މި އަހަރުގެ ފަހުކޮޅު ޓޫރިސްޓުންނަށް ވެކްސިން ޖަހައިދޭން "ވެކްސިން ޓޫރިޒަމް" ފެށޭނެ ކަމަށް ޓޫރިޒަމް މިނިސްޓަރު ޑރ. އަބްދުﷲ މައުސޫމް ވިދާޅުވެއްޖެ އެވެ.
ރާއްޖޭގެ ބޯޑަރު ހުޅުވިތާ އެއް އަހަރު ފުރުން ފާހަގަ ކުރަން އިންޑަސްޓްރީގެ ޕާޓްނަރުންނާއެކު މިއަދު ބޭއްވި ނޫސްވެރިންގެ ބައްދަލުވުމެއްގައި އަވަސް އިން ކުރި ސުވާލަކަށް ޖަވާބު ދެއްވަމުން، މިނިސްޓަރު ޑރ. މައުސޫމް ވިދާޅުވީ ވެކްސިން ޓޫރިޒަމްގެ ވާހަކަ ދެއްކުންވީ މިހާލަތުގައި ރާއްޖެ އަށް ލިބުނު ބޮޑު އެކްސްޕޯޝާ އަކަށް ކަމަށެވެ. އަދި ރާއްޖެ އަށް ވެކްސިން ޖަހަން އަންނަ މަންޒިލެއްގެ ގޮތުގައި ފެށުމުގެ މަސައްކަތް މިއަހަރުގެ ފަހު ހަތަރު މަހު ފެށޭނެ ކަމަށެވެ.
އިތުރަށް މިނިސްޓަރު ވިދާޅުވީ ވެކްސިން ޓޫރިޒަމް ފެނުނީ ވަރަށް ވަރުގަދަ ވިންޑޯއެއް ކަމަށާ، އެ ވިންޑޯގައި ހިފައިގެން ދުނިޔެ އަށް ބޮޑުތަނުން ރާއްޖެ އިޝްތިހާރުކޮށް "އެކްސްޕޯޝާ" ލިބިފައިވާ ކަމަށެވެ.
"މި އަހަރު އަޅުގަނޑުމެން މަސައްކަތް ކުރިން ޕީއާރު ބޭނުން ކުރެވޭ ހުރިހާކަމެއް ކުރެވޭ ތޯ. މައިކެއް / ކެމެރާއެއް އަޅުގަނޑުމެންނަށް ކުރިމަތިކޮށްލައިފިނަމަ އުފަލާއެކު ކުރިމައްޗަށް އަރަން. އިންޑަސްޓްރީގެ ހުރިހާ ޕާޓްނަރުންވެސް އެގޮތުގައި މަސައްކަތް ކުރެއްވީ،" މައުސޫމް ވިދާޅުވި އެވެ.
ވެކްސިން ވިޔަފާރިއަށް ޖެހުމުގެ ވިސްނުމެއް ނެތް
މިނިސްޓަރު މައުސޫމް ވިދާޅުވީ ވެކްސިން ޓޫރިޒަމް ޝެޑިއުލް އަށް ފެށިގެންދާނެ ކަމަށެވެ. އަދި ވެކްސިން ޓޫރިޒަމްގައި އެކަމަކީ ވިޔަފާރިއެއްގެ ގޮތުގައި ނުބަލާނެ ކަމަށެވެ.
"އޭރުވެސް މިހާރު ވެސް ބުނަމުން މި ގެންދަނީ ވެކްސިން ޓޫރިޒަމް ސްޓާޓް ކުރާނީ ދިވެހިރާއްޖޭގެ ހުރިހާ މީހުންނަށް ވެކްސިން ޖަހައި ނިންމާފައޭ،" މައުސޫމް ވިދާޅުވި އެވެ.
އިތުރަށް ވިދާޅުވީ ވެކްސިން ޓޫރިޒަމް ތައާރަފު ކުރާއިރު ރާއްޖެ އަންނަ "ރިޓަޔަޑް" ނުވަތަ "ޕެންޝަނިޔާސް" އަށް އިސްކަން ދެއްވާނެ ކަމަށެވެ.
"މިއީ ރާއްޖެ އަށް މި ދަތި ވަގުތުގައި ވެސް ރާއްޖެ އައިދިނީތީ ޝުކުރިއްޔާއޭ ބުނެލަން ވެގެން ފަށާ ޕްރޮގްރާމެއް،" ޑރ، މައުސޫމް ވިދާޅުވި އެވެ.
މި [ވެކްސިން ޓޫރިޒަމް] އަކީ ރާއްޖެ އަށް މި ދަތި ވަގުތުގައި ވެސް ރާއްޖެ އައިދިނީތީ ޝުކުރިއްޔާއޭ ބުނެލަން ވެގެން ފަށާ ޕްރޮގްރާމެއްޑރ. އަބްދުﷲ މައުސޫމް | ޓޫރިޒަމް މިނިސްޓަރު
ޓޫރިޒަމް ސިނާއަތުގައި އިސް މަގާމުތަކެއްވެސް ފުރުއްވި ޓޫރިޒަމް މިނިސްޓަރު މައުސޫމް ވިދާޅުވީ ޓޫރިޒަމް ސިނާއަތުގެ 80 ޕަސެންޓް މީހުންނަށް މިހާރު ވެކްސިންދެ ދެވަނަ ޑޯޒް ޖެހިފައިވާ ކަމަށެވެ.
"އަޅުގަނޑަަށް މައުލޫމާތު ލިބޭ ގޮތުގައި އޮގަސްޓް މަހު ދިވެހިރާއްޖޭގެ ބޮޑު ބަޔަކަށް ވެކްސިން ޖަހައި ނިންމާލާނެ. އަޅުގަނޑުމެން ބުނަމުން ދިޔައީ ތިން ވަނަ ކުއާޓަރު ނުވަތަ ހަތަރު ވަނަ ކުއާޓަރުގައޭ ވެކްސިން ޓޫރިޒަމް ފެށޭނީ. މިހާރު ވެކްސިން ލިބުމުގައި އެއްވެސް ތާއްޓެއް ނެތް،" މައުސޫމް ވިދާޅުވި އެވެ.