އިންޓަ މިލާންގެ މައި ސްޕޮންސާގެ ގޮތުގައި ގިނަ އަހަރުތަކެއް ވަންދެން ހޭދަކުރި ކުންފުނި "ޕިރެލީ" ދޫކޮށް އާ ސްޕޮންސަރަކަށް ދިއުމަށް އިންޓައިން ތައްޔާރު ވެއްޖެ އެވެ.
އިޓަލީގެ މަލްޓިނޭޝަނަލް ކުންފުނި "ޕިރެލީ" ދޫކޮށްލަން އިންޓައިން ނިންމީ އެ ކުލަބުގެ މެއިން ސްޕޮންސާގެ ގޮތުގައި އެ ކުންފުންޏާއެކު 25 އަހަރު ހޭދަ ކުރުމަށް ފަހު އެވެ. ޕިރެލީ އިން އިންޓަގެ ސްޕޮންސަރަކަށް ވީ 1995 ވަނަ އަހަރު އެވެ.
އިންޓައަށް ކުޅުނު ބްރެޒިލްގެ ރޮނާލްޑޯ ނަޒާރިއޯގެ ގޯލް ސެލްބްރޭޝަން ބޭނުންކޮށްގެން ޕިރެލީ އިން 1998 ގައި ހެދި އިސްތިހާރަށް ގިނަ ބައެއްގެ ސަމާލުކަން ލިބުނެވެ. އަދި އެ އިސްތިހާރަށް އެއްތައް ބައެއްގެ ފާޑު ކިއުންވެސް އަމާޒުވި އެވެ.
އަންނަ ސީޒަނުން ފެށިގެން އިންޓަގެ ޖޯޒީގެ ކުރިމަތީގައި ޖަހާނީ، ޗައިނާގެ އިލެކްޓްރޯނިކް ސާމާނު އުފައްދާ ކުންފުނި "ހައިސެންސް" ގެ ނަމެވެ. އެ ކުންފުންޏާއެކު އިންޓައިން އެއްބަސްވުން ހަދަނީ ސްޕޮންސާޝިޕް ފީގެ ގޮތުގައި އަހަރަކު 30 މިލިއަން ޔޫރޯ އަށެވެ. ކޮރެއާގެ ސަމްސަންގް ކުންފުންޏާއި ޗައިނާގެ އެވަގްރޭންޑް ކުންފުނިވެސް އިންޓަގެ ސްޕޮންސަރަކަށް ވާން އުޅޭ ކަމުގެ ވާހަކަތައް މީގެ ކުރިން ފެތުނުނެވެ.