ސްޓޭޓް ބޭންކް އޮފް އިންޑިޔާ (އެސްބީއައި) އިން ރާއްޖޭގައި މިހާތަނަށް 341 މިލިއަން ޑޮލަރު ލޯނުގެ ގޮތުގައި ދޫކުރެވިފައިވާ ކަމަށް ބުނެފި އެވެ.
އެސްބީއައިގެ ކަސްޓަމަރުންނަށް "ޓްރެވަލް ކާޑު" ތައާރަފު ކުރުމަށް ދަރުބާރުގޭގައި މިރޭ ބޭއްވި ރަސްމިއްޔާތުގައި އެ ބޭންކުން ހުށަހެޅި ޕްރެޒެންޓޭޝަންގައިވާ ގޮތުގައި ބޭންކުގެ 41 އަހަރުގެ ތާރީހުގައި ރާއްޖޭގެ މާލީ ދާއިރާއަށް ވަނީ ގިނަ އެހީތަކެއް ދީފަ އެވެ.
ދަރުބާރުގޭގައި މިރޭ ބޭއްވި ރަސްމިއްޔާތުގައި އެސްބީއައިގެ ކަންޓްރީ މެނޭޖަރު ޝަންކަރު ނަރަޔާނަން ވިދާޅުވީ އެ ބޭންކުން ދިވެހި ރައްޔިތުންނަށް ގިނަ ހިދުމަތްތަކެއް ކުރަމުންދާ ކަމަށެވެ. އެގޮތުން ޓްރެވަލް ކާޑެއް ތައާރަފު ކުރުމަކީ އެ މަގުސަދުގައި ކުރި ކަމެއް ކަމަށް އޭނާ ފާހަގަ ކުރެއްވި އެވެ.
"އެސްބީއައި ޓްރެވަލް ކާޑު" ގެ ނަމުގައި އެ ބޭންކުން ތައާރަފުކުރި މި ކާޑުން ރާއްޖެ ފިޔަވައި އެހެން ގައުމުތަކުގައި އުޅޭއިރު ޑޮލަރުގެ މުއާމަލާތްތައް ކުރެވެ އެވެ. އެގޮތުން މިކާޑަށް 10،000 ޑޮލަރު ޖަމާކުރެވެ އެވެ. އަދި މި ކާޑު ބޭނުންކޮށްގެން ދުވާލަކު 2،000 ޑޮލަރު އޭޓީއެމްއިން ނެގެ އެވެ. އަދި ރާއްޖޭން ބޭރަށް ކުރާ ދަތުރު ނިންމާލުމަށްފަހު އައިސް ކާޑުގައި ހުރި ޑޮލަރު އެހެން އެކައުންޓަކަށް ޓްރާންސްފާވެސް ކުރެވެ އެވެ.
ޓްރެވަލް ކާޑު ތައާރަފު ކުރަން ބޭއްވި ރަސްމިއްޔާތުގައި ބައެއް ވިޔަފާރިވެރިންނަށް ކާޑު ހަވާލުކުރަނީ.--އަވަސް ފޮޓޯ