ދައުލަތުގެ އިދާރާ ތަކާއި ކުންފުނިތައް ބައިވެރި ކޮށްގެން މަސްތުވާތަކެތި ހުއްޓުވުމުގެ މަސައްކަތެއް ޖެންޑާ މިނިސްޓްރީން ފަށައިފި އެވެ.
މަސްތުވާ ތަކެތީގެ މައްސަލަތައް ހައްލު ކުރުމުގައި މުޖުތަމައުގެ ބައިވެރިވުން އިތުރު ކުމުގެ މަގުސަދުގައި ޖެންޑާ މިނިސްޓަރު އައިޝަތު މުހައްމަދު ދީދީ ދައުލަތުގެ ބައެއް އިދާރާ ތަކާއި ކުންފުނިތަކަށް މިއަދު ޒިޔާރާތް ކުރައްވާފައި ވެއެވެ. އެކަމަނާ ބައްދަލު ކުރައްވާފައި ވަނީ ކަސްޓަމްސް ސާވިސަށާއި، އެލައިޑް އިންސުރެންސަށާއި، އައިލެންޑް އޭވިއޭޝަންގެ އިތުރުން އިސްލާމިކު ބޭންކުގެ އިސް ބޭފުޅުންނަށެވެ.
މި ބައްދަލުވުމުގައި، މަސްތުވާތަކެތިގެ މައްސަލަތައް ހައްލު ކުރުމަށް ކުރާނެ ކަންތައްތަކަކާ މެދު މަޝްވަރާ ކުރައްވާފައި ވެއެވެ.
މި މަހުގެ ނިޔަލަށް ޖުމުލަ 15 އިދާރާ އަދި ކުންފުންޏަށް ޑްރަގް އެޖެންސީ އިން ބައްދަލުކުރާނެ ކަމަށް ޖެންޑާ މިނިސްޓްރީން ބުނެފައި ވެއެވެ. އަދި ބުނީ އޭގެ ތެރެއިން ބައެއް ތަންތަނަށް މިނިސްޓަރު ވެސް ވަޑައިގަންނަވާނެ ކަމަށެވެ.