ރައީސް އަބްދުﷲ ޔާމީނަށް ހަމަލާދީ އަވަހާރަކޮށްލަން އުޅުމުގެ ތުހުމަތުގައި ފުލުހުން ހައްޔަރު ކުރި ސްރީލަންކާގެ ސްނައިޕަރު، ނުވަތަ އަމާޒަށް ބަޑިހާމީާ ހައްޔަރުކުރުމަށްފަހު އެފަދަ މައްސަލަތަކުގައި އަމަލުކުރަން ގާނޫނުގައި އޮންނަ ގޮތަށް ރާއްޖެއިން އަމަލުކޮށްފައި ނުވާ ކަމަށް ބުނެ ދިވެހި ސަފީރު ޒާހިޔާ ޒަރީރާ ސުވާލުތައް ކުރިމަތި ކުރުވައިފި އެވެ.
ލަންކާގެ ފޮރިން މިނިސްޓްރީއާ ހަވާލާދީ އެގައުމުގެ ނޫހެއްގައި ބުނެފައިވަނީ، ނުރައްކާތެރި ތުހުމަތެއްގައި އެގައުމުގެ ރައްޔިތަކު ހައްޔަރުކުރުމާ ގުޅިގެން ލަންކާގައި ހުންނަވާ ދިވެހި ސަފީރު ޒާހިޔާ ޒަރީރު އެގައުމުގެ ފޮރިން މިނިސްޓްރީއަށް ގެނެސް ސުވާލުކޮށްފައިވާ ކަމަށެވެ. އެކަމަނާއާ ސުވާލުކުރައްވާފައިވަނީ ރައީސް އަވަހާރަކޮށްލަން މަސައްކަތް ކުރި ކަމުގެ ކުށުގައި ހައްޔަރުކޮށްފައިހުރި ލަންކާ ސްނައިޕަރުގެ މައްސަލާގައި ކަމަށެވެ.
ލަންކާގެ ފޮރިން މިނިސްޓްރީގެ ސްޕޯކްސް ޕާސަން މަހިޝިނީ ކޮލޮން ވިދާޅުވެފައިވާ ކަމަށް ލަންކާ ޑެއިލީ ނިއުސް އިން ބުނީ، ރައީސް ޔާމީނަށް ހަމަލާދިން ކަމުގެ ތުހުމަތުގައި ހައްޔަރުކޮށްފައިވާ ލަހިރޫ މަދުޝަންކާއަށް ގާނޫނީގޮތުން ލިބެންޖެހޭ ހުރިހާ ހައްގެއް ލިބޭކަން ކަށަވަރުކުރަން ލަންކާ ފޮރިން މިނިސްޓްރީން ބޭނުންވާ ކަމަށެވެ. އޭނާ މިހާރު ހުރި ހާލަތުގައި، ގާނޫނީ ގޮތުން ލިބެންޖެހޭ ހައްގުތަކާ އެކު، ސްރީލަންކާގެ ކޮންސުލް އޮފިސަރުންނާއި ވާހަކަދެއްކުމުގެ މިނިވަންކަން އޭނާ އަށް ދޭންޖެހޭ ކަމަށް ދެކިވަޑައިގަންނަވާ ކަމަށެވެ.
ކޮލޮން ވިދާޅުވީ، ގާނޫނީ ހަމަތަކަށް ބަލާއިރު، ބޭރު ގައުމަކަށް ނިސްބަތްވާ މީހަކު އެހެން ގައުމަކުން ހައްޔަރުކުރާނަމަ، ދައުވާ ކުރާ ފަރާތުން ދައުވާ އުފުލާ ފަރާތާ ބެހޭ މައުލޫމާތު އެންމެ ކައިރީގައި ހުންނަ އެގައުމެއްގެ އެމްބަސީއެއް މެދުވެރިކޮށް ހައްޔަރުކުރި މީހާގެ ގައުމުގެ ސަރުކާރަށް ލަސް ނުކޮށް އަންގަންޖެހޭނެ ކަމަށާއި ނަމަވެސް ރާއްޖެއިން އެކަން އެގޮތަށް ކޮށްފައިނުވާތީ އެ ސުވާލު ހައިކޮމިޝަނާ ޒާހިޔާއާ ކޮށްފައިވާ ކަމަށެވެ.
"ލަންކާގެ ފޮރިން މިނިސްޓްރީގެ އޮފިޝަލުންގެ ވާހަކަފުޅުތަކަށް ބަލާއިރު ސްރީލަންކާގެ ރައްޔިތަކު ރާއްޖެއިން ހައްޔަރުކުރިކަން މާލޭގައި ހުންނަ ލަންކާގެ އެމްބަސީއަށް އެންގުމުގައި ރާއްޖެއިން ވަނީ ފެއިލް ވެފައި،" އެނުގައ ބުނެފައި ވެއެވެ.
"ހައްޔަރުކުރާ ގައުމުން ކުއްވެރިޔާގެ ގައުމަށް އެކަމުގެ މައުލޫމާތު ނުފޮނުވާ ކަމަށް ވާނަމަ އެ ހިލާފު ވެވެނީ އިމިގްރޭޝަން އަދި އެމިގްރޭޝަންގެ ގާނޫނުތަކާ. ރާއްޖެއިން ހައްޔަރުކުރު ލަންކާގެ މީހާއަށް މިލިޓަރީ ތަމްރީނެއް ލިބިފައިވާ ކަމުގެ އެއްވެސް ހެއްކެއް ރާއްޖެއަށް ލިބިފައިވޭތޯ އަޅުގަނޑުމެން ސުވާލުކޮށްފައި ވާނެ،" ކޮލޮން އާ ހަވާލާދީ ޑެއިލީ ނޫހުން ބުނެފައި ވެއެވެ.
ނަމަވެސް މިއިން އެއްވެސް ކަމެއްގައި ޒާހިޔާ ދެއްވާފައިވާ ޖަވާބެއް ނެތެވެ. ނަމަވެސް ރާއްޖޭގެ ފޮރިނ މިނިސްޓްރީން މިއަދު ބުނެފައި ވަނީ ރާއްޖޭގައި ހައްޔަރުކޮށްފައިވާ ސްރީލަންކާގެ ސްނައިޕާއާ ބެހޭ މައުލޫމާތު ދިވެހި ސަރުކާރުން ލަންކާ ސަރުކާރަށް ދީފައިވާ ކަމަށެވެ.
ރައީސް އަބްދުﷲ ޔާމީން އަވަހާރަކޮށްލަން މަސައްކަތް ކުރިކަމުގެ ތުހުމަތުގައި ލަންކާގެ ސްނައިޕަރު ލަހިރޫ މަދުޝަންކާ ހައްޔަރުކޮށްފައިވާއިރު އެ ގައުމުގެ ސަރުކާރުގެ އޮފިޝަލުންނާ ހަވާލާދީ ނޫސްތަކުން ބުނެފައި ވަނީ، މަދުޝަންކާ އަކީ ކޮލަމްބޯގެ ރަށްފުށު އަވަށެއް ކަމަށްވާ، މަލާބޭއަށް ނިސްބަތްވާ އާދައިގެ މީހެއް ކަމަށެވެ. އަދި އޭނާ އަކީ އެއްވެސް ކަހަލަ އަސްކަރީ ތަމްރީންތަކެއް ލިބިފައިވާ މީހެއް ނޫން ކަމަށެވެ. މަދުޝަންކާ ރާއްޖެއަށް ދިޔައީ އޭނާގެ ބައްޕަގެ ހިކި މަސް ވިޔަފާރީގައި ވިއްކުމަށް ޓަކައި ރާއްޖެއިން ރަނގަޅު ހިކިމަސް ކޮޅެއް ހޯދުމަށް ކަމަށް ވެސް ލަންކާގެ ނޫސްތަކުގައިވެ އެވެ.