މިނިސްޓްރީ އޮފް ފިޝަރީޒްގެ ނައިބުގެ މަގާމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ފުރަތަމަ ފަހަރަށް ބޭފުޅަކު އައްޔަނު ކުރައްވައިފި އެވެ.
ނައިބަކަށް އައްޔަނު ކުރައްވާފައިވަނީ މ. ހިޔަމަ، އަލީ މާޖިދު އެވެ. އޭނާ އަކީ ނ. އަތޮޅު ކައިންސިލް މެމްބަރުކަން ކުރައްވާފައިވާ ބޭފުޅެކެވެ.
އަލީ މާޖިދަކީ މަންދު ކޮލެޖުން ޑިޕްލޮމާ އިން ބިޒްނަސް މެނޭޖްމަންޓް ހާސިލްކުރައްވާފައިވާ ބޭފުޅެކެވެ. މީގެ ކުރިން އޭނާ ވަނީ ސެޓްފިކެޓް އިން ޓްރެވަލް އެންޑް ޓުއާ އޮޕްރޭޝަންސް ކޯހެއް ވެސ ފުރިހަމަކުރައްވާފަ އެވެ. އިންޓީރިއާ ޑިޒައިނިން އަދި ޕްރޮޖެކްޓް މެނޭޖްމަންޓްގެ މަސައްކަތްތައް ވެސް އޭނާ ކުރައްވާފައިވެ އެވެ.
އަލީ މާޖިދު ވަނީ ނޮދާން ޔޫޓިލިޓީސް ލިމިޓެޑްގެ މެނޭޖިން ޑިރެކްޓަރު ކަމާއި، ޕްލޭންކްޓަންސް ބީޗް ހޮޓެލް އަދި މޯނިން ސަންރައިސް ޕްރައިވެޓް ލިމިޓެޑް ފަދަ ކުންފުނިތަކުގައި ޖެނެރަލް މެނޭޖަރުގެ މަގާމު ވެސް އަދާކުރައްވާފަ އެވެ. އަދި އަމިއްލަ ގޮތުން މަސައްކަތްކުރާ އެކި ކުންފުނިތަކުގެ އިސް މަގާމުތައް ވެސް ފުރުއްވާފައިވެ އެވެ.