އަނުދީޕް ހެގްޅޭ އާއި މިނޫޝާ ކަންޗަން އަކީ އިންޑިޔާގެ ކަރްނާޓަކާ ސްޓޭޓްގެ ބައިންދޫރްކިޔާ ރަށެއްގައި ދިރިއުޅޭ ދެމީހުންނެވެ. މި ދެ މީހުން ދާދިފަހުން ވަނީ ކައިވެނިކޮށްފަ އެވެ. މި މީހުންގެ ވާހަކަ އިންޑިޔާގެ ނޫސްތަކަށް އެރީ ކައިވެންޏަށްފަހު ދާން އޮތް ހަނީމޫން ދަތުރު ކެންސަލްކޮށްފައި ކަރްނާޓަކާގެ ބީޗު ސާފުކުރަން ނުކުތީމަ އެވެ.
އެމީހުންގެ އަމިއްލަ އިންސްޓަގްރާމް އެކައުންޓުން ޝެއާކޮށްފައިވާ މި ވާހަކައިގައި އަނުދީޕް އާއި މިނޫޝާ ބުނެފައިވަނީ ކައިވެންޏަށްފަހު އެމީހުން ސޯމޭޝްވަރް ބީޗަށް ކުރި ޒިޔާރަތުގައި އެތަން ކުނިއަޅާ ގޮނޑަކަށް ހަދާފައިވާ މަންޒަރު ފެނުމުން ވަރަށް ހިތަށް އަސަރު ކުރި އެވެ. ގޮނޑުދޮށް ޕްލާސްޓިކް ފުޅިތަކާއި ކުނިތަކުން ފުރިފައިވާތަން ފެނިފައި އެތަން ސާފުކުރުމުގެ ވިސްނުން އެމީހުންނަށް އައެވެ.
އަނުދީޕްއަކީ ތިމާވެށި ރައްކާތެރިކުރުމަށް ލޯބިކުރާ މީހަކަށް ވާތީ އޭނާ އާއި އަލަތު އަނބިމީހާ މިނޫޝާ އާ މަޝްވަރާ ކުރުމަށްފަހު ހަނީމޫން ދަތުރު ކެންސަލްކޮށްފައި ބީޗު ސާފުކުރުމުގެ ޕްރޮގްރާމެއް ކުރިޔަށް ގެންދަން ނިންމީ އެވެ.
އަނުދީޕް ވަނީ ގޮނޑުދޮށް ސާފުކުރުމަށް އެމީހުން ކުރި މަސައްކަތުގެ ފޮޓޯތަކާއި ވީޑިއޯތައް އިންސްޓަގްރާމް ޕޯސްޓްތަކެއްގައި ޝެއާ ކޮށްފަ އެވެ. އޭނާ ބުނެފައިވާ ގޮތުގައި 800 ކިލޯގެ ކުނި އެމީހުން މިހާތަނަށް ގޮނޑުދޮށުން ނަގާފައި ވެއެވެ.
ގޮނޑުދޮށް ސާފުކުރުމުގެ މަސައްކަތް ފެށީ އެ ދެ މީހުން އެކަނި ނަމަވެސް މަޑުމަޑުން އެ މަސައްކަތުގައި އެހެން މީހުން ބައިވެރިވާން ފެށި އެވެ. އަދި އިސާހިތަކު އެތައް ސަތޭކަ ބަޔަކު މި މަސައްކަތުގައި އެމީހުންނާ ބައިވެރިވި އެވެ.
އަނުދީޕް ސޯޝަލް މީޑިއާގައި ހިއްސާ ކުރި މި ފޮޓޯތަކާއި ވީޑިއޯތަކާއެކު ވަރަށް ގިނަ ބަޔަކު ވަނީ މި ދެމަފިރިންގެ މަސައްކަތަށް ތައުރީފުކޮށް އެމީހުންނަށް މަރުހަބާ ކިޔާފަ އެވެ. އަދި ހަނިމޫން ދަތުރުކޮށްފައި 10 ދުވަސް މަތިން އެމީހުން ކުރި މި މަސައްކަތަކީ ވަރަށް ގިނަ ބަޔެއްގެ ތަރުހީބު ލިބުނު މަސައްކަތަށް ވަނީ ވެފަ އެވެ.
ލައިފްސްޓައިލް
އަލަތު ކައިވެންޏަށްފަހު ހަނީމޫން ކެންސަލްކޮށްފައި ބީޗް ސާފުކުރަން ނުކުމެއްޖެ
Dec 13, 2020
އަނުދީޕް އާއި މިނޫޝާ: ހަނީމޫން ދަތުރަށް ވުރެ ބީޗް ސާފުކުރުން މުހިއްމުކަމަކަށް ދެކުނު