ޕީއެސްޖީން ޔުވެންޓަސްގެ ތަރި ކްރިސްޓިއާނޯ ރޮނާލްޑޯ އެޓީމަށް ގެނައުމުގެ މަސައްކަތް ފަށައިފި އެވެ.
މީގެ ކުރިންވެސް ޕީއެސްޖީން ވަނީ އެމްބާޕޭ އެ ކްލަބް ދޫކޮށްފި ނަމަ ރޮނާލްޑޯ އެޓީމަށް ގެންނަން ބޭނުންވާ ކަމުގެ އިޝާރާތްތަކެއް ކޮށްފަ އެވެ. ގިނަ ބައެއްގެ މި ހުވަފެން ހަގީގަތަކަށް ވާނެ ކަމަށް ބެލެވިފައި އޮތީ މީގެ އެއް އަހަރު ފަހުން، ޕީއެސްޖީއާއި އެކު އެމްބާޕޭ ހަދާފައިވާ އެއްބަސްވުމުގެ މުއްދަތު ހަމަވުމުންނެވެ.
ނަމަވެސް މިހާރު މަންޒަރު ބަދަލުވެއްޖެ އެވެ. ރެއާލް މެޑްރިޑުން ވަނީ އެމްބާޕޭ އެޓީމަށް ގެންދިއުމަށް 160 މިލިއަން ޔޫރޯގެ ބިޑެއް ހުށަހަޅާފަ އެވެ. އަދި 2017 ވަނަ އަހަރު އެމްބާޕޭ ޕީއެސްޖީއާއި ގުޅުނު އިރު އެޓީމުން ވަނީ ރެއާލް އިން އޭނާ ބޭނުންވެއްޖެ ނަމަ އެކަމާއި މެދު ރެއާލް އާއި މަޝްވަރާ ކުރާނެ ކަމަށް ވައުދުވެފަ އެވެ. މިހާރު އެވަގުތު އައިސް މިއޮތީ ޖެހިފަ އެވެ. ރެއާލް އަށް ބަދަލުވުމަކީ އެމްބާޕޭ ދެކެމުން އަންނަ ވަރަށް ބޮޑު ހުވަފެނެކެވެ.
އަނެއްކޮޅުން ޕީއެސްޖީން އޭނާގެ ކޮންޓްރެކްޓް އާކުރުމަށް ތިން ފަހަރެއްގެ މަތިން މަސައްކަތް ކުރި ނަމަވެސް އެމްބާޕޭ ވަނީ އެކަމަށް އިންކާރު ކޮށްފަ އެވެ. އަދި 2017 ވަނަ އަހަރު ޕީއެސްޖީން އެމްބާޕޭއަށްވީ ވައުދު އޭނާ ވަނީ ކްލަބަށް ހަނދާން ކޮށްދީފަ އެވެ.
މިއާއި އެކު ޕީއެސްޖީ އޯނަރުގެ ބޭބެ ހާލިދް ބިން ހައްމާދު ބިން ހަލީފާ އަލް-ތާނީ ވަނީ ރޮނާލްޑޯއާ މެސީ ޕީއެސްޖީގެ ޖާޒީގައި އިން ފޮޓޯއެއް ޓްވީޓް ކޮށްފަ އެވެ. އަދި ފޮޓޯގެ ކެޕްޝަންގައި އެކި ބަސްބަހުން "މޭބީ؟" ޖެހުމަށްފަހު މިއީ ފަހަރުގައި ވެދާނެ ކަމެއް ކަމުގެ ސިގްނަލެއް އޭނާ ވަނީ ދީފަ އެވެ.
އެ ޓްވީޓް ކުރިތާ މާ ގިނައިރެއް ނުވަނީސް ޔުވެންޓަސް ހިންގަމުން އަންނަ އަގްނެލީ އާއިލާގެ މެމްބަރު ލަޕޯ އެލްކަން އެޓްވީޓަށް ރައްދު ދިނެވެ. ރައްދުދީ ކުރި ޓްވީޓުގައި އެލްކަނީ ބުނީ ރޮނާލްޑޯ އަކީ ޔުވެންޓަސްގެ ކުޅުންތެރިއެއް ކަމަށާއި، އެހެން ޓީމު ތަކުގެ ޖާޒީގައި އޭނާގެ ފޮޓޯތައް އާންމު ކުރުމަކީ ބަލައިގަނެވޭނެ ކަމެއް ނޫން ކަމަށެވެ. އަދި ރޮނާލްޑޯ ޓީމު ބަދަލުކޮށްފި ނަމަ އެޓީމަކަށް އިހްތިރާމް ކުރާނެ ކަމަށެވެ. ރައްދުގައި ވެސް ރޮނާލްޑޯ ޕީއެސްޖީއަށް ބަދަލު ނުވާނެ ކަމަށް އެލްކަން ނުބުނެ އެވެ.
އެލްކަންގެ މި ރައްދާއި އެކު ހާލިދް ބިން ހައްމާދު ބިން ހަލީފާ އަލް-ތާނީ ވަނީ އެހެން ޓްވީޓެއް ކޮށްފަ އެވެ. އެ ޓްވީޓުގައި ރެއާލްގެ ވިނީޝިއަސް ޖޫނިއާގެ ފޮޓޯ އަކާއި އެކު "ލުކް އެޓް ޔުއާ ފޯން" މިހެން ޖަހައި އޭނާ ވަނީ ޓްވީޓް ކޮށްފަ އެވެ.
އެހެންކަމުން ރޮނާލްޑޯ ޕީއެސްޖީއަށް ނުގެންދެވިއްޖެ ނަމަ އެމްބާޕޭގެ ބަދަލުގައި ރެއާލްގެ ވިނީޝިއަސް ޕީއެސްޖީއަށްދޭ ގޮތަށް އެމްބާޕޭ-ރެއާލް ޑީލް ނިމުނަކީ ވެސް އެކަށީގެންވާ ކަމެކެވެ.
މި ސްވެޕް ޑީލް ހެދުމަށް، ނުވަތަ އެމްބާޕޭ ވިއްކާލައި ރޮނާލްޑޯ ޕީއެސްޖީއަށް ގެނައުމަށް އޮތީ ބަކީ ހަ ދުވަހެވެ. އެއީ މިފަހަރުގެ ޓްރާންސްފާ މާކެޓުގެ ދޮރު އޯގަސްޓް މަހުގެ ނިޔަލަށް ހަަމަވާނެތީ އެވެ.