އައްޑު އަތޮޅާއި ގއ. ގދ. އަތޮޅާ ދެމެދު ސީޕްލޭންގެ ހިދުމަތް ފަށަން އައްޑޫ އިންޓަނޭޝަނަލް އެއާޕޯޓް (އޭއައިއޭ) އާއެކު އެއްބަސްވުމެއްގައި މިއަދު ސޮއި ކޮށްފި އެވެ.
އައްޑު އަތޮޅުގައި ބޭއްވި މި ރަސްމިއްޔާތުގައި ބައެއް ވަޒީރުންނާއި އައްޑު އާއި ގއ. ގދ. އަތޮޅަށް ނިސްބަތްވާ މަޖިލީސް މެމްބަރުން ބައިވެރިވެ ވަޑައިގަތެވެ. ވަޒީރުންގެ ތެރޭ ޓުއަރިޒަމް މިނިސްޓަރު ޑރ. އަބްދުﷲ މައުސޫމާއި އިކޮނޮމިކް މިނިސްޓަރު ފައްޔާޒު އިސްމާއީލާ ހިމެނި ވަޑައިގަންނަވަ އެވެ.
މި ރަސްމިއްޔާތުގައި އައިލެންޑް އޭވިއޭޝަނުގެ މެނޭޖިން ޑިރެކްޓަރު މުހައްމަދު ރިޒްވީ ވިދާޅުވީ އެއްބަސްވުމަށް ފަހު މި ދަތުރުތައް ރަސްމީކޮށް ކުރިއަށް އޮތް 45 ދުވަސް ތެރޭގައި ފަށާނެ ކަމަށެވެ. އަދި އޭގެ ސަބަބުން ދެ އަތޮޅުގެ ޓޫރިޒަމް ވަރަށް ބޮޑަށް ރަނގަޅުވެ އިގްތިސޯދު ވެސް ފުޅާ ވެގެން ދާނެ ކަމަށެވެ.
މޯލްޑިވިއަން އަން އިން ދާދި ފަހުން ވަނީ އައްޑު އާއި ގއ. ގދ. އަތޮޅާ ދެމެދު ކަނެކްޝަން ފްލައިޓުތަކެއް ވެސް ފަށާފަ އެވެ. އޭގެ ބޭނުމަކީ ބޮޑު ދެ އަތޮޅުގެ މެދުގައި އިގްތިސޯދީ ހަރަކާތްތައް އިތުރު ކުރުމެވެ.
އޭއައިއޭގައި ސީ ޕްލޭން ހިދުމަތް ފަށަން ފުރަތަމަ ހަވާލުކުރީ ޓްރާންސް މޯލްޑިވިއަން އެއާވޭސް (ޓީއެމްއޭ) އަށެވެ. ނަމަވެސް އެކުންފުންޏަށް މި ހިދުމަތް ދެވޭ ގޮތް ވަނީ ނުވެފަ އެވެ.
މީގެ އިތުރުން އައްޑު ސިޓީ އާއި ފުވައްމުލަކާއި ދެމެދު ވެސް ގަވާއިދުން ކޮންމެ ދުވަހަކު ވައިގެ ދަތުރުތައް ބޭއްވުމަށް އައިލެންޑް އޭވިއޭޝަނާއި އިކޮނޮމިކް މިނިސްޓްރީން ދަނީ މަޝްވަރާ ކުރަމުންނެވެ.
