ފައިނަލު ސީރީސްގައި މިއާމީ ހީޓްގެ މައްޗަށް 106-93 ން މެޗު ކާމިޔާބު ކޮށް އެމެރިކާގެ ނެޝަނަލް ބާސްކެޓްބޯޅަ ލީގް (އެންބީއޭ) ގެ ޗެމްޕިއަންކަން ލޮސްއެންޖަލީސް ލޭކާސް ހޯދައިފި އެވެ.
އެންބިއޭގެ އެންމެ ކާމިޔާބު ޓީމު ލޭކާސް އިން އެ މުބާރާތުގެ ޗެމްޕިއަންކަން އެ ހޯދީ 17 ވަނަ ފަހަރެވެ. އަދި މިއީ އެ ޓީމުގެ ލެބްރޯން ޖޭމްސް އެ މުބާރާތުގެ ޗެމްޕިއަނަކަށްވި ހަތަރު ވަނަ ފަހަރެވެ. އަދި ފައިނަލު ސީރީގައި އޭނާ ކުޅުނު 10 ވަނަ ފަހަރެވެ. ޖޭމްސް މީގެ ކުރިން ވަނީ މިއާމީ ހީޓާއެކު ދެ ފަހަރު މުބާރާތް ކާމިޔާބު ކޮށްފަ އެވެ. އަދި ކްލީވްލޭންޑް ކަވްލިއާސް އާއެކު އެއް ފަހަރު މުބާރާތް ކާމިޔާބު ކުރި އެވެ.
ހީޓާ ދެކޮޅަށް އިއްޔަ ކުޅުނު މެޗުގައި އެނާ ވަނީ ޓްރިޕަލް ޑަބަލް ހަދާފަ އެވެ. އެއީ 28 ޕޮއިންޓް، 14 ރީބައުންޑްސް އަދި 10 އެސިސްޓެވެ. އޭނާ ވަނީ އެންބީއޭ ފައިނަލްގެ އެންމެ މޮޅު ކުޅުންތެރިޔާގެ އެވޯޑް ހޯދާފަ އެވެ.
އެންބިއޭގެ ޗެމްޕިއަންކަން ލޭކާސް ހޯދީ 10 އަހަރު ފަހުންނެވެ. މީގެ ކުރިން އެ ޓީމުން މުބާރާތް ކާމިޔާބު ކުރީ 2010 ވަނަ އަހަރު އެވެ.