ޝަރީއަތް ނިމެންދެން ބަންދު ކުރާ ކުރުންތަކުގެ މައްސަލަ ހައްލު ކުރެވޭތޯ ގިނަ މަސައްކަތްތަކެއް ކުރަމުން ގެންދާ ކަމަށާ އެ މަސައްކަތް ހުއްޓާލާނީ އެ މައްސަލަ ހައްލު ކުރުމަށް ފަހު ކަމަށް ޕްރޮސެކިއުޓަރު ޖެނެރަލް (ޕީޖީ) ހުސައިން ޝަމީމް ވިދާޅުވެއްޖެ އެވެ.
ޝަރީއަތް ނިމެންދެން ބަންދު ކުރާ ކުރުންތަކަށް ގާނޫނީ ވަކީލުން އާންމުކޮށް ބޭނުން ކުރަނީ "ވާނުވާ" ޖެހުމުގެ ގޮތުގަ އެވެ. މިއީ މިހާރު ގާނޫނީ އެކި އިދާރާތަކުގައި އިސްކޮށް ތިއްބެވި ބޭފުޅުން ކުރިން ވަރަށް ބޮޑަށް ފާޑުވިދާޅުވި ކަމެކެވެ.
ޝަމީމް މިއަދު ވަނީ ޖުޑީޝަލް ސާވިސް ކޮމިޝަން (ޖޭއެސްސީ) ގެ އިސް ބޭފުޅުންނާ ބައްދަލު ކުރައްވާފަ އެވެ. އެ ބައްދަލްވުމަށް ފަހު ޝަމީމް ވިދާޅުވީ "ވާނުވާ" ގެ މައްސަލަ ހައްލު ކުރެވޭތޯ އެކި ދޮރުތަކުގައި ޓަކި ޖައްސަވަމުން ގެންދަވާ ކަމަށެވެ. އަދި އެކަން ހައްލު ކުރައްވާނެ ކަމަށާ އެ މަސައްކަތް ފުރިހަމަ ނުވަނީވެސް ހުއްޓާ ނުލައްވާނެ ކަމަށް ވިދާޅުވި އެވެ.
"މިއަދުގެ ބައްދަލުވުމުގައި ހިނގާނެ މަގުތައް ފެނުނު. އިރާދަކުރެއްވިއްޔާ މާ ގިނަ ދުވަސްތަކެއް ނުވެ ނަތީޖާ ފެންނާނެ،"
މައްސަލައެއްގެ ތުހުމަތުގައި ހައްޔަރު ކުރާ މީހާ ނުވަތަ ދައުވާއެއް އުފުލުމަށް ފަހު ޝަރީއަތް ފެށުމާއެކު ވެސް މައްސަލައިގެ ޝަރީއަތް ނިމެންދެން އެމީހަކު ބަންދުގައި ބެހެއްޓުމަށް އަމުރަށް އެދުމުގެ ބާރު ޕްރޮސިކިއުޓާ ޖެނަރަލްގެ އޮފީހަށް ޖިނާއީ އިޖުރާއަތުގެ ގާނޫނުގެ ދަށުން ލިބެ އެވެ.
މިކަމަކީ ވަރަށް ބޮޑަށް ފާޑުކިޔުން އަމާޒުވާ ކަމެކެވެ. ގައިދީންގެ ބަހުން "ވާނުވާ" ގޮތުގެ މަޝްހޫރުވެފައިވާ މިކަން ގާނޫނުގެ ތެރޭގައި އޮތުމުން މުއްދަތެއް ނެތް ގޮތަށް ބަޔަކު ބަންދުގައި ބައިތިއްބުމުގެ ފުރުސަތު ލިބިގެންދާ ކަމަށް ބުނެ ފާޑުކިޔަ އެވެ.
ޝަރީއަތް ނިމެންދެން ބަންދު ކުރުން އުވާލުމާ ގުޅޭ ގޮތުންވެސް މީގެ ކުރިން ވަނީ މަޝްވަރާކޮށްފައެވެ.
ޝަރީއަތް ނިމެންދެން ބަންދު ކުރާ ކުރުންތައް ކޮންމެ 30 ދުވަހަކުން ރިވިއު ކުރަން ކޯޓަށް ހުށަހަޅަން ޖެހޭ ގޮތަށް އުސޫލު ބަދަލުކޮށް، އެކަން އެޓާނީ ޖެނެރަލް، މިދިޔަ އަަހަރުގެ އޮކްޓޫބަރު މަހުގެ 20 ވަނަ ދުވަހު ޕީޖީ އޮފީހަށް ވަނީ އަންގާފައެވެ.