ފެރީ ނިޒާމަކުން ރާއްޖެ ގުޅާލުމުގެ ފުރަތަމަ ފިޔަވަހި، މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އަށް ހަވާލު ކުރުމުގެ އެއްބަސްވުމުގައި ސޮއި ކޮށްފި އެވެ.
މި އެއްބަސްވުމުގައި ސޮއިކޮށްފައި ވަނީ އެކަމަށް ހާއްސަ ކޮށްގެން ބޭއްވި ރަސްމިއްޔާތެއްގައި، އެމްޓީސީސީ ގެ ސީއީއޯ އާދަމް އާޒިމް އާއި ޕްލޭނިން މިނިސްޓްރީގެ ޑިރެކްޓާ ޖެނެރަލް ފާތިމަތު ޝާނާ ފާރޫގެވެ.
އިންޓާގްރޭޓެޑް ނޭޝަނަލް ޕަބްލިކް ފެރީ ނެޓްވޯކުގެ މައިގަނޑު މަގުސަދަކީ ކަނދުގެ ބޮދު ސަރަހައަދެއް އެކުލެވިގެންވާ ދިވެހިރާއްޖޭގެ ބައިބައިވެފައިވާ އާބާދީތަކަށް ފަސޭހަކަމާއި، ރައްކާތެރިކަމާއެކު އެކަށީގެންވާ ހެޔޮ އަގެއްގައި ދަތުރުކުރެވޭނެ އަވަސް ފެރީގެ ނިޒާމަކުން ގުޅުވައިލުމެވެ.
މިއަދު ސޮއި ކުރި އެއްބަސްވުމާއި އެކު އެންމެ ފުރަތަމަ ހިދުމަތް ދޭނީ ހއ، ހދ އަދި ށ އަތޮޅު ގެ ރަށް ތަކަށެވެ. އެމްޓިސީސީގެ މެނޭޖިންގް ޑިރެކްޓަރު އާދަމް އާޒިމް ވިދާޅުވީ، އެންމެ ލަސްވެގެން މި އަހަރުގެ ސެޕްޓެމްބަރުގެ ނިޔަލަށް އެ އަތޮޅު ތަކަށް ހިދުމަތް ފޯރުކޮށްދެވޭ ވަރު ވާނެ ކަމަށެވެ. މީގެ އިތުރުން އާޒިމް ވިދާޅުވީ އަމާޒަކީ ތިން އަހަރު ދުވަހުގެ ތެރޭގައި މުޅި ރާއްޖެ އަށް މި ހިދުމަތް ފޯރު ކޮށްދިނުން ކަމަށެވެ.
އިންޓަގްރޭޓެޑް ނޭޝަނަލް ޕަބްލިކް ފެރީ ނެޓްވޯކަކީ މުޅި ރާއްޖެ އަށް އަމާޒުކޮށް ފަސިންޖަރުންނާއި މުދާ އުފުލާ ފެރީ ހިމެނޭ ގޮތުން، ނޭޝަނަލް ސްޕޭޝަލް ޕްލޭންގައި ހިމެނޭ ތިން ޒޯނާއި ހަ ރީޖަން ގުޅުވައި ދިނުމަށް ފަރުމާކޮށްފައިވާ ވިއުގަ އެކެވެ.
އެގޮތުން ފެރީ ނެޓްވޯކުން ހަ ރީޖަންގައި އެކުލެވޭ ހުރިހާ ރަށްތަކެއް ގުޅައިލެވޭއިރު، އެއް ރީޖަން އަނެއް ރީޖަނާއި ވެސް ގުޅިގެންދާނެ އެވެ. ފަސިންޖަރުން އުފުލާ ފެރީ ގުޅުވައިލާނީ ތަފާތު ތިން ގޮތަކަށެވެ. އެއީ "ކޮމިއުޓް ލިންކް،" "ނަން-ކޮމިއުޓް ލިންކް،" ގެ އިތުރުން "ހައިވޭ ލިންކް" މެދުވެރިކޮށެވެ.
ކޮމިއުޓް ލިންކްއަކީ އެ ރީޖަނެއް ގައި ހިމެނޭ ރަށްތައް ގުޅުވައިދޭ، އާންމުކޮށް ކުރަންޖެހޭ މަސައްކަތް ނުވަތަ ޒަރޫރީ ބޭނުން ތަކަށް ކުރާ ކުރު ދަތުރުތަކަށް ހާއްސަ ކޮށްފައިވާ ލިންކެކެވެ. އަދި ނަން-ކޮމިއުޓް ލިންކަކީ ދެ ރަށެއްގެ ދެމެދުގައި ކުރާ، ދިގު ދަތުރުތަކަށް ހާއްސަ ކޮށްފައިވާ ލިންކެކެވެ. މީގެ އިތުރުން ހައިވޭ ލިންކަކީ އެއް ރީޖަން އަނެއް ރީޖަންއާ ގުޅުވައިދޭ މައި ދަތުރުފަތުރުގެ ހަބެވެ.
ރައީސް އިބްރާހިމް މުހައްމަދު ސޯލިހު މި މަޝްރޫއު އެމްޓިސީސީ އަށް ހަވާލު ކުރަން ނިންމަވާފައި ވަނީ މި މަހުގެ 12 ވަނަ ދުވަހު ބޭއްވި ވަޒީރުންގެ މަޖިލީހުގެ ޖަލްސާގައި ނޭޝަނަލް ޕްލޭނިން އާއި ހައުސިންގ އެންޑް އިންފްރާސްޓްރަކްޗާ މިނިސްޓްރީން ހުށަހެޅި ކަރުދާހަކަށް ވަޒީރުންގެ މެދުގައި ހިޔާލު ބަދަލުކުރައްވައި މަޝްވަރާ ކުރެއްވުމަށްފަހު އެ ބޭފުޅުންގެ ލަފާގެ މަތިންނެވެ.
މި މަޝްރޫއުގެ ދަށުން ރަށް ތަކުގައި ފެރީ ޓާމިނަލް އާއި އެހެނިހެން ކަމާ ބެހޭ އިންފްރާސްޓްރަކްޗާ ވެސް ގާއިމު ކުރާނެ އެވެ. އެމްޓީސީސީގެ މެނޭޖިންގ ޑިރެކްޓަރު އާދަމް އާޒިމް ވިދާޅުވީ މި ގާއިމް ކުރެވޭ ފެރީގެ ނިޒާމުގައި ހިމެނޭ އުޅަނދު ތައްވެސް އުފައްދާނީ ރާއްޖޭގެ ބޯޓް ބިލްޑަރުން ކަމަށެވެ.