ހަސަން ސައީދު

ގާޒީ ހަސަން ސައީދުގެ އިތުރު މައްސަލައެއް ބަލަނީ

ކްރިމިނަލް ކޯޓުގެ ގާޒީ ހަސަން ސައީދުގެ އިތުރު މައްސަލައެއް ޖުޑިޝަލް ސާވިސް ކޮމިޝަން (ޖޭއެސްސީ) އިން ތަހުގީގު ކުރަން ފަށައިިފި އެވެ.

ޖޭއެސްސީން މިއަދު ބުނީ ހަސަން ސައީދާއި ދެކޮޅަށް ބަލަމުންދާ އާ މައްސަލައަކީ އޭނާ ފެމިލީ ކޯޓުގެ އިސް ގާޒީ އަކަަށް ހުންނެވި ދުވަސްވަރު، 2018 ވަނަ އަހަރުގެ ތެރޭގައި ފެމިލީ ކޯޓުގެ މުވައްޒަފުން ރާއްޖެއިން ބޭރަށް ފޮނުވައިގެން ކައިވެންޏެއް ކޮށްދިން ކަމަށް ބުނާ މައްސަލައެއް ކަމަށެވެ.

މި މައްސަލަ ބަލަން ކޮމިޝަނުން ނިންމީ މިދިޔަ މާޗް މަހުގެ 17 ވަނަ ދުވަހު ކަމަށާއި މައްސަލަ ބަލަން ތަހުގީގު ޓީމެއް އެކުލަވާލާފައިވާ ކަމަށްވެސް ޖޭއެސްސީން ބުންޏެވެ.

ކުރީގެ ޓޫރިޒަމް މިނިސްޓަރު އަލީ ވަހީދުގެ ޕާސްޕޯޓު ދޫކުރަން އަމުރުކުރީ ވެސް ހަސަން ސައީދެވެ. ޖޭއެސްސީން ގެންދަނީ އެ މައްސަލަ ވެސް ބަލަމުންނެވެ. ނަމަވެސް މި ދެ މައްސަލަ އާއި ގުޅިގެން ގާޒީ ހަސަން ސައީދު ސަސްޕެންޑް ކުރަން ޖޭއެސްސީން ނިންމާފައެއް ނުވެ އެވެ.

އަލީ ވަހީދުގެ މައްސަލައިގައި ކަންބޮޑުވާ ކަންތައްތަކެއް ހުރުމުން ހަސަން ސައީދުގެ މައްސަލަ ބަލައިދިނުމަށް ޖޭއެސްސީއަށް މައްސަލަ ހުށަހެޅީ ޕީޖީ އޮފީހުންނެވެ. އެ މައްސަލައިގައި ޕީޖީ އޮފީހުން ބުނެފައި ވަނީ އަލީ ވަހީދު ފުރުވާލަން ހަސަން ސައީދު އަމުރު ނެރުއްވީ ގާނޫނުއަސާސީއާ ހިލާފަށް ކަމަށް ދެކޭ ކަމަށެވެ.

ހަސަން ސައީދު ފެމިލީ ކޯޓުގައި ހުންނަވައިގެން އެ ކޯޓުގެ މުވައްޒަފުންނާ އެކު ބޭއްވި ބައްދަލުވުމެއްގައި ކްރިމިނަލް ކޯޓުގެ ދެ ގާޒީއަކާ ބެހޭ ގޮތުން ދެއްކެވި ވާހަކަފުޅަކާ ގުޅިގެން ޖޭއެސްސީން ވަނީ 2016 ވަނަ އަހަރުގެ ފެބްރުއަރީ މަހުގެ ތެރޭގައި އޭނާ ދެ އަހަރާއި ފަސް މަސް ދުވަހަށް ސަސްޕެންޑް ވެސް ކޮށްފަ އެވެ.

ހަސަން ސައީދު ފެމިލީ ކޯޓުން ކްރިމިނަލް ކޯޓަށް ބަދަލުކުރީ ވެސް ޖޭއެސްސީން އޭނާގެ މައްސަލައެއް ކުރިން ބެލުމަށްފަހު ނަސޭހަތް ދީފަ އެވެ.