ބެންކް އޮފް މޯލްޑިވްސް (ބީއެމްއެލް)ގެ ކޮމިއުނިޓީ ފަންޑަށް ޕްރޮޕޯސަލް ހުށްހެޅުމުގެ ފުރުސަތު ހުޅުވާލައިފި އެވެ.
ބީއެމްއެލް އިން މިއަދު ބުނީ، "އަހަރެންގެ ބޭންކް" ކޮމިއުނިޓީ ފަންޑަށް މިއަހަރުގެ ފުރަތަމަ ފިޔަވަހީގައި ހުށަހަޅާ ޕްރޮޕޯސަލްތަކުގެ ތެރެއިން އެންމެ ރަގަޅު ފަސް ޕްރޮޕޯސަލް ހޮވާނެ ކަމަށެވެ.
މި ފަންޑުގެ ދަށުން މިއަހަރު ޖުމްލަ 20 ޕްރޮޖެކްޓެއް ކުރިއަށް ދާނެ ކަމަށް ފާހަގަކޮށް ބީއެމްއެލް އިން ބުނީ، ތަޢުލީމާއި، ކުޅިވަރު ހަރަކާތްތަކުގެ އިތުރުން ތިމާވެށި ހިމާޔަތްކުރުން ފަދަ ކަންކަމަށް އަމާޒުކޮށްގެން ހުށަހަޅާ ޕްރޮޖެކްޓްތަކުގެ ތެރެއިން ހޮވޭ ކޮންމެ ޕްރޮޕޯސަލް އެއްގައި ހިމެނޭ ހަރަކާތް ހިންގުމަށްޓަކައި 50،000 ރުފިޔާ ދިނުމަށް ހަމަޖެހިފައިވާ ކަމަށެވެ.
ޕްރޮޕޯސަލް ހުށްހެޅުމުގެ ފުރުސަތު ހުޅުވާލެވިފައި ވަނީ އަންނަ މާރޗް މަހުގެ ހަވަނަ ދުވަހުގެ ނިޔަލަށެވެ.
ބީއެމްއެލް ކޮމިއުނިޓީ ފަންޑު މެދުވެރިކޮށް މިހާތަނަށް 40 ރަށެއްގައި ޕްރޮޖެކްޓްތައް ހިންގުމަށް ފައިސާގެ އެހީ ދީފައިވާނެ ކަމަށް ބީއެމްއެލް އިން ބުންޏެވެ.