މިދިޔަ އަހަރުގެ ތެރޭގައި ފަނޑިޔާރުންނާ ގުޅޭގޮތުން ހުށަހެޅުނު ޝަކުވާތައް އޭގެ ކުރީ އަހަރާ އަޅާބަލާއިރު ދެ ގުނައަށް ވުރެ އިތުރުވެފައިވާ ކަމަށް ޖުޑީޝަލް ސާވިސް ކޮމިޝަން (ޖޭއެސްސީ)ގެ ތަފާސް ހިސާބުތަކުން ދައްކައިފި އެވެ.
ޖޭއެސްސީން މިދިޔަ އަހަރު ކުރި މަސައްކަތްތުގެ ތަފާސް ހިސާބުތައް މިއަދު އާއްމުކޮށްފައިވާއިރު، 2019 ވަނަ އަހަރު 114 ޝަކުވާ ހުށަހެޅިފައިވާއިރު، މިދިޔަ އަހަރު އެ އަދަދު 288 އަށް އަރާފައިވާކަމަށް ދައްކަ އެވެ.
މިގޮތުން، އެ ޝަކުވާތަކުގެ ތެރެއިން ޖުމްލަ 304 މައްސަލައެއް މިދިޔަ އަހަރު ދިރާސާކޮށް އޭގެ ތެރެއިން ތަހުގީގުކުރަން 12 ޕަސަންޓް މައްސަލަ ނިންމާފައިވާ ކަމަށް ޖޭއެސްސީން ބުންޏެވެ.
އަދި 114 މައްސަލާގައި 44 ތަހުގީގީ ކޮމިޓީއެއް މަސައްކަތްކުރި ކަމަށާއި، އޭގެ ތެރެއިން 74 ޕަސަންޓް މައްސަލަ ސާބިތުވެފައިވާކަމަށް ހިސާބުތަކުން ދައްކަ އެވެ.
އެ މައްސަލަތައް ސާބިތުވެގެން، މިދިޔަ އަހަރު ނިމުނުއިރު އެކި ޝަކުވާތަކާ ގުޅިގެން ނުވަ ފަނޑިޔާރެއް މަގާމުން ވަކިކުރަން ނިންމާފައިވާއިރު، ދެ ފަނޑިޔާރަކު ސަސްޕެންޑްކޮށްފައިވާކަމަށް އެ ކޮމިޝަނުން ބުންޏެވެ.
އަދި ހަތަރު ފަނޑިޔާރަކަށް ނަސޭހަތްދީ ކަނޑައެޅިފައިވާ ތަމްރީނުތައް ފުރިހަމަކުރުމަށް އަންގާފައިވާކަމަށްވެސް ބުނެފައިވެ އެވެ.
ޖޭއެސްސީގެ ތަފާސް ހިސާބުތަކުން ފެންނަ ގޮތުގައި މިދިޔަ އަހަރު އެކި ކޯޓްތަކަށް ޖުމްލަ 22 ފަނޑިޔާރަކު ވަނީ އައްޔަންކޮށްފައިވާއިރު، އެންމެ ގިނަ ފަނޑިޔާރުން އައްޔަންކޮށްފައިވަނީ މަތީ ކޯޓްތަކާއި މެޖިސްޓްރޭޓް ކޯޓްތަކަށެވެ.
މި ގޮތުން މާލޭ ސަރަހައްދުގައި ހުންނަ މަތީ ކޯޓްތަކަށް ނުވަ ފަނޑިޔާރުން އައްޔަންކުރި އިރު މެޖިސްޓްރޭޓް ކޯޓްތަކަށްވެސް އައްޔަންކޮށްފައިވަނީ ނުވަ ފަނޑިޔާރުންނެވެ.
ދެން މިދިޔަ އަހަރު ފަނޑިޔާރުން އައްޔަންކޮށްފައިވަނީ ސުޕްރީމް ކޯޓާއި ހައިކޯޓަށެވެ. އޭގެން ކޮންމެ ކޯޓަކަށްވެސް ދެ ފަނޑިޔާރުން ވަނީ އައްޔަންކޮށްފައި އެވެ.
ކޯޓްތަކަށް އައްޔަންކުރި ފަނޑިޔާރުންގެ ތެރެއިން ހަ ފަނޑިޔާރުންނަކީ އަންހެން ބޭފުޅުންނެވެ. އެއީ މީ އޭގެކުރީ އަހަރާ އަޅާބަލާއިރު ތިން ޕަސަންޓް އިތުރު އަދަދެއްކަމަށްވެސް ޖޭއެސްސީން ބުންޏެވެ.