ވެލިގާ ހާޑްވެއާއިން މޯލްޑިވްސް އިސްޓްޓިއުޓް އޮފް ޓެކްނޮލޮޖީ (އެމްއައިޓީ) އަށް ވަޑާމުގެ ސާމާނު ހަދިޔާ ކޮށްފި އެވެ.
ވެލިގާއިން ހަދިޔާކުރި މި ސާމާނަކީ އެމްއައިޓީގެ "ފަރުނިޗާ ކާޕެންޓްރީ އެންޑް ވުޑްވޯކިން ޕްރޮގްރާމް" އަށް ބޭނުންވާ ސާމާނު ކަމަށް އެމްއައިޓީން ބުންޏެވެ. ތަކެތި އެމްއައިޓީ އާއި ހަވާލުކޮށް ދެއްވީ ވެލިގާ ހާޑްވެއާގެ ބްރޭންޑް މެނޭޖަރު މަހްދީ އިޖާޒެވެ.
އެމްއައިޓީ އިން ބުނީ، ވެލިގާ ހާޑްވެއާއަކީ މަސައްކަތްތެރި ކަމުގެ ދާއިރާއިން ހިންގޭ މިފަދަ ޕްރޮގްރާމްތަކުގައި އެހީ ފޯރިކޮށްދޭ ފަރާތެއް ކަމަށާއި އެމްއައިޓީގެ ކާޕެންޓްރީ ޕްރޮގްރާތަކުގައި ޓޫލްސް ގެންގުޅުމާއި ބެހޭގޮތުން ދަރިވަރުންނަށް މައުލޫމާތު ދިނުމުގައި ވެލިގާ ހާޑްވެއާ އެހީ ފޯރުކޮށްދޭ ކަމަށެވެ.
އެމްއައިޓީން ޒުވާނުންނަށް ހާއްސަކޮށްގެން ވަޑާމުގެ މަސައްކަތް ދަސްކޮށްދިނުމުގެ ގޮތުން، ކުރު ކޯސްތަކާއި، ޓިވެޓް އޮތޯރިޓީގެ ނެޝަނަލް ކޮމްޕިޓެންސީ ސްޓޭންޑަޑަށް ސެޓްފިކެޓް ލެވެލް-3 އިން ފަރުނިޗާ ކާޕެންޓްރީ ކޯސްތައް ހިންގަ އެވެ.