އަންނަ އަހަރު ރާއްޖޭގައި ބާއްވާ ބޯހިމެނުމަށް ތައްޔާރުވުމުގެ ގޮތުން ކުރިޔަށް ގެންދާ މެޕިން އެކްސަސައިޒަށް އެނިއުމަރޭޓަރުން ހޯދަން އިއުލާނު ކޮށްފި އެވެ.
ނޭޝަނަލް ބިއުރޯ އޮފް ސްޓެޓިސްޓިކްސް އިން ބުނީ ބޯހިމެނުން 2022 އަށް ތައްޔާރުވުމުގެ ގޮތުން ބޯހިމެނުމުގައި ބޭނުން ކުރާ ބްލޮކް މެޕްތައް ތައްޔާރު ކުރުމުގެ މަސައްކަތުގައި ހަރަކާތްތެރި ވުމަށް 30 އެނިއުމަރޭޓަރަކު ނަގަން ބޭނުންވާ ކަމަށެވެ.
"މެޕިން އެކްސަސައިޒަކީ" ކޮންމެ ދުވަހަކު ފީލްޑަށް ނުކުމެ، ހަވާލު ކުރާ ޗާޓުގައިވާ ތަންތަން ފާހަގަ ކުރުމަށްޓަކައި ކުރާ މަސައްކަތެކެވެ. މި މަސައްކަތް ކުރިއަށް ދާނީ މި މަހުގެ 30 އިން އަންނަ މަހުގެ ފަސް ވަނަ ދުވަހަށެވެ.
މި ސާވޭ ކުރަން ކުރިމަތި ލެވޭނީ އޯ ލެވަލް ފެންވަރަށް ކިޔަވާފައިވާ އަދި އުމުރުން 18 އަހަރާއި 45 އަހަރާއި ދެމެދުގެ މީހުނެވެ. ގިނަ ވަގުތު މަސައްކަތުގައި އުޅެވޭނެ ފަރާތް ތަކަށް އިސްކަން ދޭނެ އެވެ. މީގެ އިތުރުން، ބޯހިމެނުން ނުވަތަ މި ފަދަ ސާވޭއެއްގައި ބައިވެރިވެ ތަޖުރިބާ ލިބިފައިވާ މީހުންނަށް ވެސް ބަލާނެ އެވެ.
މިއީ ފަސް ދުވަހުގެ މުއްދަތަށް ކުރިއަށްގެންދާ ހަރަކާތެކެވެ. ކުރިއަށްދާނީ ކޮންމެ ދުވަހެއްގެ ހެނދުނު 8:00 އިން ހަވީރު 6:00 އަށެވެ. މި މަސައްކަތުގައި ހޭދަ ކުރާ ދުވަސްތަކުގައި ދުވާލަކު 500 ރ. މަގުން އެލަވަންސެއް ދޭނެ އެވެ. އަދި ފޯނު އެލަވަންސްގެ ގޮތުގައި ދުވާލަކު 10ރ. ފުޑް އެލަވަންސްގެ ގޮތުގައި ދުވާލަކު 100ރ. ދެ އެވެ.
