"ޖަސްޓިސް އިނީޝިއޭޓިވް.ލީގަލް" ގެ ނަމުގައި ގާނޫނީ މައުލޫމާތުތަކަށް ހާއްސަ ވެބްސައިޓެއް ލޯންޗް ކޮށްފި އެވެ.
މަދަނީ ޖަމިއްޔާއެއް ކަމަށްވާ ޖަސްޓިސް އިނީޝިއޭޓިވް މޯލްޑިވްސް އިން ލޯންޗްކުރި މި ވެބްސައިޓުން ރާއްޖޭގެ އަމަލު ކުރަމުންދާ ހުރިހާ ގާނޫނަކާއި އެ ގާނޫނުތަކަށް ގެންނަ އިސްލާހުތައް ފެންނަ ގޮތަށް ހުންނާނެ އެވެ. މިއީ ރާއްޖޭގައި ގާނޫނީ މައުލޫމާތުތައް އެއް ޕްލެޓްފޯމަކުން ފެންނާނެހެން ތައްޔާރުކުރި މިފަދަ ފުރަތަމަ ވެބްސައިޓެވެ.
މި ވެބްސައިޓު ފަރުމާ ކޮށްފައި ވަނީ ގާނޫނުތަކާއި އެ ގާނޫނުތަކަށް ގެނެވޭ އިސްލާހު ވަކި ވަކިން ބެލޭ ގޮތަކަށެވެ. ޖަސްޓިސް އިނިޝިއޭޓިވް މޯލްޑިވްސް އިން ބުނީ އެ ވެބްސައިޓަކީ ހިލޭ ބޭނުން ކުރެވޭ ގޮތަށް ފޯނުންނާއި ޓެބްލެޓުން ވެސް ފަސޭހަ ކަމާއެކު ބަލާލެވޭ ގޮތަށް ފަރުމާ ކޮށްފައިވާ ވެބްސައިޓެއް ކަމަށެވެ.
ގާނުނުތަކަށް އަމަލު ކުރަންފެށި ތާރީހާއި ގާނޫނަށް އިސްލާހެއް ގެނެސްފައިވާ ނަމަ އެ އިސްލާހެއް ގެނެވުނު ތާރީހު ވެސް ފަސޭހަ ކަމާއެކު މި ވެބްސައިޓުން ބަލާލެވެ އެވެ. އަދި ކޯޓުތަކުން މައްސަލަތަކުގައި ނިންމާ ނިންމުންތައް ވެސް މި ވެބްސައިޓުން ފެންނަން ހުރެ އެވެ.
"ޖަސްޓިސް އިނީޝިއޭޓިވް މޯލްޑިވްސް" އަކީ ލެކްސަވީ ޗެމްބާސްގެ ދަށުން ހިންގާ ޖަމްއިއްޔާ އެކެވެ.