ގިނީ ބިސާއޯ ކޮޅަށް، ލިވަޕޫލްގެ ފޯވަޑް ސެޑިއޯ މާނޭ ކާމިޔާބު ކުރި ލަނޑުން، އެފްރިކަން ކަޕް އޮފް ނޭޝަންއަށް ސެނެގާލް ކޮލިފައި ވެއްޖެ އެވެ. ސެނެގާލް މެޗު ކާމިޔާބު ކުރީ 1-0 ންނެވެ.
ތިން ވަނަ ފަހަރަށް މުބާރާތުގެ ތާރީހު ބަދަލު ކުރުމުން އަންނަ އަހަރު ފެބްރުއަރީގައި ބާއްވަން ހަމަޖެހިފައިވާ މުބާރާތް ދެން އޮންނާނީ ޖަނަވަރީ ފެބްރުއަރީ 2022 ގަ އެވެ. ކެމެރޫންގައި ބާއްވަން ހަމަޖެހިފައިވާ އެފްރިކަން ކަޕް އޮފް ނޭޝަންގެ 33 ވަނަ މުބާރާތަށް ކޮލިފައިވި ފުރަތަމަ ޓީމަކީ ސެނެގާލް އެވެ.
މިދިޔަ ހަފުތާގައ ސެނެގާލްގައި ގިނީ ބިސާއޯ މައްޗަށް 2-0 ން މޮޅުވި މެޗުގައި ލަނޑު ޖެހި މާނޭ، އިއްޔަ ގިނީ ބިސާއޯ ކުޅުނު މެޗުގައި ލަނޑު ކާމިޔާބު ކުރީ މެޗުގެ 82 ވަނަ މިނެޓްގަ އެވެ.
ސެނެގާލް ވަނީ ގުރޫޕް އައި ގައި 100 ޕަަސަންޓްގެ ރެކޯޑެއް ދަމަހައްޓާފަ އެވެ. ކުޅުނު ހަތަރު މެޗުންވެސް އެ ޓީމު ވަނީ މޮޅު ވެފަ އެވެ. ސެނެގާލް އަކީ އެންމެ ފަހުން ބޭއްވި އެފްރިކަން ކަޕް އޮފް ނޭޝަންގެ ރަނަރަފް އެވެ.