މިދިޔަ ހުކުރު ދުވަހުގެ ހަވީރު އިދިކޮޅުން ބޭއްވި ސައިކަލް ބުރާއި ގުޅިގެން ޕީޕީއެމްގެ ނާއިބް ރައީސް އަދި ބާރަށު ދާއިރާގެ ކުރީގެ މެންބަރު އިބްރާހިމް ޝުޖާއު 1000 ރުފިޔާއިން ޖޫރިމަނާ ކުރުމާއި ގުޅިގެން ޕީއެންސީގެ ރައީސް އަބްދުއްރަހީމް އަބްދުﷲ ފާޑުވިދާޅުވެއްޖެ އެވެ.
އިދިކޮޅުގެ ސައިކަލް ބުރާއި ގުޅިގެން އެ ކޯލިޝަންގެ އިސް ބޭފުޅުން ގެންދަނީ ފުލުހުންގެ އިދާރާއަށް ހާޒިރު ކުރަމުންނެވެ. އިއްޔެ ފުރަތަމަ ހާޒިރުކުރީ ކުރީގެ ރައީސް އަދި އިދިކޮޅުގެ އެޑްވައިޒަރު ޑރ. މުހައްމަދު ވަހީދު ހަސަން މަނިކުވެ. އޭގެ ފަހުން ރޭ ޕީޕީއެމްގެ ނާއިބް ރައީސް އިބްރާހިމް ޝުޖާއު ވަނީ ފުލުހަށް ހާޒިރުކޮށްފައެވެ.
ފުލުހުން ވަނީ ޝުޖާއު 1000 ރުފިޔާއިން ޖޫރިމަނާ ކޮށްފައެވެ. ޝުޖާއު ޖޫރިމަނާ ކޮށްފައިވަނީ އެޗްޕީއޭގެ ގައިޑްލައިންއާ ހިލާފުވުމުގެ ސަބަބުން ކަމަށް ބުނެއެވެ.
އެ ނިންމުމަށް ފާޑުވިދާޅުވަމުން އިދިކޮޅު ލީޑު ކުރައްވާ އަބްދުއްރަހީމް އަބްދުﷲ ވަނީ ސައިކަލް ބުރުގައި ބައިވެރިވި ކޮންމެ ޒުބާނަކަށް އެ ދުވަހު އެ ތަނުން 1000 ރުފިޔާގެ ޖޫރިމަނާ ސްލިޕެއް ދިންނަމަ ރަނގަޅުވީސް ނޫންތޯ ސުވާލު ކުރައްވާފައެވެ.
"ހެޔޮވަރުގެ އާމްދަނީއެއް ދައުލަތަށް ލިބުނީސް. އާމްދަނީ ހޯދާނެ އެއްގޮތެއްވެސް ނޭންގޭ ސަރުކާރަކަށް ރަނުގެ ފުުރުސަތަކަށްވީސް ދެއްތޯ،" ރައީސް ސޯލިހަށް ޓެގް ކުރައްވާ އަބްދުއްރަހީމް ކުރެއްވި ޓްވީޓްގައި ވިދާޅުވިއެވެ.
އޭގެ ފަހުން އަބްދުއްރަހީމް ޓްވީޓް ކުރެއްވީ "ދެރަދުން" ނެރުމަށް ރައީސް ނަޝީދު ބުކްޝޮޕްތަކުގައި ބޭއްވެވި ފޮޓޯއާއި ހެންވޭރުގައި ހުކުރު ދުވަހުގެ ރޭ ހިނގި އަލިފާނުގެ ހާދިސާގައި ރައީސް ސޯލިހު ނޫސްވެރިންނާއި ބައްދަލުކުރަނިކޮށް އަވަސްގެ ފޮޓޯގްރާފަރު އަހުމަދު އަޝްހާދު އަބްދުﷲ ނަގާފައިވާ ފޮޓޯއެކެވެ.
ރައީސް ނަޝީދުގެ "ދެރަދުން" ފޮތް ނެރުމަށް ބޭއްވި ރަސްމިއްޔާތުތަކުގައި އެމަނިކުފާނު މާސްކު ނާޅުއްވާ އިންނެވުުމުން ގިނަ ބަޔަކު ވަނީ އެއީ މައްސަލައެއް ނޫންތޯ ސުވާލު ކުރައްވާފައެވެ. އެކަމާއި ގުޅިގެން ފުލުހުންނާއި ނޫސްވެރިން ތަކުރާރުކޮށް ސުވާލު ކުރުމުންވެސް ޖަވާބެއް ދީފައެއް ނުވެއެވެ.
އަބްދުއްރަހީމް ވަނީ އެ ބޭފުޅުންނަށް އެޗްޕީއޭގެ މިންގަނޑާއި ހިލާފުވުމުން ފުލުހަށް ހާޒިރުވާން ޗިޓް ފޮނުވަން ކެރޭނެތޯ ކޮމިޝަނަރު އޮފް ޕޮލިސްއާއި ސުވާލު ކުރައްވާފައެވެ.
"އެޗްޕީއޭގެ ގަވާއިދަށް އަމަލު ކުރަން ޖެހޭނީ ހަމައެކަނި ވާދަވެރި ސިޔާސީ ފަރާތްތަކުންތޯ. ކީރިތި ނުކުރައްވާ ޖަވާބެއް ދެއްވަ ބައްލަވާ،"
ޕީއެންސީގެ ރައީސް އަބްދުއްރަހީމް އަބްދުﷲ އާއި ނައިފަރު ދާއިރާގެ މެންބަރު އަހުމަދު ޝިޔާމް މިއަދު ފުލުހަށް ހާޒިރުކުރާނެ އެވެ. އަބްދުއްރަހީމް ހާޒިރުވާން އަންގާފައިވަނީ ހެނދުނު 10 ޖަހާއިރުއެވެ. ޝިޔާމް ހާޒިރުވާން އަންގާފައިވަނީ މެންދުރު 12 ޖަހާއިރު އެވެ.