ސިޑިއަކުން ވެއްޓި މީހެއްގެ ކަރު ކަފައިގެން ގޮސްފި

ބ. އޭދަފުށީ ގެއެއްގެ ސިޑިއަކުން ވެއްޓި އަންހެނަކަށް ވަރަށް ބޮޑަށް އަނިޔާވެ، އޭނާގެ ކަރު ކަފައިގެން ހިނގައްޖެ އެވެ.

މިއަދު ހެނދުނު ގާތްގަނޑަކަށް 9:15 އެހައިކަންހާިއރު ސިޑިން ވެއްޓި އަނިޔާ ލިބުނީ އެ ރަށު އަޅިވިލާގޭ އަރީފާ ޔޫސުފް 43، އަށެވެ.
ސިޑިން ވެއްޓި ލިބުނު ޒަހަމްތަކުގެ ފުން ކަމުން އިތުރު ފަރުވާ ދިނުމަށް އޭނާ ވަނީ ސީއެމްބިއުލާންސްގައި މާލެ ގެނެސް އައިޖީއެމްއެޗަށް ގެންގޮސްފަ އެވެ.

ބ. އަތޮޅު ހޮސްޕިޓަލުން މައުލޫމާތު ދެއްވި އޮފިޝަލަކު ވިދާޅުވީ، ސިޑިން ވެއްޓި އަނިޔާވި އަންހެންމީހާގެ ކަރުން 7 އިންޗިއަށްވުރެ ބޮޑު ބައެއް ކަފައިގެން ގޮސްފައިވާ ކަމަށެވެ. އެހާ ބޮޑު ތަނެއް ކަފައިގެން ދިޔައީ އަންހެންމީހާ ވެއްޓުނު ވަގުތު އެތާ ކައިރީގައި ހުރި ހޮޅިއެއްގައި އަޅައިގަނެގެން ކަމަށް އެމީހާގެ އާއިލާގެ ފަރާތުން ބުނެފައިވާ ކަމަށް ވެސް އެ އޮފިޝަލު ވިދާޅުވި އެވެ.

ކަރުން ބައެއް ކަފައިގެން ދިއުމުގެ އިތުރަށް ދަތްދޮޅީގެ ދަށުންނާއި މޫނުގެ އެކި ތަންތަނަށްވެސް ވަރަށް އަނިޔާ ވެފައިވާ ކަމަށް ހޮސްޕިޓަލުން ބުންޏެވެ.