ޓީވީ އަދި ފިލްމު އެކްޓަރު ސިދާރްތު ޝުކްލާގެ ކުއްލި މަރާ ގުޅިގެން އޭނާ އާ ގުޅޭ ތަފާތު ޚަބަރުތައް އިންޑިއާގެ މީޑީއާތަކުން ދަނީ ފެތުރެމުންނެވެ. މިފަދަ އެއް ޚަބަރެއް ބުނާ ގޮތުގައި ސިދާރްތު މަރުވިއިރު އޭނާގެ ލޯބިވެރިޔާ ޝެހެނާޒް ގިލް އާ ކައިވެނި ކުރަން ދިޔައީ ތައްޔާރުވަމުންނެވެ. ޑިސެމްބަރު މަހު ކައިވެނި ކުރުމަށްޓަކައި ހޯލެއް ބުކް ކުރަން ވެސް އެމީހުން ޕްލޭން ކޮށްފައިވާ ކަމަށް މި ޚަބަރުގައި ބުނެފައި ވެއެވެ.
ޝެހެނާޒް އާއި ސިދާރްތު އަކީ މަޝްހޫރު ރިއަލިޓީ ޝޯ "ބިގް ބޮސް"ގެ އެންމެ ފަހު ސީޒަންގެ ދެ ބައިވެރިންނެވެ. މި ސީޒަން ކާމިޔާބުކުރީ ސިދާރްތު އެވެ. ބިގް ބޮސްގެ ގޭގައި ތިބި ދުވަސްވަރު ޝެހެނާޒް އާއި ސިދާރްތުގެ ގާތް ގުޅުން ޝޯ ބެލި ގިނަ ބަޔަކަށް ވަނީ ފާހަގަ ކުރެވިފަ އެވެ. ނަމަވެސް އެމީހުން ރައްޓެހިވެގެން އުޅޭކަމަށް މީޑިއާގައި އެމީހުން އެއްބަހެއް ނުވެ އެވެ. އަބަދުވެސް ބުނެފައިވަނީ އެމީހުންނަކީ ވަރަށް ގާތް ދެ އެކުވެރިން ކަމަށެވެ.
ބިގް ބޮސްގެ އެހެން ބައިވެރިއެއް ކަމަށްވާ އަބޫ މަލިކް ބުނި ގޮތުގައި ސިދާރްތު އާ ކައިވެނިކުރަން ބޮޑަށް ބޭނުންވެގެން އުޅެނީ ޝެހެނާޒް އެވެ. އަދި ސިދާރްތު ކައިރީގައި އޭނާ އާ ކައިވެނިކުރަންވީ ނޫންހޭ އަހަން ވެސް ޝެހެނާޒް އެދުނު ކަމަށް އަބޫ މަލިކް ބުންޏެވެ.
ފަހުން ޝެހެނާޒް އާ ކައިވެނިކުރަން ސިދާރްތުވެސް އެއްބަސްވެ ކައިވެނީގެ ތައްޔާރީތައް ވާން ފަށާފައިވާ ކަމަށް އެމީހުންގެ ގާތް އެކުވެރިން ބުނެފައި ވެއެވެ. ނަމަވެސް މިކަން ބާއްވާފައިއޮތީ ސިއްރެއްގެ ގޮތުގައި ކަމަށް ވެއެވެ.
ސިދާރްތުގެ މަރުން ޓީވީ އާއި ފިލްމީ ދާއިރާގައި މަސައްކަތްކުރާ ގިނަ ޒުވާނުން ތަކަކަށް ވަނީ ޝޮކެއް ލިބިފަ އެވެ. ހީވެސް ނުކުރާ ކަހަލަ ގޮތަކަށް އެހާ ޒުވާން، ހަށިގަނޑު ވަރުގަދަކޮށް ހުރި މީހަކު ހާޓް އެޓޭކެއް ޖެހިގެން މަރުވީމަ އެވެ. ޚާއްސަކޮށް ސިދާރްތުގެ ކުއްލި މަރުން ޝެހެނާޒް އަށް ވަނީ ބަޔާން ވެސް ނުކުރެވޭވަރުގެ ބޮޑު ހިތާމައެއް ކުރިމަތިވެފަ އެވެ.
ސިދާރްތުގެ ޖަނާޒާގައި ވެސް ޝެހެނާޒް ދެ ފަހަރަށް އަނބުރައިގަތް ކަމަށް އިންޑީއާގެ ނޫސްތަކުން ރިޕޯޓު ކޮށްފައި ވެއެވެ.