ސަރުކާރުން ގއ. ވިލިނގިލީގައި ގާއިމް ކުރި ކޮވިޑް ފެސިލިޓީގައި ބަހައްޓަން އެ ރަށަށް ގެންދިޔަ ބަލި މީހާ އެ ރަށަށް އަރުވަން އެ ރަށުން ބަޔަކު ހުރަސް އެޅި މައްސަލަ ބަލަމުންދާ ކަމަށް ހެލްތު އިމާޖަންސީ އޮޕަރޭޝަން ސެންޓަރު (އެޗްއީއޯސީ) އިން ބުނެފި އެވެ.
ބަލިވުމުން ވިލިނގިލީ ކޮވިޑް ފެސިލިޓީއަށް ބެހެއްޓުމަށް އެ ރަށަށް ގެންގޮސް ރަށަށް އަރުވަން އުޅުނީ ޖެހިގެން އޮންނަ ގދ. އަތޮޅުގެ ތިނަދޫން އެ ބައްޔަށް ޕޮޒިޓިވްވި 68 އަހަރުގެ މީހެކެވެ.
ސީ އެމްބިއުލާންސްގައި އެ މީހާ މިއަދު ތިނަދޫން ވިލިނގިއްޔަށް ގެންދިޔަ ނަމަވެސް އެ ރަށުގެ ބަޔަކު ވަނީ އެ ރަށަށް އެ މީހާ އަރުވަން ދެކޮޅު ހަދައި އިޖުތިޖާޖެއް ކޮށްފަ އެވެ. އޭގެ ސަބަބުން ދެ ގަޑިއިރަށްވުރެ ގިނަ އިރު އެ މީހާއަށް އެ ރަށުގެ ނެރުމަތީގައި އޮތް ސީއެމްބިއުލާންސްގެ ތެރޭގައި ހުންނާން ޖެހުނެވެ. އަދި ފަހު އަނބުރާ ތިނަދޫއަށް ދިޔައީ އެވެ. އެމީހާ ނާރުވާން އިހުތިޖާޖެއް ކުރީ އެމީހާއަށް ފެންނަ ހިސާބުގަ އެވެ.
އެ މީހާ ވިލިނގިއްޔަށް އޭނާ ނޭރުވި މައްސަލަ އާއި އޭނާގެ ކުރިމަތީގައި ދެކޮޅު ހަދައި އިހުތިޖާޖެއް ކުރި މައްސަލަ ވަނީ ވަރަށް ހޫނުވެފަ އެވެ.
މިރޭ އެޗްއީއޯސީން ބޭއްވި ނޫސްވެރިންގެ ބައްދަލްވުމުގައި އެ ސެންޓަރުގެ ތަރުޖަމާން ޑރ. ނަޒްލާ ރަފީގު ވިދާޅުވީ ބައްޔެއް ޖެހިފައިވާ މީހަކާއިމެދު ތަފާތު ކުރުމަކީ އިންސާނިއްޔަތާއި ވެސް ހިލާފު ކަމެއް ކަމަށެވެ. މިއަދު ހިނގާދިޔަ ފަދަ ހާދިސާތަކުގެ ސަބަބުން ބަލި މީހާއަށް ނަފްސާނީ ގޮތުން އެތައް މައްސަލަތަކެއް ކުރިމަތިވާނެ ކަަމަށެވެ.
މިއަދު ހިނގާދިޔަ ހާދިސާއަކީ ކޮވިޑް-19 އަށް ވުރެ ސީރިއަސް "ބައްޔެއް" ގެ ގޮތުގައި ނަޒްލާ ވަނީ ސިފަ ކުރައްވާފަ އެވެ.
"މި ދައްކަނީ އަޅުގަނޑުމެންފަދަ އިންސާނެއްގެ ވާހަކަ، ދިވެއްސެއްގެ ވާހަކަ. އަޅުގަނޑުމެން އެކަކު އަނެކަކަށް ނުދިން އެހީތެރިކަމެއް ވަކި ކޮން ފަރާތަކުންތޯ ދޭނީ. އެހެންވީމަ މި ގޮތަށް ވަކި ރަށަކަށް ނޫނީ ވަކި ނަސްލަކަށް ނިސްބަތްވާ މީހަކަށް ބައްޔެއް ޖެހިފައި ހުރީއޭ ކިޔާފަ ތަފާތު ކުރުމާއި، ތަފާތު ގޮތަކަށް އޭނާއާމެދު ދެކުމާއި މިއީ ކޮވިޑް-19 އަށްވުރެ ސީރިއަސް ބައްޔެއް ކަމަށް އަޅުގަނޑުމެން ދެކެނީ،"
ނަޒްލާ ވިދާޅުވީ މިއަދުގެ ހާދިސާ ހިނގާ ގޮތުގެ ރިޕޯޓެއް ތައްޔާރު ކުރުމުގެ މަސައްކަތް މިހާރު ކުރަމުންދާ ކަމަށެވެ. އަދި ރިޕޯޓް ތައްޔާރު ކުރުމަށްފަހު ކަމާބެހޭ މުއައްސަސާތަކާއި ގުޅިގެން އަޅަން ޖެހޭ ފިޔަވަޅުތައް އަޅާނެ ކަމަށެވެ.