ދެހާސް ނަވާރަ ވަނަ އަހަރު ފާސްކުރި މަސްވެރިކަމުގެ ގާނޫނަށް އިސްލާހެއް ގެނައުމަށް ރައްޔިތުންގެ މަޖިލީހަށް ހުށަހަޅައިފި އެވެ.
ވެރިކަން ކުރާ އެމްޑީޕީގެ ފަރާތުން މި އިސްލާހު ހުށަހެޅުއްވީ މައްޗަންގޮޅި އުތުރު ދާއިރާގެ މެންބަރު މުހައްމަދު ރަޝީދު އެވެ.
މަސްވެރިކަމާ ބެހޭ ގާނޫނަށް އިސްލާހު ގެންނަން ހުށަހެޅީ އެ ގާނޫނުގައިވާ ބައެއް މާއްދާތަކުގައި މިފަހުން އުވާލަން މަޖިލީހަށް ހުށަހަޅާފައިވާ ޓްރާންސްޕޯޓް އޮތޯރިޓީގެ ބައިތަކެއް ހިމެނޭތީ އެވެ.
ރާއްޖޭގެ ކަނޑުދަތުރުފަތުރާއި އެއްގަމު ދަތުރުފަތުރުގެ ކަންކަން ހިންގުން ހަރުދަނާ ކުރުމުގެ ގޮތުން ޓްރާންސްޕޯޓް އޮތޯރިޓީގެ ގާނޫނު އުވާލައި އެ ގާނޫނުގެ ދަށުން އުފައްދާފައިވާ ޓްރާންސްޕޯޓް އޮތޯރިޓީގެ މަސައްކަތްތައް ޓްރާންސްޕޯޓް މިނިސްޓްރީގެ ދަށަށް ބަދަލުކުރުމަށް މަޖިލީހަށް ވަނީ ހުށަހަޅާފަ އެވެ.
މަސްވެރިކަމުގެ ގާނޫނުގެ 56 ވަނަ މާއްދާގައި މިހާރު އޮންނަ ގޮތުން އެ ގާނޫނުގެ ދަށުން މަސްވެރިކަން މޮނިޓާކޮށް، ކޮންޓްރޯލް ކުރުމަށްޓަކައި، މޮނިޓަރިންގ، ކޮންޓްރޯލް އަދި ސަވައިލަންސާބެހޭ ނިޒާމެއް ސިފައިންގެ ކޯސްޓްގާޑާއި، މޯލްޑިވްސް ޕޮލިސް ސާވިސްއާއި ، މޯލްޑިވްސް ކަސްޓަމްސް ސާވިސްއާއި، މޯލްޑިވްސް ޓްރާންސްޕޯޓް އޮތޯރިޓީއާއި، އެ ނޫންވެސް ކަމާގުޅޭ އިދާރާތަކާ ގުޅިގެން މިނިސްޓްރީން ހަދައި ތަންފީޒުކުރަންވާނެ ކަމަށް ބުނެފައިވެ އެވެ.
އޭގެ ބަދަލުގައި މަސްވެރިކަން މޮނިޓާކޮށް ކޮންޓްރޯލް ކުރުމަށްޓަކައި، މޮނިޓަރިން، ކޮންޓްރޯލް އަދި ސަވައިލަންސާބެހޭ ނިޒާމެއް ސިފައިންގެ ކޯސްޓްގާޑާއި، މޯލްޑިވްސް ޕޮލިސް ސާވިސްއާއި ، މޯލްޑިވްސް ކަސްޓަމްސް ސާވިސްއާއި، މިނިސްޓްރީ އޮފް ޓްރާންސްޕޯޓް އެންޑް ސިވިލައިޒޭޝަނާއި އަދި އެ ނޫންވެސް ކަމާގުޅޭ އިދާރާތަކާ ގުޅިގެން މިނިސްޓްރީން ހަދައި ތަންފީޒުކުރަންވާނެ ކަމަށް އޮންނަ ގޮތަށް އިސްލާހު ކުރުމަށް ވަނީ ހުށަހަޅާފަ އެވެ.