ފްލެޓް ލިބޭނެ ފަރާތްތައް ފްލެޓް ކޮމެޓީއަށް ކަނޑަނޭޅޭނެ ކަމަށް މަޖިލީހުގެ ރައީސް މުހައްމަދު ނަޝީދު ވިދާޅު ވެއްޖެ އެވެ.
ރައީސް ނަޝީދު މިހެން ވިދާޅުވީ މިއަދު މަޖިލީހުގައި ޕްލޭނިން މިނިސްޓަރު މުހައްމަދު އަސްލަމް، ފްލެޓް ކޮމެޓީން ހައުސިން މިނިސްޓްރީން ކުރަން ކަނޑައަޅާފައިވާ މަސައްކަތްތަކާ ގުޅޭ ގޮތުން ދެއްކެވި ވާހަކަތަކަށް ރައްދު ދެއްވަމުން ނެވެ.
ރައީސް ނަޝީދު ވިދާޅުވީ ފްލެޓް ލިބޭ މީހުންގެ ދާއިމީ ލިސްޓު ނެރުމަށް ފަހު ބައެއް ކަންކަން ކުރަން ހައުސިން މިނިސްޓްރީގެ މައްޗަށް ލާޒިމް ކުރާ ކަމަށެވެ.
ނަމަވެސް އަސްލަމް ވާހަކައިގެ މެދުތެރެއަށް ވަދެ ވަޑައިގެން ރައީސް ނަޝީދު ވިދާޅުވީ ފްލެޓް ދޭނެ ފަރާތްތައް ކަނޑައަޅާނީ ސީދާ ހައުސިން މިނިސްޓަރު ކަމަށެވެ. އަދި ފްލެޓް ކޮމެޓީގެ ހަމައެކަނި މަސްއޫލިއްޔަތަކީ ރައީސް އިބްރާހިމް މުހައްމަދު ސޯލިހަށް ލަފާ އެރުވުން ކަމަށެވެ.
ނަޝީދު އެފަދައިން ވިދާޅުވުމުން އަސްލަމް ވަނީ ފްލެޓް ދިނުމުގެ ކުރިން ކަށަވަރުކުރަން ޖެހޭ ކަންތައްތައް ހައުސިން މިނިސްޓްރީގެ މެންޑޭޓްގައި އޮންނަ ކަމަށް ވިދާޅުވެފަ އެވެ.
"ވަޒީރު! ފްލެޓް ކޮމެޓީއަށް ދާއިމީ ލިސްޓެއް ނުނެރުއްވޭނެ." އަނެއްކާވެސް އަސްލަމްގެ ވާހަކަ މެދިކަނޑުއްވާލައްވައި ރައީސް ނަޝީދު ވިދާޅުވި އެވެ.
ނިމިގެން ދިޔަ ސަރުކާރުން ފްލެޓް ލިބޭ މީހުންގެ ދާއިމީ ލިސްޓު އިއުލާން ކުރި ނަމަވެސް މި ސަރުކާރު ވެރިކަމަށް އައިސް ފްލެޓް ލިސްޓް ބާތިލުކޮށް އާ ލިސްޓެއް އެކުލަވާލުމަށް ފްލެޓް ކޮމެޓީއެއް އުފެއްދި އެވެ. ތިން މެންބަރުންގެ މައްޗަށް އެކުލެވޭ އެ ކޮމެޓީން އަލުން ވަނީ ދިރިއުޅުމުގެ ހާލަތު ބަލާ ވަޒަންކުރާނެ މިންގަނޑެއް އެކުލަވާލާފަ އެވެ. ނަަމަވެސް އަލުން ފްލެޓް ލިބޭ ލިސްޓު އިއުލާނު ކުރިއިރު ދަތި ހާލުގައި އުޅޭ މީހުންނަށް ފްލެޓް ނުލިބުމާއި އެއް ކޮޓަރީގެ ފްލެޓްތައް ނުދޭން ނިންމުމަށް އެތައް ބައެއްގެ ފާޑުކިޔުން އަމާޒުވެފައި ވެއެވެ.