ރާއްޖެ ޕްރޮމޯޓް ކުރަން ބޮޑު ބަޖެޓެއް ދީފައި އޮންނަ އެމްއެމްޕީއާރްސީ އިން "އިންޓަނޭޝަނަލް މީޑިއާ މާކެޓްޕްލޭސް" ގައި ބައިވެރިވެއްޖެ އެވެ.
ފެއާތަކުގައި ބައިވެރިވުން ފިޔަވައި މާ ބޮޑު މަސައްކަތެއް ނުކުރާ އެމްއެމްޕީއާރުސީން މިއަދު ބުނީ ދެ ދުވަހަށް ވާޗުއަލްކޮށް ކުރިއަށްދިޔަ އެ އިވެންޓުގައި ރާއްޖެއިން ބައިވެރިވި އިރު، މިއީ މިއީ ޖަރުމަނުވިލާތާއި ސްވިޓްޒަލެންޑާއި އޮސްޓްރިއާގެ ޓްރެވެލް ޓްރޭޑަށް ހާއްސަކޮށްގެން ބޭއްވި އިވެންޓެއް ކަމަށެވެ. އަދި އެ އިވެންޓުގައި މީޑިއާގެ މަތީފަންތީގެ ފަރާތްތަކަށް ރާއްޖެ އިޝްތިހާރުކުމުގެ އިތުރުން ކޮވިޑާ ގުޅިގެން އެޅި ރައްކާތެރިކަމުގެ ފިޔަވަޅުތަކުގެ އެންމެ ފަހުގެ މައުލޫމާތު ދިނެވެ.
އިވެންޓުގައި ޖަރުމަނު މާކެޓުތަކުގައި މިލިޔަނެއްހާ މީހުނަށް މައުލޫމާތު ފޯރުވައިދޭ މަޖައްލާ ތަކާއި ނޫސް އަދި ރޭޑިއޯ ސްޓޭޝަންތައް ހިމެނެ އެވެ. މިއީ ރާއްޖެ އިޝްތިހާރު ކުރަން އެންމެ ފަހުން ލޯންޗުކުރި "ރީޑިސްކަވަ މޯލްޑިވްސް" ގެ ކެމްޕޭންތަކާއި "މޯލްޑިވްސް ބޯޑަ މައިލްސް" ގެ މައުލޫމާތު ފޯރުކޮށްދިނުމަށް ލިބުނު މުހިންމު ފުރުސަތެއް ކަމަށް އެމްއެމްޕީއާރްސީން ބުނެ އެވެ.