ޕްރޮގްރެސް ޕާޓީ އޮފް މޯލްޑިވްސް (ޕީޕީއެމް) ގެ އޮފީސް ހިމެނޭ ސަރަހައްދު ބަންދުކޮށްފި އެވެ.
ޕީޕީއެމް އޮފީސް ހިންގަނީ ހެންވޭރު ބޮޑުތަކުރުފާނު މަގުގައި ހުންނަ ހުރަފާގައެވެ. އެ ސަރަހައްދު ބަންދުކޮށްފައިވަނީ މިއަދު އިދިކޮޅު ކޯލިޝަންގެ އެއްވުމެއް ކުރިއަށް ގެންދަން ނިންމާފައިވާތީ އެ ފުރުސަތު ނުދިނުމަށެވެ.
ބޮޑުތަކުރުފާނު މަގުން ބައެއް ބަންދުކޮށް މިއަދު މެންދުރުން ފެށިގެން ފުލުހުން ދަނީ ބެރިކޭޑް ޖަހައިގެން އެ ސަރަހައްދުގަައި ހަރަކާތްތެރިވަމުންނެވެ. ވެހިކަލްގެ އިތުރުން ހިނގާފައިދާ މީހުންވެސް ހުއްޓުވާ ފުލުހުން ސުވާލު ކުރެއެވެ.
މި ދުވަސްވަރަކީ ކޮވިޑް-19 ގެ ހާލަތު ވަރަށް ގޯސް ދުވަސްވަރެއް ކަމުން ރައްކާތެރި ކަމުގެ ގޮތުން އެއްވުންތަކާއި ޖަލްސާތައް ބޭއްވުން ވަނީ މަނާކޮށްފައެވެ. އެހެން ކަމުން އެފަދަ އެއްވެސް ހަރަކާތަކަށް ފުުރުސަތު ނުދޭނެ ކަމަށް މިދިޔަ ހަފްތާއިން ފެށިގެން ފުލުހުން ދަނީ އިންޒާރު ކުރަމުންނެވެ.
މަނާކޮށްފައިވަނިކޮށް މިދިޔަ ހުކުރު ދުވަހުވެސް އިދިކޮޅުގެ ސަޕޯޓަރުން ވަނީ މަގުތައް މައްޗަށް ނިކުމެ މުޒާހަރާ ކޮށްފައެވެ. މުޒާހަރާއިން 32 މީހަކު ހައްޔަރުކުރިއިރު އޭގެ ތެރޭގައި އިދިކޮޅު ލީޑާޝިޕްގެ ވަރަށް ގިނަ ބޭފުޅުން ހިމެނިވަޑައިގަންނަވައެވެ. ނަމަވެސް ހައްޔަރު ކުރި މީހުން ވަނީ ޖޫރިމަނާ ކުރުމަށް ފަހު ދޫކޮށްލާފައެވެ.