މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) ގެ ތާރީހުގައި މިހާތަނަށް މާލީ ގޮތުން އަހަރެއްގެ ތެރޭގައި ހޯދި އެންމެ ބޮޑު ފައިދާއެއް މިދިޔަ އަހަރު ލިބިއްޖެ އެވެ.
އެމްޓީސީސީން އާއްމުކުރި މިދިޔަ އަހަރުގެ ތަފާސް ހިސާބުތައް ދައްކާ ގޮތުން، ކޮވިޑުގެ ހާލަތާއެކު އިގްތިސޯދު އަޑި އަޅައިލި މިދިޔަ އަހަރު ހަތަރު ކްއާޓަރާ ހަމައަށް އެ ކުންފުންޏަށް ސާފު ފައިދާގެ ގޮތުގައި 203 މިލިއަން ރުފިޔާ ލިބިފައިވެ އެވެ. މިއީ 2019 ވަނަ އަހަރު ލިބުނު 63 މިލިއަން ރުފިޔާއާ އަޅާ ބަލާއިރު 63 ޕަސެންޓުގެ އިތުރުވު ވުމެކެވެ.
ކުންފުންޏަށް މިދިޔަ އަހަރުގެ ހަތަރުވަނަ ކުއާޓާރުގައި ޓެކުހަށް ކެނޑުމުގެ ކުރިން ސާފު ފައިދާގެ ގޮތުގައި 62.85 މިލިއަން ރުފިޔާ ލިބުނެވެ. މިއީ 2019 ވަނަ އަހަރުގެ މި މުއްދަތުގައި ލިބުނު 41.31 މިލިއަން ރުފިޔާއާ އަޅާ ބަލާއިރު 52 ޕަސެންޓުގެ އިތުރު ވުމެކެވެ.
ހަތަރު ކުއާޓަރު އެއްކޮށް ބަލާނަމަ އެމްޓީސީސީ އިން މިދިޔަ އަހަރު 1.3 ބިލިއަން ރުފިޔާގެ ވިޔަފާރިކޮށްފައިވެ އެވެ.
ހަތަރު ވަނަ ކުއާޓަރުގައި އެމްޓީސީސީ އިން 400 މިލިއަން ރުފިޔާގެ ވިޔަފާރިކޮށްފައިވެ އެވެ. މި ކުއާޓަރުގައި ހިންގުމުގެ ފައިދާގެ ގޮތުގައި 77 މިލިއަން ރުފިޔާ ލިބުނުއިރު، ސާފު ފައިދާގެ ގޮތުގައި 62 މިލިއަން ރުފިޔާ ހޯދާފައިވެ އެވެ.
އެމްޓީސީސީ އިން ހަތަރުވަނަ ކުއާޓާރުގައި އުމްރާނީ ތަރައްގީގެ ގިނަ މަޝްރޫއުތަކެއް ކާމިޔަބުކަމާއިއެކު ހިންގާފައިވެ އެވެ. އެގޮތުން 52 މަޝްރޫއެއްގައި މަސައްކަތްކުރެވި 11 މަޝްރޫއެއްގެ މަސައްކަތްވަނީ ކަމިޔާބުކަމާއިއެކު ނިންމާލެވިފަ އެވެ. އަދި ފަސް ޕްރޮޖެކްޓެއްގެ މަސައްކަތް މި ކުއަރުގައި ވަނީ އިތުރު 17 މަޝްރޫއެއްގެ މަސައްކަތާ ހަވާލުވެފަ އެވެ. އަދި މުޅި އަހަރަށް ބަލާލާއިރު، ޖުމުލަ 34 އުމްރާނީ ތަރައްގީ މަޝްރޫއެއްގެ މަސައްކަތް މިދިޔަ އަހަރު ނިންމާފައިވެ އެވެ.