މިއަދު ފެށި ލޯކަލް ކައުންސިލް އަދި އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ އިންތިހާބުގެ ވޯޓް މޮނިޓާ ކުރިއިރު މިހާތަނަށް މާބޮޑު މައްސަލައެއް ފާހަގަވެފައި ނުވާ ކަމަށް ހިއުމަން ރައިޓްސް ކޮމިޝަން މޯލްޑިވްސް (އެޗްއާރުސީއެމް) އިން ބުނެފި އެވެ.
އެޗްއާރުސީއެމްއިން މިއަދު ބޭއްވި ނޫސްވެރިންގެ ބައްދަލުވުމުގައި އެ ކޮމިޝަންގެ މެމްބަރުންގެ ގޮތުގައި ތިއްބެވި އައިމިނަތު ޝިފާއަތު އަބްދުއް ރައްޒާގު އަދި މޫމިނާ ވަހީދު ވަނީ އިންތިހާބާ ގުޅޭގޮތުން މިހާތަނަަށް ފާހަގަ ކުރެވުނު ކަންތައްތައް ހިއްސާ ކުރައްވާފަ އެވެ.
އެގޮތުން އިއްޔެ އެއްވެސް ފަރާތަކުން ކެމްޕޭނަށް ހުރަސް އަޅާފައިނުވާ ކަމަށާއި އެހެންކަމުން އިންތިހާބު ބޭއްވުމަށް އެކަށީގެންވާ މާހައުލެއް ގާއިމް ކުރުމަށް މަސައްކަތް ކުރިކަމަށް ގަބޫލުކުރެވޭ ކަމަަށް މެމްބަރު މޫމިނާ ވިދާޅުވި އެވެ. ނަަމަވެސް އިއްޔެ ހަވީރު ހައެއްގެ ފަހުން ބައެއް ޕާޓީތަކުގެ މީހުންނާއި އަމިއްލަ މީހުން ސޯޝަލް މީޑިއާގައި ކެމްޕޭންތައް ކުރިއަށް ގެންދިޔަކަން މޫމިނާ ފާހަގަކުރެއްވި އެވެ.
އިންތިހާބްގެ ގާނޫނުގައި ވާގޮތުން އިންތިހާބް އޮންނަ ދުވަހުގެ ކުރީ ދުވަހުގެ ހަވީރު ހައެއްގެ ފަހުން ކެމްޕޭން ކުރުމަކީ މަނާ ކަމެކެވެ.
" މިހާތަނަށް އިންތިހާބަށް ކޮމިޝަނާ ގުޅޭގޮތުން ހުށަހެޅިފައިވަނީ ފަސް މައްސަލައެއް. މީގެ ތެރެއިން ތިން މައްސަލައަކީ އިންތިހާބް އޮތް ދުވަހުގެ ކުރިން ހުށަހެޅިފައިވާ މައްސަލައެއް. މި މައްސަލަތަކާ ގުޅޭގޮތުން ކޮމިޝަންގައި އަޅުގަނޑުމެން މިވަނީ މަޝްވަރާކުރެވި އަދި ގޮތެއް ނިިމިފައި. ދެން އަޅުގަނޑުމެންނަށް ހުށަހެޅިފައިވާ އަނެއް ދެ މައްސަލައަކީ މާލެ ސިޓީއިން ހުށަހެޅިފައިވާ މައްސަލައަކާއި އައްޑޫ ސިޓީއިން ހުށަހެޅިފައިވާ ދެ މައްސަލައެއް. އެ ދެ މައްސަލަ މިހާރު ކޮމިޝަނުން ދަނީ މަޝްވަރާ ކުރެވެމުން" މޫމިނާ ވިދާޅުވި އެވެ.
ކޮވިޑްއަށް ޕޮޒިޓިވްވެފައިވާ ފަރާތްތަކާއި އަދި ކަރަންޓީނުގައި ތިބި ފަރާތްތަކަށް ވޯޓުލުމުގެ އިންތިޒާމްތައް ހަމަޖެއްސީ ވަރަށް ފަހުން ކަމަށްވާތީ އަދި މިހާރުވެސް އެ އިންތިޒާމްތައް މުޅިން ހަމަނުޖެހޭތީ މޫމިނާ މިއަދު ކަންބޮޑުވުން ފާޅުކުރެއްވި އެވެ. އަދި އެއީ ވޯޓުލުމުގެ ހައްގަށް އަސަރުކުރާނެ ކަމަަކަށް ވާތީ އެ އިންތިޒާމް އަވަހަށް ހަމަޖައްސައިދިނުމުން އޭނާ އެދިވަޑައިގެންނެވި އެވެ.
ވޯޓުލުން މިއަދު ހެނދުނު ހަތެއް ޖެހިއިރު ވޯޓު ލާ ގިނަ މަރުކަޒުތައް ބޮޑަށް އޮތީ ފަޅަށެވެ. އަދި ހަ ފޮއްޓަކަަށް ވޯޓު ލާނެ މީހަކު ނެތިގެން ފުދޭވަރަކަށް ގިނަ ވަގުތު ވޯޓުލުން ނުފަށާވެސް އޮތެވެ. އޭގެ ތެރޭގައި އަތޮޅުތަކުގެ ދެ ފޮއްޓަކާއި ހަތަރު ރިސޯޓެއްގެ ފޮށި ހިމެނެ އެވެ. އެކަން އެގޮތަށް ވުމުން އެޗްއާރުސީއެމް މެމްބަރު ޝިފާއަތު ކަންބޮޑުވުން ފާޅުކުރެއްވި އެވެ. އަދި ވޯޓުލާން އަވަހަށް ވަޑައިގަތުމަށް އޭނާ މިއަދު އެދިވަޑައިގެންނެވި އެވެ.
" އަޅުގަނޑުމެން މިހާތަނަށް އޮބްޒާވްކުރިކުރުމުން ހަލަބޮލިކަމެއްް ހިނގާކަމަށް ބޮޑެތި މައްސަލަތައް ހުރިަކަމަށް ގަބޫލެއް ނުކުރެވޭނުރެވޭ. ދެން އިލެކްޝަންސްގެ ހުރިހާ ކަމެއް ނިމެންދެން އަޅުގަނޑުމެންގެ މުވައްޒަފުން ހަރަކާތްތެރިވަމުންދާނެ ފޮށިތައް ކައިރީގައިވެސް އަދި މީޑީއާ މެދުވެރިކޮށް އޮބްޒާވްކޮށް އެކި ފަރާތްތައް މޮނީޓާ ކުރާނަން" ޝިފާއަތު ވިދާޅުވި އެވެ.
ކޮވިޑާ ގުޅިގެން ދިމާވި ދަތިތަކާހުރެ މިފަހަރުގެ އިންތިހާބް އެޗްއާރުސީއެމްއިން މޮނީޓާކުރަނީ އައްޑޫ ސިޓީ އަދި މާލޭގައި އެކަންޏެވެ.