ހުޅުމާލޭގައި ރޭ ހިންގި މާރާމާރީގައި ޒަހަމްވެ އައިޖީ އެމްއެޗްގައި ސީރިއަސް ހާލަތުގައި އޮތް 21 އަހަރުގެ ޔާމިން ރަޝީދަށް ބޮޑެތި ޒަހަމްތަކެއް ލިބިފައިވާ ކަމަށް އައިޖީއެމްއެޗުން ބުނެފި އެވެ.
"އަވަސް" އަށް މައުލޫމާތުދެއްވަމުން އައިޖީއެމްއެޗްގެ މީޑިއާ ކޯޑިނޭޓަރު ޒީނަތު ހަބީބު ވިދާޅުވީ، ޔާމީނަށް ލިބިފައިވަނީ ފުން ޒަހަމްތަކެއް ކަމަށެވެ. އޭނާގެ ބަނޑަށް ކުރިމަތިން ހެރި ވަޅި އަނެއް ފަރާތުން ފޫއަޅުވާފައިވާކަމަށާއި އޭގެ ސަބަބުން ބަނޑުގެ އޮޕަރޭޝަނެއްވެސް މިއަދު ކޮށްފައިވާ ކަމަށް ޒީނަތު ވިދާޅުވި އެވެ.
ބަނޑަށް ލިބުނު ޒަހަމްތަކުގެ އިތުރަށް އޭނާގެ ޗިސްމެޔަށްވެސް ބޮޑެތި ޒަހަމްތަކެއް ވެފައިވާކަމަށް ޒީނަތު ވިދާޅުވި އެވެ.
"ވަރަށް ބޮޑެތި ޒަހަމްތަކެއް ހުރީ. ބަނޑުގެ ސާޖަރީއެއް މިއަދު ވަނީ ކޮށްފައި. ޑޮކްޓަރުންނަށް ވެސް އޭނަގެ ސިއްހީ ހާލަތަށް ވަކިއެއްޗެއް ބުނަން އަދި ނޭނގޭ،" ޒީނަތު ވިދާޅުވި އެވެ.
އޭނަގެ ހާލަތުގެ ސީރިޔަސް މިންވަރު ބުނަން އެނގޭނީ 24 ގަޑިއިރަށް ފަހު ކަމަށް ޑޮކްޓަރުންނާއި ހަވާލާދީ ޒީނަތު ވަނީ ވިދާޅުވެފައެވެ.
ރޭ 6:40 ހާއިރު ހުޅުމާލެ 29 ނަމްބަރު ފުލެޓް ކައިރީގައި ހިންގި މާރާމާރީގައި އެހެން މީހަކަށް ވެސް ވަނީ ޒަހަމްތަކެއް ލިބިފައެވެ. ނަމަވެސް އޭނާގެ ހާލު އެހާ ސީރިއަސް ނޫން ކަމަށް ހުޅުމާލެ ހޮސްޕިޓަލުން ބުންޏެވެ.
އެ މައްސަލައާ ގުޅިގެންމިހާތަނަށް އެއްވެސް މީހަކު ފުލުހުން ހައްޔަރެއް ނުކުރެ އެވެ.
ހަބަރު
މާރާމާރީގައި ޒަހަމްވި ޒުވާނާގެ ހާލާމެދު އެއްޗެއް ބުނެވޭނީ 24 ގަޑިއިރަށްފަހު: އައިޖީއެމްއެޗް
Oct 15, 2015
ހުޅުމާލޭ އިމާރާތްތަކެއް: ރޭ އެ ރަށުގައި ވަނީ ދެމީހެއްގެ ގަޔަށް ވަޅި ހަރާފައި -- ފޮޓޯ: ވީނިއުސް