މާލެއިން ކޮޅުނބަށް ފޮނުވާ ސިޓީއެއް!

ސްރީލަންކާގެ ބޮޑު ވަޒީރު ރަނިލް ވިކްރަމަ ސިންހާއަށް، ވެދުން ސަލާމަށް ފަހު އަދަބު އިހުރާމާއެކު ދަންނަވަމެވެ. އަޅުގަނޑު ދަންނަ ގޮތުން ވިއްޔާ ސްރީލަންކާއަކީ ހުރިހާ ދަނޑެއްގައި ދިވެހިން ހޭލައްވައިދިން ދިވެހިންގެ "އަމަ" އެވެ. އަދި އަހަރެމެންގެ ތިންލައްކަށްވުރެ ގިނަ މީހުންގެ ހިތާ އެންމެ ކައިރީގައިވާ ރަހުމަތްތެރި މަދަދުވެރިޔާ އެވެ. އަޅުގަނޑުމެން ދެބައި މީހުންގެ ގުޅުމަކީ ހިތާއި ހިތުގެ ގުޅުމެކެވެ.

އިތްޒަތެރި ބޮޑު ވަޒީރެވެ. ބައެއް ވާހަކަތަކަކީ ހިސާބަކަށް ދައްކާލައި ހިސާބަކަށް ލިޔެލައިގެން ނޫން ގޮތަކަށް އެކަމެއް ސާފު ނުވާ ކަންކަމެވެ. މި ސިޓީ ލިޔާން އަޅުގަނޑު ބޭނުންވީ އެހެންވެ އެވެ.

އިތް ޒަތްތެރި ބޮޑުވަޒީރެވެ. ސޯޝަލް މީޑިއާ އެކްޓިވިސްޓުންނާއި ސިޔާސީ ފަރާތްތަކާމެދު ރާއްޖެ އިން އަމަލުކުރަމުން ދަނީ ސުވާލު އުފެދޭ ފަދަ ގޮތަކަށް ކަމަށާއި އެފަދަ ކަންކަމުގެ ތެރެއަށް ސްރީލަންކާ ވައްދާތީ ކަންބޮޑުވާ ކަމަށް މަނިފާނުގެ ގައުމުން ބުނެ، ވަނީ ރާއްޖެއަށް ނުރުހުމާއި ކަން ބޮޑުވުން ފާޅުކޮށްފައެވެ.

އެބާވަތުގެ އެކްޓިވިސްޓެއް ކަމަށްވާ އަހްމަދު އަޝްރަފް (ޝުމްބާ ގޮންގް) ތިޔަ ގައުމުގައި ހައްޔަރުކުރީ އޭނާގެ އަތުގައި ސައްހަ ވިސާއެއް އޮއްވާ ކަމަށާއި ރާއްޖޭގައި ކުއްލި ނުރައްކަލުގެ ހާލަތު އިއުލާނު ކުރުމުން ކަންބޮޑުވާ ކަމަށް މަނިކުފާނުގެ ސަރުކާރުން ވަނީ ބުނެފައެވެ. ރާއްޖޭގައި ކުއްލި ނުރައްކަލުގެ ހާލަތު އިއުލާން ކުރުމުން ރައްޔިތުންގެ ހައްގުތައް ގެއްލިގެންދާ ކަމަށް ވެސް މަނިކުފާނުގެ ހާރިޖިއްޔާއިން ބުނި ދެއްތޯ އެވެ؟ އަސާސީ ހައްގުތައް ކަށަވަރުކޮށްދިނުމަށް ރާއްޖެއިން ދީފައިވާ އިތުބާރާއި ކޮމަންވެލްތު ގައުމެއްގެ ހައިސިއްޔަތުން ސޮއިކޮށްފައިވާ މުއާހަދާތަކަށް ރާއްޖެއިން އިހްތިރާމްކުރާނެ ކަމަށް އުންމީދުކުރާ ކަމަށް ވެސް ބުނި ދެއްތޯ އެވެ؟

އެނގިވަޑައިގަންނަވާތޯ އެވެ؟ ދިވެހިރާއްޖޭގެ ރައީސުލްޖުމްހޫރިއްޔާ އަބްދުﷲ ޔާމީން އަބްދުލްގައްޔޫމް އަވަހާރަކޮށްލަން ދިވެހިންގެ ބަޔަކު ފައިސާ ދީގެން ރާއްޖެ ގެނައި ތިޔަ ގައުމުގެ ސްނައިޕަރަކު ހައްޔަރުކޮށްފައިވާ ކަމަށް ދިވެހި ފުލުން ވަނީ ކަށަވަރުކޮށްދީފަ އެވެ. އިޝާރާތް ކުރާ އަޝްރަފް ހައްޔަރުކޮށް ރާއްޖެ ގެނައުމުގައި ގާނޫނާ ހިލާފު އެއްވެސް ކަމެއް ކޮށްފައި ނުވާނެ ކަމަށް ސަރުކާރުން ކަށަވަރު ކޮށްދޭއިރު އޭނާ ހައްޔަރުކޮށް ރާއްޖެ ފޮނުވީ ލަންކާާގެ ފުލުހުން ނޫންތޯ އެވެ؟

އެ މަންޒަރުގެ ވިޑީއޯ ނެރުނީއަކީ އަޅުގަނޑުމެންގެ ހާރިޖިއްޔާއަކުން ނޫނެވެ. އަދި އަޅުގަނޑުމެންގެ ފުލުހުންނެއްވެސް ނޫނެވެ. އެކަން ކުރީ ތިކޮޅުންނެވެ. އެ ވީޑިއޯގައި ފެންނަނީ ވެސް ލަންކާ ފުލުހުންނެވެ. އޭނާ ޑިޕޯޓްކޮށް ދިވެހި ސަރުކާރާ ހަވާލު ކުރީ މަނިކުފާން އިމިގްރޭޝަން ޑިޕާޓްމަންޓުންނެވެ.

ޓްރާންސްނޭޝަނަލް ކުށްތައް ހުއްޓުވައި ފުލުހުންގެ ދާއިރާ އިން ގުޅުން ބަދަހިކުރުމާ ގުޅޭ އެއްބަސްވުމެއްގައި އަޅުގަނޑުމެން ދެގައުމުން މިތިބީ ސޮއިކޮށްގެނެވެ މި އެއްބަސްވުގެ ދަށުން އޮންނަ އަންޑަސްޓޭންޑިން ދޫކޮށްލައި ކުއްލިއަކަށް ތެޅި ފޮޅިގަތީމާ ކަމަކުނުދާނެ ދެއްތޯ އެވެ؟

ދިވެހި ރާއްޖޭގެ ރައީސުލް ޖުމްހުއްރިޔާ އަވަހާރަކޮށްލަން ދިން ހަމަަލަ އާއި ރޭވި ހަމަލަތަކާމެދު އަޅުގަނޑުމެންގެ "އަމާ"، އަދި އެންމެ ގާތް ރަހުމަތްރިޔާ ކަންބޮޑެއް ނުވި އެވެ. އެއާ ގުޅިގެން އައި އެއްވެސް ކަމެއް ވެސް ބޮޑު ކަމަކަށް ނުވި އެވެ. ބޮޑުވީ ޝުމްބާ ގޮންގާއި ސްނައިޕަރުގެ މައްސަލަ އެވެ. ގައުމެއް ސަލާމަތް ކުރަން ހިންގި ސްޓޭޓް އޮފް އިމަޖެންސީގެ މައްސަލަ އެވެ.

ރާއްޖޭގެ ޑިމޮކްރަސީ އާއި އިންސާނީ ހައްގުތަކާއި ނޫސްވެރި ކަމުގެ މިނިވަން ކަމާމެދު ކަންބޮޑުވި އިރު ތިޔަ ގައުމުގައި 30 އަށްވުރެ ގިނަ އަހަރުވީ އަހުލީ ހަނގުރާމައި ހިނގައިދިޔަ ކަމަށް ބުނާ ލާއިންސާނީ ކަންކަމުގެ ފައިލްތައް ކިިހިއްޔަށް ޖަހައިގެން އަޅުގަނޑުމެން "ވާނުވާ" ގައި ނުކުމެ އެވާހަކަ ދެއްކިތޯ އެވެ؟

ނޫސްވެރި ކަމުގެ މިނިވަަން ކަމަށް ހުރަސް އަޅަން ޓީވީ ޗެނަލަކަށް ދިވެހި ފުލުހުން ވަން ވާހަކަ މަނިކުފާނުގެ ގައުމުގެ އޮފިޝަލުންނާ ހަވާލާދީ މަނިކުފާނުގެ ގައުމުގެ ނޫސްތަކުން ބޮޑު ކޮށްލި އިރު އެބުނާ ތަނަށް ވަނީ ދިވެހި ރާއްޖޭގެ ރައީސުލް ޖުމްހޫރިއްޔާ އާއި އޭރު ނައިިބު ރައީސް އަވަހާރަކޮށްލާނެ ކަމަށް އިންޒާރުކޮށް އަދި އަޅުގަނޑުމެންގެ މުޅި އިގްތިސޯދު އެކަމެއްގެ މައްޗަށް ބަރޯސާވެފައި ޓޫރިޒަމަށް ގެއްލުން ދޭނެ ކަމަށް ބުނެ ވީޑިއޯއެއް އަޕްލޯޑް ކުރިކަމުގެ ހެކި ހުރެގެން ކަމަށް ފުލުހުންނަށް ކަށަވަރުވެގެނެވެ. އެކަން ކޯޓްގައި ސާބިތު ނުވެއްޖެއްޔާ އެ ވާހަކަ ދައްކާނީ އެވެ. އެކަމުގެ ބަދަލު ހޯދާނީ އެވެ. އެ ނިޒާމް ރާއްޖޭގައި ގާއިމުވެފައި އެބައޮތެވެ.

ބޮޑު ވަޒީރެވެ، މިދައްކަނީ ޓެރަރިޒަމްގެ ވާހަކަ އެވެ. އިންތިހާބީ ރައީސަކު އަވަހާރަކޮށްލާ ވާހަކަ އެވެ. ގައުމެއްގެ އިގްތިސޯދު ހަލާކުކޮށްލާ ވާހަކަ އެވެ. މިފަދަ ތުހުމަތުތައް ކުރެވުނީމާ އެކަމެއްގެ ތަހުގީގު ނުކޮށް އެކަމަށް ބޭނުންވާ ހެކި ނުހޯދައި ދެން ކަން ކުރާނެ ގޮތެއް އީޖާދުވެފައި އެބައޮތްތޯ އެވެ؟ އެޅުގަނޑަށް އެނގިއެއް ނެެެތެވެ. ފަހަރުގައި މަނިކުފާނުގެ ގައުމުގައި އެފަދަ ވުޖޫދެއް އޮވެދާނެ އެވެ.

މާތް މަނިކުފާނެވެ. މީގެ 15 އަހަރު ކުރިން ފުލުހުން ގުންފައިޖަހާފައި އައިސް އަޅުގަނޑު ހައްޔަރު ކުރި އެވެ. އެވާހަކަ އެމްނެސްޓީ އިންޓަނޭޝަނަލަށާއި ބީބީސީއަށް ލިޔުނީ އަޅުގަނޑުން ޖަލުން ދޫކޮށްލުމުން ގޭބަންދުގައި ހުރެގެން "މޯލްޑިވްސް ކޮންސާންޑް" ނަމުގައި އަމިއްލައަށެ އެވެ. އަޅުގަނޑު ފޮނުވި އީމޭލަށް ބަލައި އެއްވެސް މީހެއްގެ ގާތުގައި ވެސް ދިވެހި ސަރުކާރުގައިވެސް ހޭވެސް އަހައި ނުލަ ބީބީސީން ވެސް އެ ވާހަކަ ލިޔުނެވެ. އެމްނެސްޓީން ބަޔާން ނެރުނެވެ. މިހާރުވެސް ކަންތައް އޮތީ އެހެނެވެ. ހަމަ ހައްޔަރެއްވާއިރަށް ލިޔަނީ އެވެ. ދެން ބަޔާން ނެރެނީ އެވެ. ވީ ގޮތެއް ބަލައިވެސް ނުލަ އެވެ. ރަސްމީ އިދާރާއަކުން ސާފެއް ވެސް ނުކުރެ އެވެ.

މިހާރު ދިމާވެގެން މިއުޅޭ ކަންކަމުގައި ވެސް މިވަނީ އެހެން ނޫންތޯ އެވެ؟ އަސްލަކީ ކޮބައިތޯ ބަަލައިވެސް ނުލައި ތެޅިގަތީ އެވެ. އަޅުގަނޑުމެން އެބާވަތުން ވާހަކަ ނުދައްކާން ތިބެނީއަކީ ނޭނގިގެން ނޫނެވެ. މަނިކުފާނުގެ ސަރުކާރަށް ވެރިކަން ލިބުމާއެކު ރުޕަވާހީނީގެ ތަރުތީބު ގެއްލުވާލައި ތަން ފޮތި ޖަހާލައި ނޫސްވެރިންތައް ގެއަށް ފޮނުވާލިކަން އަޅުގަނޑުމެނަށް އެނގެ އެވެ. އެއީ ނޫސްވެރި ކަމުގެ މިނިވަންކަން ދެއްތޯ އެވެ؟ އެކަމަކު އަޅުގަނޑުމެން އެވާހަކައަކުން މަޖާ ނަގައެއް ނުހަދަމެވެ

އަޅުގަޑުމެންގެ ރައީސް އަވަހާކޮށްލަން ހަަމަލާދީ އަޅުގަނޑުމެން ގޭގެ އާއި ރަށްރަށުން ހަތިޔާރު ފެނި އަޅުގަނޑުމެން ބަޑި ގުދަނުން ހަތިޔާރު ބޭރުވެ އެކަންކަމަށް ތުހުމަތު ކުރެވޭ މީހުންގެ ގޭގެއިންނާއި ކަނޑުގެ އަޑިން އެތަކެތި ނެގޭ ހިސަބަށް ކަން ހިނގައިދިޔަކަން ރައީސަށް ގުޅުއްވާފައި ސާފުކޮށްލެއްވިންތޯ އެވެ؟

އެކަންކަމަށް ތުހުމަތުވާ މީހުންގެ ގޭގެއަށް ވަންނަން ދިޔައިމާ ނުވަދޭ ހސާބަށް ގޮސް ނުރައްކާތެރި ހާލަތަކަށް ކަންކަން ދިޔަ މިންވަރު ބައްލަވައިލަން އެއްވެސް މަސައްކަތެއް ކުރެއްވިފައި ވޭތޯ އެވެ؟

އެކަންކަން އެހެން ހުރުމުން އަޅުގަނޑުމެން ރަށްވެހީންގެ ސަލާމާތާއި ރައްކަލަށްޓަކައި ސްޓޭޓް އޮފް އިމަޖެންސީ އިއުލާން ކުރުމުން މަނިކުފާނުގެ ސަރުކާރު ކަންބޮޑުވެ ހާސްވި އިރު އަޅުގަނޑުމެން ތާރީހުގައި އެފަދަ އައީ ތިން ހާލަތެކެވެ. ފުރަތަމަ މުހައްމަ އަމީންގެ މާޝަލްލޯ އެވެ. ދެން 2004 ގަ އެވެ. ދެން މިފަހަރު އެވެ.

އަޅުގަނޑަށްވުރެ މަނިކުފާނުގެ އިލްމުވެރިކަމާއި މައުރިފާވެރިކަން ބޮޑުވާނެ އެވެ. އަޅުގަނޑުވެސް އެއްބަހެވެ. ސްޓޭޓް އޮފް އިމަޖެންސީއަކީ އާދައިގެ ކަމެއް ނޫނެވެ. އެކަމަކު ހިންގާން ޖެހުމުން އުނދަގުލުން އެ ފިޔަވަޅު އަަޅަނީ އެވެ. އެކަން މަނިކުފާނަށް އެނގިވަޑައިގަންނަވާނެ އެވެ. މަނިކުފާނުގެ ގައުމަށްވުރެ ގިނައިން ސްޓޭޓް އޮފް އިމަޖެންސީ ހިންގި ގައުމެއް ދުނިޔޭ ތާކު ނެތެވެ. އަޅެފަހެ މިއީ ދޮގެއްތޯ އެވެ؟ އެހެނެކޭ ކިޔައި އަޅުގަނޑުމެން ކުރީ ކީއްތޯ އެވެ؟ މަނިކުފާނުގެ ގައުމުގައި ކާފިއު ހިންގި އަދަދު ގުނާން އުޅުނު މީހަކު ވާނީ މޮޔަ އެވެ. އަޅުގަނޑުމެން ކާފިއުއެއް ނުހިންގަމު އެވެ.

އަދި މަނިކުފާނަށް އެނގިވަޑައިގަންނަވާތޯ އެވެ؟ އަޅުގަނޑުމެންގެ ގައުމުގައި އިއުލާން ކުރި ޒާތުގެ ސްޓޭޓް އޮފް އިމަޖެންސީއެއް ހިނގި ގައުމެއް ދުނިޔޭގައި އޮންނާނެ ހެނެއް ހީއެއް ނުވެއެވެ. އެހެން މިދެންނެވީ އެމީހަކު ބޭނުން ތާކަށް ބޭނުން ގަޑިއަކު ދެވެ އެވެ. އެމީހަކު ބޭނުން ކަމެއް ކުރެވެ އެވެ. ފުލުހުން ތަންތަނަށް ވަދެ އަދި މަނިކުފާނުގެ ގައުމުން އިޝާރާތްކުރި ޓީވީ ޗެނަލް ބަލައި ފާސް ކުރީ ވެސް ކޯޓް އަމުރު ހޯދައިގެނެވެ. ސްޓޭޓް އޮފް އިމާޖެންސީއެއްގައި އެ އަމުރު ހޯދާކަށް އަމުދުން ނުވެސްޖެހެ އެވެ. ވީމާ އަޅުގަނޑުމެންގެ ގައުމުގައި ހިންގީ އާދަހިޔާފު ސްޓޭޓް އޮފް އިމަޖެންސީ އެއް ނޫންތޯ އެވެ؟

ސްނައިޕަރު މީހާއަށް ކުރެވޭ ތުހުމަތު ދިވެހި ފުލުހުން ވަނީ ބުނެދީފައެވެ. ކުރިއެރުން ލިބޭ ވަރަކަށް އަދިވެސް ބުނެދޭނެ އެވެ. އެކަން މަނިކުފާނުގެ ސަރުކާރަށް ވެސް ވަނީ ދިވެހި ހާރިޖިއްޔާއިން ސާފުކޮށްދީފައި ކަމަށް އަޅުގަނޑު ނޫސްތަކުން ދުށީމެވެ. އެކަމަކު މަނިކުފާނުގެ ގައުމުން އެއީ ހިކި މަސް ގަންނަ ދިޔަ މީހެކޭ ބުނީމާ މާކަ ހަމައެއް ނުޖެހެ އެވެ. އެކަން ސާބިތުވާންޖެހޭނެ އެވެ. ދިވެހި ފުލުހުން ވެސް އެކުރަނީ ކަމެއް ސާބިތު ކުރުމުގެ މަސައްކަތެވެ.

އަޅުގަނޑު ދަންނަ ހަމައެއް ދަންނަވަފާނަމެވެ. ދިވެހި ރާއްޖޭގެ ރައީސް އަވަހަރަކޮށްލަން އަންނަ މީހާ މިއީ ސްނައިޕަރެކޭ އެއް ނުބުނާނެ އެވެ. އަދި މިއީ ރައީސް ޔާމީން އަވަހާކޮށްލަން ކުރާ ދަތުރެކޭވެސް ނުބުނާނެ އެވެ. ބުނާނެތޯ އެވެ؟ އެމީހާގެ މައްޗަށް އަދި ކުށް ސާބިތުވީއަކީއެއް ވެސް ނޫންނެވެ. ވީމާ މާ އަވަސް އަރައިގެން މިއުޅެވެނީ ކީއްވެގެންތޯ އެވެ؟

އެހެން ވާހަކައެއްވެސް ދަންނަވަފާނަމެވެ. ނޮވެމްބަރު 3، 1988 ވަނަ އަހަރު މަނިކުފާނުގެ ގައުމުގެ ހަނގުރާމަވެރި ޖަމާތެއްގެ 80 އަށްވުރެ ގިނަ މީހުން ޒަމާނީ ހަތިޔާރު އަޅައިގެން އައިސް އަޅުގަނޑުމެން ނިދާފައި ތިއްބާ ބަޑި ތަޅައިގެނެ އަޅުގަނޑުމެންގެ އަސްކަރިއްޔާގެ މައި އިމާރާތުގެ އެހަރަ ބޯ ފާރު ފޫދުއްވާލައި 19 މީހުން ޝަހީދުކޮށްލި އެވެ. މުޅި ރާއްޖެ އެތައް އަހަރެއްގެ ފަހަތަށް ދުއްވާލާ ސުންނާފަތި ކޮށްލި އެވެ. މިހެން ނުވޭތޯ އެވެ؟

މިއަދު ތިޔަ "ހިކި މަހުގެ ވިޔަފާރި ކުރާ ކުއްޖާ" ގެ ވާހަކަ ދައްކާއިރު މި ދެންނެވި 80 މީހުން ހުކުމް ލުއިކޮށް މަނިކުފާނުގެ ގައުމާ އަޅުގަނޑުމެން ހަވާލު ކުރީމު އެވެ. އެއިރު ސިޔާސީ ޕާޓީ އެއް ނެތެވެ. އޭރާ މިހާރާ ގުޅުވައިލީމާ މިހާރު ވެރި ކަމުގައި އޮތީ އެ 80 ޓެރަރިސްޓުން މަނިކުފާނުގެ ގައުމާ ހަވާލުކުރި ޕާޓީ އެވެ.

އަދި އެހެން ވާހަކައެއް ވެސް ދަންނަވަފާނަމެވެ. މިރަށުން ފުރަފުރައިގެން ކޮޅުނބަށް ގޮސް މަނިކުފާނުގެ ސަރުކާރަށާއި ނޫސްވެރިންނަށް ވާހަކަ ކިޔައިދީފައި ސެލްފީ ނަންގަވާ މީހުން ތިބި ޕާޓީއަކީ 1988 ގައި ތަމަޅަ ހަނގުރާމަވެރިން ވާވައްދާލައިގެން އަޅުގަނޑުމެންގެ ގައުމަަށް ގެނައި މީހުން ނިސްބަތްވާ އަދި އެކަމުގައި އިސްކޮށް ހުރި މީހާ ފިލުވައި ތިޔަ ގައުމުގެ ނޫސްތަކަށް އިންޓަވިއު ދޭން މަގުފަހިކޮށް ދޭ ޕާޓީގެ މީހުންނެވެ. އަޅުގަނޑުމެން ތަޅައި ރޯނާ ގަންނަވާލި ޓެރަރިސްޓް ޖަމާއަތަށް އެހީވި މީހުންނެވެ. އަޅުގަނޑުމެންގެ ސާކާސްޓިކް އެމްޕީއަކު ވިދާޅުވާ ގޮތަށް "ރަންކޮޅާ ރިއަލީޓީއަކީ" މިއީ އެވެ.

އިތްޒަތްތެރި ބޮޑު ވަޒީރެވެ. ސިލޯނަކީ އަޅުގަނޑުމެން ލޯތްބާއި އިހުތިރާމް އޮތް އަމާ ފިޔަވާ އެހެން އެޗެއް ނޫނެވެ. އަޅުގަނޑުމެންގެ މައިގަނޑު އިންޕޯޓެއް ތިޔަ ގައުމަކު ނެތެވެ. މަދު ބޭނުމެއްގައި ނޫނީ ދާކަށް އަމުދަކުން ނެތެވެ. ވީމާ ކުއްލިއަކަށް ކޮމަންވެލްތާއި ހަރާރޭ ގަރާރެއްގެ ވާހަކަ ފެންމަތި ކުރުވާއިރު، އަދި އިންސާނީ ހައްގުތަކުގެ ވާހަަތައް ދައްކާއިރު ސީމެގް އެޖެންޑާގައި މިހާރު ވެސް ސިލޯން އެބައޮތެވެ.

އެކަމަކު އަހުލީ ހަނގުރާމައި މީހުން މަރައި ހިންގި ކަމަށް ބުނާ އަނިޔާވެރި ލާއިންސާނީ އަމަލުތަކުގެ ވާހަކަ ހިފައިގެން ހިނގީ އަޅުގަނޑުމެންތޯ އެވެ. ނޫނީ އެކަމުގައި "އަމާ" ގެ ގައި ބަގުޑި ބައްދައިގެން "އަމާ ސަލާމަތް" ކުރާން އުޅުނީ ކޮންމަންވެލްތާއި ހަރާރޭ ގަރާރުތޯ އެވެ. އެއަށް ބޮޑު އިންޑިއާ ތޯއެވެ؟

ސަރައްދީ ހަމަނުޖެހުމާއި ދޭދޭ ގައުމުގެ މަސްލަހަތާއި ހިއުމަން ރައިޓްސްގެ ވާހަކަ ކުއްލިއަކަށް ނަގައިގެން ރާއްޖެއަށް އިނގިލި ދިއުކުރާއިރު މަނިކުފާނުގެ ގައުމުގައި ދާހިލީ ހަނގުރާމައިގެ ދުވަސްވަރު ހިނގާދިޔަ ކަމަށް ބުނާ އިންސާނިއްޔަތާ ހިލާފު އަމަލުތައް ތަހުގީގު ކުރުމަށް ގޮވާލައި އދ. ގެ ހިއުމަން ރައިޓްސް ކައުންސިލަށް ހުޅަހެޅި ގަރާރު ފާސްކުރަން އެ ފަލަ ބިޔަ ގައުމު، އިންޑިއާއިން ވޯޓް ދިނެވެ. އަޅުގަނޑުމެންގެ ރާއްޖެއިން ވޯޓް ދިނީ "އަމަޔާ" އެއްކޮޅަށެވެ. އެކަން އެނގި ވަޑައިގަންނަވާތޯ އެވެ؟

އޭރު މަނިކުފާނުގެ ގައުމަށް ފިޔަވަޅު ނޭޅިގެން އަދި ދިވެހި ސަރުކާރުން މަނިކުފާނުގެ ދައުލަތަށް ތާއީދު އޮތްކަން ހާމަ ކުރުމުން އެކަމާ ނުރުހި އެތިވަރު ގޮވައި ހެދީ މި ރައީސްގެ ސަރުކާރަކުންނެއް ނޫނެވެ. އެބައި މީހުންނީ މިރަށުން ގޮސް މަނިކުފާނާއެކު އިރުއިރުކޮޅަށް ފޮޓޯ ނަގައި ޓްވިޓަރު ޖަހާ ޕާޓީގެ މީހުންނެވެ.

އިތްޒަތްތެރި ބޮޑު ވަޒީރެވެ. އިރެއްގައި އަޅުގަނޑުމެނަށް އެހީވެވޭހާ ކުރީގައި އޮތް ނަމަވެސް މިއަދު އަޅުގަނޑުމެން މިތބީ މާ ދުރަށް ގޮހެވެ. އަޅުގަނޑުމެން މާ ޝައުގުވެރި ކަމެއް ނެތް ކިރިކެޓްގައި ނޫން ހުރިހާ ކަމެއްގައި އަޅުގަނޑުމެންމިތިބީ ޖަހާލާފައި އަރަ އެވެ. އަޅުގަނޑުމެން ހީކުރީ "އަމާ" އެކަމާ ފަހުރުވެރިވެ "ތިޔައީ މަގޭ ދަރިއޭ" ބުނެ މޭގައި އަތް ޖަހާނެ ކަމަށެވެ. އެހެނެއްވެސް ނުވި އެވެ. ބައެއް ފަހަރާ އަމައަކީ ހަމައެއް ނޯން މީހަކަށް ވެސް ވަނީތާ އެވެ. އެކަމަކު އަޅުގަނޑުމެންގެ ހިތުގައި އަމައަށް އޮތް ލޯބި ކުޑައެއް ނުވާނެ އެވެ. ތިޔައީ އަމައެވެ.

އިތްޒަތްތެރި ބޮޑު ވަޒީރެވެ؛ އަޅުގަނޑަށް ހީވަނީ ޑިމޮކްރަސީ އާއި އިންސާނީ ހައްގުތަކުގެ މައްސަލައެއް މިކަމުގައި ނެތް ހެނެވެ. އަޅުގަނޑަށް ލަފާވަނީ މިއީ އަޅުގަނޑުމެން ކުރިއަރައި ދާތީ އަޅުގަނޑުމެން ބްރިޖް އަޅާތީ، ގަތަރާއި ސައުދީ އާއި ޗައިނާ އާއި އިންޑިޔާގެ ބިޔަ އިންވެސްޓްމަންޓްތަކާ ދިމާއަށް އަޅުގަމެން ދާތީ، އަދި މާލަހެއް ނުވެ މި ދިވެހިރާއްޖެ އިންޑިޔާ ކަނޑުގައި އުފުލިގެން ހިނގައިދާނެތީ އޮތް ހަސަދަވެރި ކަމެއްގެ މައްސަލަ އެވެ. އެހެންޏާ ފަހެ، މިނޫން ދެން ކޮންމެއްތޯ އެވެ؟ އަޅުގަނޑުމެން ކުރީ ކޮން ކަމެއްތޯ އެވެ؟

އަޅުގަނޑުމެން ކުރިހާވެސް ކަމަކީ އަޅުގަނޑުމެން ކަންކަން އަޅުގަނޑުމެން ނިންމަން ދޫކޮށްލާށޭ ބުނީ އެވެ. އަދި އަޅުގަނޑުމެން ރައީސް އަޑު ހަރު ކުރައްވައި އެވާހަކަ ތަކުރާރު ކުރައްވަނީ އެވެ. ދަންނަވަންތޯ އެވެ. އެމަނިކުފާނު އެވިދާޅުވަނީ އަމާގެ ގައުމުން ތަރުބިއްޔަތުވެގެން އައި އަޅުގަޑުމެން ފުރަތަމަ ރައީސް ދިވެހި ގައުމު ވަންތަކަން ވަރުގަދަ ކުރުމަށް "ލައްބައެކައޭ" ވިދާޅުވެ ގައުމަށްޓަކައި ގުރުބާންވުމަށް އެދި ވަަޑައިގެންނެވި ބަސްފުޅެވެ. އަޅުގަނޑުމެން މަރާލިއަސް އަޅުގަނޑުމެން ޗިސްޗިސް ކުރި އަސް އަޅުގަނޑުމެން ފިސް ފިސް ކުރިއަސް އަޅުގަނޑުމެން ބުނާނީ އަޅުގަނޑުމެންގެ ކަންކަން އަޅުގުމެނަށް ދޫކޮށްލާށޭ އެވެ. އަޅުގަނޑުމެންގެ ބަސް އަޅުގަނޑުމެނަށް ބުނެވެންވާނެ އޭ އެވެ.