން ކަރަންޓީނު ކުރުމުގެ ކަންކަން ހިންގަން ފެށުނެވެ. މެޑިކަލް ކޮންސިއުމަބަލްސް ހޯދާ ގިނަ އަދަދަކަށް ބައްޔަށް ޓެސްޓް ކުރެވޭނެ އިންތިޒާމު ހަމަޖެއްސި އެވެ. މިފަދަ އެންމެހާ ކަންކަމުގައި ދައުލަތުގެ ކަމާގުޅޭ ވުޒާރާތަކުގެ އިތުރުން ދައުލަތުގެ ކުންފުނިތަކުގެ ހިއްސާއާ ބައިވެރިވުންވެސް ބޮޑެވެ. މިކަމުގައި ދައުލަތުގެ ތިންބާރުގެ ތެރޭގައި ހިމެނޭ ގާނޫނު ހަދާ ބާރުގެ ހިއްސާ ވެސް ވަކިން ކުޑައެއް ނޫނެވެ.
ފުރަބަންދުގައި ވެސް ސަރުކާރު ހިންގުމަށް ބޭނުންވާ އެންމެހާ ކަންކަން ކުރެވޭނެ ގާނޫނީ މަގު ހޯއްދަވާ ދެއްވުމުގައި ރެއެއް ދުވާލެއް ރޯދަ މަހަކަށް ނުބެލި އެވެ. ރެޔާއި ދުވާލު ޑަކްޓަރުންނާއި ނަރުހުންނާއި ފުލުސް / ސިފައިންނާ ސިއްހީ މާހިރުންނާއެކު ސިއްހީވުޒާރާގެ އިސް ސަފުގެ އެތައް ބަޔަކު ދަންފަޅި ބަހައިގެން ހުއްޓުމެއް ނެތި މަސައްކަތް ކުރަންފެށި އެވެ. ސަތޭކަ އެތައްދުވަހެއް ވަންދެން ރާއްޖޭގެ ބޯޑަރު ބަންދުކޮށްފައި އޮތުމަށް ފަހު ހުޅުވާލައި ފުރަބަންދަށް ލުއިތަކެއް ދިން މިހާރު ވެސް އެތައް ދުވަހެއް ވަނީ ވެފައެވެ.
އެކަމަކު މިހާރު އެންމެބާ ރަށް ދެކެވެމުންދާ ވާހަކައަކީ ކޮވިޑުން ސަލާމަތްވުމަށް ކުރެވުނު މަސައްކަތްތަކުން އެދެވޭ ނަތީޖާއެއް ނުނެރެވުނު ވާހަކައެވެ. އޭރުގެ ޓޫރިޒަމް މިނިސްޓަރަށް ކޮވިޑްގެ ކަންކަމުގައި ނަމުގައި އުޅުއްވާ "ބޭއަދަބީ ކަންތައްގަޑެއް" ގެ ތުހުމަތުގައި މަގާމު ގެއްލިފައިވާއިރު، ޓޫރިޒަމް މިނިސްޓްރީގެ ބަޖެޓުން ކުރި ހަރަދުތަކަކީ ކަމާ ނުގުޅޭ ހަރަދުތަކެއްގެ ވާހަކައެވެ. ހެލްތު މިނިސްޓަރު އަމިއްލަފުޅަށް މަސްއޫލިއްޔަތުން އެކެހެރިވެ ވަޑައިގެންނެވި އިރު އެ މިނިސްޓްރީގެ އިސްވެރިންގެ ތެރެއިން ގިނަ ބަޔަކު ތިބީ ސަސްޕެންޑް ކޮށްފަ އެވެ.
ހެލްތް މިނިސްޓްރީން ވެންޓިލޭޓަރު ތަކެއް ގެންނަން ކުރިމަސައްކަތް ތަކަކީ، ހެދިފައިވާ އުސޫލުތަކުގެ ބޭނުން ނަހަމަ ގޮތުގައި ހިފާ، އަމިއްލަ ފައިދާ އިސްކުރެވިފައިވާ ކަންތައްތަކެއްގެ އިތުރުން އެތަށް މިލިޔަން ރުފިޔާގެ އަގުހުރި ވެންޓިލޭޓަރުތަށް ލިބިފައިނުވާ ވާހަކަތަކެވެ.
ވަޒީފާގެއްލުނު އެތައް މީހަކަށް ސަރުކާރުން އެތައް މިލިޔަން ރުފިޔާ ބަހާފައިވާ ކަމަށްބުނާއިރު، އެ ފައިސާ ލިބުނު މީހަކާ ދިމާނުވާ ވާހަކައެވެ. ކޮވިޑާ ގުޅިގެން މިހާތަނަށް އެތައް ބިލިޔަން ރުފިޔާއެއް ސަރުކާރުން ހޭދަ ކޮށްފައި ވާކަމަށް ހިސާބުތަކުން ދައްކާއިރު މިއިން ފައިސާ ފޮއްޗެއް ލިބުނު މީހަކާ ދިމާނުވާ ވާހަކައެވެ.
ފައިސާ ލިބުނު މީހުންގެ ވާހަކަ ވެސް އިވޭނެ އެވެ. މަސައްކަތްކުރާ އޮފީހުން ކޮވިޑްގެ ބޭނުމަކަށް ތިން ފޭލި ފޮތި ހޯދާފާނެ އެވެ. ބާޒާރުގައި އެކަހަލަ ފޮތި ފޭއްޔެއް 4,000 ރުފިޔާއަށް ހުރެދާނެ އެވެ. ތިން ފޭއްޔަށް އަރާނީ 12,000 ރުފިޔާ އެވެ. އެކަމަކު ބޯޑަރު ބަންދުކޮށްފައި ވުމާއި، ފުރަބަންދުގައި އޮތުމާއި، ވަގުތުގެ ނާޒުކު ކަމަށް ބަލައި ތިންފޭލި ފޮއްޗަށް 120,000 ރުފިޔާ އަރާފާނެ އެވެ.
އެއީ މި ހާލަތާ ގުޅިގެން އަމަލު ކޮށްފައިވާ ގޮތްކަމަށް ބަލާނަމަ ފުރިހަމަ ބާރާއެކު ކަންކަން ނިންމާލެވޭނެ ސިޔާސީ ނުފޫޒުގަދަ، އެކިފަރާތްތަކާ ގުޅުންބޮޑު ތަޖުރިބާކާރުން މިހާލަތުގައި ކަންކަން ކުރާނެގޮތް ހިތަށް ގެނައުމުން އެ އޮތީ "ކޯބްރާ އިފެކްޓް" އަށް ބަދަލުވެފަ އެވެ.