ސަރުކާރުގެ ކޮންސްޓްރަކްޝަން ކުންފުނި، އެމްޓީސީސީން ވިއްކާ ޔަންމާ، ސުޒުކީ އިންޖީނާއި ރެސިންގެ އަގުތަކަށް ހެޔޮ ކޮށްފި އެވެ.
އެމްޓީސީސީން ބުނީ އެ ކުންފުނިން ވިއްކާ "ޔަންމާ" އާއި "ސުޒުކީ" އިންޖީނުގެ އިތުރުން އޮޑިދޯނި ފަހަރުގައި ބޭނުންކުރާ "ސްކޮޓް ބާޑާ" ރެސިންގެ އަގުތައް ހެޔޮކޮށްފައިވާ ކަމަށާއި މި ބަދަލު ގެނެސްފައި ވަނީ ސަރުކާރުން މެރިންއިންޖީނާއި މަސްވެރި ކަމާއި ގުޅުންހުރި އުފެއްދުންތަކުން ޑިއުޓީ މާފުކުރުމާއި ގުޅިގެން ކަމަށެވެ.
މި ބަދަލުގެ ދަށުން ސުޒުކީ އައުޓްބޯޑް އިންޖީނުތަކުން ބައިލައްކަ ރުފިޔާއާއި ހަމައަށް އަގު ހެޔޮ ވެގެންދާނެ އެވެ. އަދި ޔަންމާ އިންބޯޑް އިންޖީނުން ތަކުން ވެސް ހަތްލައްކަ ރުފިޔާ އާއި ހަމައަށް އަގު ހެޔޮ ވާނެ އެވެ.
އެ ކުންފުނިން ވިއްކާ އިންޖީނު އިންސްޓޯލްމަންޓަށް ނަގާއިރު ދައްކާ ޑައުން ޕޭމަންޓް ވެސް ވަނީ ކުޑަ ކޮށްފަ އެވެ. އެ ގޮތުން ސުޒުކީ އިންޖީނު ގަންނަ ފަރާތްތަކަށް ޑައުންޕޭމެންޓުން 40 ޕަސެންޓުން 20 ޕަސެންޓަށް ދަށްކޮށް ފައިސާ ދެއްކުން 12 މަހާއި ހަމައަށް ބަހާލައި ދޭނެ އެވެ. އަދި ޔަންމާ އިންޖީނު ޑައުންޕޭންމެންޓް 35 ޕަސެންޓުން 20 ޕަސެންޓަށް ދަށްކޮށް ފައިސާ ދެއްކުން 36 މަހާއި ހަމައަށް ބަހާލައި ދޭނެ އެވެ. ރެސިންގެ އަގުތަކަށް ގެނައި ބަދަލުގެ ތަފްސީލުތައް އެމްޓީސީސީ "ކަށަވަރު" ޝޯވރޫމުން ދެ އެވެ.