ދިވެހި ރާއްޖޭގެ ޝިޕިން އެޖެންސީގެ ހިދުމަތް ދިނުމާބެހޭ ގަވާއިދު އުވާލީ އިސްލާހު ކުރަން ކަމަށް ޓްރާންސްޕޯޓް މިނިސްޓްރީން ބުނެފި އެވެ.
ދިވެހި ޝިޕިން އެޖެންޓުންގެ ގަވައިދު އުވާލުމާ ގުޅިގެން 70 އަށްވުރެ ގިނަ ވިޔަފާރިވެރިން ގުޅިގެން، އެންޓި ކޮރަޕްޝަން ކޮމިޝަން (އޭސީސީ) އަށް މައްސަލައެއް ހުށަހެޅުމާ ގުޅިގެން، ޓްރާންސްޕޯޓް މިނިސްޓްރީން ބުނެފައިވާ ގޮތުގައި މިނިސްޓަރު އައިޝަތު ނަހުލާ އެ ގަވައިދު އުވާލެއްވީ ރައްޔިތުންގެ މަޖިލީހުގެ އިގްތިސޯދީ ކޮމިޓީގެ ވެސް ލަފާގެ މަތިން ކަމަށެވެ.
މާލެ ވިޔަފާރި ބަނދަރުގައި މަސައްކަތް ކުރާ ޝިޕިން އެޖެންޓުން ފީތައް ނަގަމުންދާ މައްސަލާގައި އެކަން ހުއްޓުވަން އެ މިނިސްޓްރީން ހެދި ގަވައިދު އުވާލާފައިވަނީ މިދިޔަ މަހުގެ 16 ވަނަ ދުވަހު އެވެ. މި ގަވައިދު އުވާލީ ގަވައިދު ހެދިތާ ދެ މަސް ފަހުންނެވެ.
މިކަމާ ގުޅިގެން އޭސީސީ އަށް ވަނީ 70 ވިޔަފާރިވެރިން ބައިވެރިވެގެން ޕެޓިޝަނެއް ވެސް ލާފަ އެވެ. މި ޕެޓިޝަން ލާފައި ވަނީ ޝިޕިން އެޖެންޓުން އެއްވެސް ހަމައެއް އުސޫލެއް ނެތި މާލޭ ވިޔަފާރި ބަނދަރުން ގިނަ ފީތަކެއް ނަގަމުންދާ މައްސަލާގައި އަވަސް ނޫހުން ހެދި އިންވެސްޓިގޭޝަން ރިޕޯޓް "އަޑި ނޭނގޭ ވިޔަފާރިއެއް: ސިއްސައިގެންދާ ބޮޑު އަދަދެއް!" ގެ މައްސަލަ ހޫނުވެ، އެކަން ބޮޑު ބަހުސަކަށް ދިއުމަށް ފަހު އެ ފީތައް ނެގުން ހުއްޓުވަން ސަރުކާރުން ހެދި ގަވައިދު ސަރުކާރު އިސްވެ ކުއްލި ގޮތަކަށް އުވާލި މައްސަލައާ ގުޅިގެންނެވެ.
މި ޕެޓިޝަންގައި ބުނެފައިވާ ގޮތުގައި ޝިޕިން އެޖެންޓުންގެ ގަވައިދު ޖުލައި 16، 2020 ގައި ނެރުނު ނަމަވެސް އެ ގަވައިދު ތަންފީޒު ކުރަން އެއްވެސް މަސައްކަތެއް ޓްރާންސްޕޯޓް އޮތޯރިޓީން ކޮށްފައެއް ނުވެ އެވެ. އަދި އެ ފަރާތްތަކުން ޕެޓިޝަނުގައި ބުނެފައިވާ ގޮތުގައި އެ ނިންމުމަކީ ޓްރާންސްޕޯޓް މިނިސްޓަރު އައިޝަތު ނަހުލާ އަމިއްލަ ފުޅަށް ނިންމެވި ނިންމުމެކެވެ.
ޝިޕިން އެޖެންޓުން އެކި ނަންނަމުގައި ފީތައް ނަގަން ފަށާފައި ވަނީ 2016 ވަނަ އަހަރުން ފެށިގެންނެވެ. އެ އަހަރު މާލޭ ވިޔަފާރި ބަނދަރުގެ ގިނަ ވެހިކަލްތައް ހަލާކުވެ، ބަނދަރު ބޮއްސުންލި އެވެ. ހިދުމަތް ހުއްޓި ރާއްޖެއަށް މުދާ ހިފައިގެން އަންނަ ކޮންޓެއިނާ ބޯޓު ފަހަރުން މުދާ ނުބޭލި ކިޔޫ ދިގު ވެގެން ދިޔަ އެވެ. އެޖެންޓުން ތަފާތު އެކި ނަންމުގައި ފީތަކެއް ނެގެން ފެށީ އެހެންވެ އެވެ.
އޭގެ ހަ އެއްކަ މަސް ފަހުން މާލޭ ވިޔަފާރި ބަނދަރަށް ބޮޑު އިންވެސްޓްމަންޓެއްކޮށް އާ އުޅަނދުފަހަރާއި ސާމާނާއި އާލާތް ހޯދައި ހިންގުން ވެސް ރަނގަޅު ކުރި އެވެ. ނަމަވެސް މި ފީތަކަށް ނެގުން ހުއްޓާލާފައެއް ނުވެއެވެ. ކުރިއެކޭވެސް އެއް ގޮތަށް ރާއްޖޭގެ ލޮޖިސްޓިކްސްގައި އުޅޭ އެޖެންޓުން ދިޔައީ ފީތައް ނަގަމުންނެވެ. މި ފީތައް ނަގަނީ ޝިޕިން އެޖެންޓުން ޑެލިވަރީ އޯޑާ (ޑީއޯ) ދޫކުރުމުގެ ނަމުގަ އެވެ. ފުރަތަމަ 50 ޑޮލަރު ޑީއޯއަކަށް ނެގި ނަމަވެސް ފަހުން އިތުރު ފީތަކާއެކު އަގުތައް ވަނީ ބޮޑުތަނުން މަތިކޮށްފަ އެވެ. ލަފާކުރެވޭ ގޮތުގައި ކޮންމެ އަހަރަކު މިގޮތަަށް އެތަށް މިލިއަން ޑޮލަރެއް ދަނީ ރާއްޖޭން ބޭރުވެގެން ދެ އެވެ.