ބޮލީވުޑްގައި އަލަށް ފިޔަޖަހަމުން ދިޔަ ތަރިއެއް ކަމަށްވާ ދިވްޔާ ބާރްތީގެ ކުއްލި މަރުމުން ހިންދީ ފިލްމަށް ލޯބިކުރާ އެތައް ބަޔަކަށް ބޮޑު ޝޮކެއް ލިބުނެވެ. ދިވްޔާ ދުނިޔޭގައި ހުރިނަމަ އިއްޔެ (5 އޭޕްރީލް) އަކީ އޭނާގެ 48 ވަނަ އުފަން ދުވަސް ފާހަގަ ކުރާނެ ދުވަހެވެ. އުމުރުން އެންމެ 19 އަހަރުގައި 1993 ގައި ދިވްޔާ މަރުވީ އޭނާ ދިރިއުޅޭ ފަސް ވަނަބުރީގައި ހުންނަ ފްލެޓްގެ ކުޑަ ދޮރަކުން ވެއްޓިގެންނެވެ.
ދިވްޔާގެ މަރުވި ގޮތް މިހާތަނަށް ވެސް އެނގިފައި ނުވާއިރު އޭނާގެ މަރުގައި ފޮރުވިފައިވާ ސިއްރުތަކެއް ވާކަމަށް މިހާތަނަށް ވެސް ގިނަ ބަޔަކު ބުނަމުން ދެއެވެ. ނަމަވެސް އޭނާ މަރުވީ އެކްސިޑެންޓަކުންނޭ ބުނެ އެ ވާހަކަ އޮއްބާލުމަކީ މިކަމުގައި އޮތް އެންމެ ރައްކާތެރި ގޮތްކަން ގަބޫލުކުރާ މީހުން ވެސް މަދެއް ނޫނެވެ.
މުމްބައިގައި ދިވްޔާ ދިރިއުޅެމުންދިޔައީ ފިރިމީހާ ސާޖިދު ނަދިއަދްވާލާއާ އެކުގަ އެވެ. އެމީހުން ދިރިއުޅޭ އެޕާޓްމަންޓް ހުންނަނީ ބިލްޑިންގްގެ ފަސް ވަނަ ބުރީގަ އެވެ.
ދިވްޔާ މަރުވި ދުވަހު އޭނާ ފިލްމު ޝޫޓިންގް އެއްގައި އެހެން ރަށެއްގައި އުޅެފައި އެނބުރި އައިސް އަނެއް ދުވަހު އަނެއްކާވެސް އޮތީ "އަންޑޯލަން" ކިޔާ ފިލްމެއްގެ ޝޫޓިންގް އަށް ފުރާށެވެ. އޭނާ ކުޑަދޮރުން ވެއްޓުނު ވަގުތު އެ ގޭގައި މަޝްހޫރު ފެޝަން ޑިޒައިނަރު ނީތާ ލުއްލާ ވެސް ހުއްޓެވެ. ދިވްޔާގެ އާ ފިލްމަށް ބޭނުންވާ ހެދުންތައް ހެޔޮވަރު ކުރަން ގޮހެވެ.
ދިވްޔާ ވެއްޓުނު ވަގުތު ނީތާ އާއި އޭނާގެ ފިރިމީހާ ޝާމް ތިބީ ޓީވީ ބަލާށެވެ. ދިވްޔާގެ ހައުސް މެއިޑް އުޅެނީ މެހެމާނުންނަށް ކާ އެއްޗެއް ތައްޔާރު ކުރާށެވެ. މިގޮތަށް އުޅެމުން ގޮސް ކުއްލިއަކަށް ދިވްޔާ ގޮސް ކުޑަދޮރުމައްޗަށް އަރާ އިށީނީ އެވެ. އަދި ކުއްލިއަކަށް އެނބުރިލިތާ ބެލެންސް ގެއްލިގެން ބޭރަށް ވެއްޓުނީ އެވެ. އެމްބިއުލެންސްގައި ޕެރަމެޑިކްސް އައިސް ޗެކް ކުރިއިރު ވެސް ދިވްޔާގެ ފުރާނައެއް ނެތެވެ.
ދިވްޔާގެ މަރާ އެކު މި މަރުގައި ފޮރުވިފައިވާ އެތައް ސިއްރުތަކެއް ވާކަމުގެ ވާހަކަތައް އެ ދުވަސްވަރު ދެކެވިފައި ވެއެވެ. އެއް ބަޔަކު ބުނަނީ ބަޔަކު ދިވްޔާ މަރާލީ ކަމަށެވެ. އަނެއް ބަޔަކު ބުނަނީ ގަސްތުގައި މަރުވީ ކަމަށެވެ.
ދިވްޔާ މަރުވި ދުވަސްވަރަކީ ފިލްމުތަކަށާއި ފިލްމީ ތަރިންނަށް ގޭންގްތަކުގެ މީހުން ޚަރަދުކުރާ ކަމުގެ އަޑުތައް ވަރަށް ގަދަވެފައި އޮތް ދުވަސްވަރެކެވެ. އެހެންކަމުން މިއީ ގޭންގެއްގެ ބަޔަކު ކުރި ކަމެއް ކަމަށް ވެސް އަޑު ފެތުރުނެވެ.
ދިވްޔާގެ ފިރިމީހާ ސާޖިދު އަށް ވެސް ބަޔަކު ތުހުމަތުގެ އިނގިލި ދިއްކުރި އެވެ. ނަމަވެސް ދިވްޔާގެ ބައްޕަ އެ ދުވަސްވަރު ބަޔާނެއް ނެރި އެންމެންގެ އަނގަ ބައްދާލީ އެވެ. ދިވްޔާގެ ބައްޕަ ބުނެފައި ވަނީ ދިވްޔާ ވެއްޓުނުއިރު އޭނާ ހުރީ ވަރަށް ގަދަޔަށް ރާބޮއި މަސްތު ވެގެން ކަމަށެވެ. އެހެންވެ ކުޑަދޮރު މައްޗަށް އަރާ އީށީނުމުން ވަރަށް ފަސޭހައިން ބެލެންސް ކަޓަން މެދުވެރިވީ ކަމަށެވެ. އޭނާގެ މަރަކީ އަމިއްލައަށް އަދި މީހަކު ކުރި ކަމެއް ވެސް ނޫން ކަމަށް ދިވްޔާގެ ބައްޕަ ބުނެފައި ވެއެވެ.
އަދި ދިވްޔާ ޑިޕްރެސްވެގެން ނޫޅޭ ކަމަށާއި އޭނާއަކީ އެހެން މީހުންނަށް ޑިޕްރެޝަނާ ކުރިމަތި ކުރުވާ ޒާތުގެ މީހެއް ކަމަށް ދިވްޔާގެ ބައްޕަ ބުނެފައި ވެއެވެ.
ދިވްޔާ ދިރިއުޅޭ ބިލްޑިންގްގެ އެހެން ހުރިހާ ފްލެޓެއްގެ ކުޑަ ދޮރުގައި ގްރިލްސް ޖަހާފައި ހުއްޓެވެ. ގްރިލްސް ނެތީ ހަމައެކަނި އެ އެޕާޓްމަންޓްގަ އެވެ. އަދި އޭނާ ވެއްޓުނު ދިމާލުން ތިރީގައި އާއްމުކޮށް ކާރުތައް ޕާކް ކޮށްފައި ހުރެ އެވެ. ނަމަވެސް އެ ދުވަހަކު އެތާނގައި އެންމެ ކާރެއް ވެސް ނެތެވެ. ދިވްޔާ މަރުވީ އެކްސިޑެންޓަކުން ކަމަށް ގަބޫލުކުރާ މީހުންނަށް މިއީ ވެސް އިއްތިފާގެއް ކަމަށް ގަބޫލު ކުރެވިދާނެ އެވެ. ނަމަވެސް އެކަން ގަބޫލު ނުކުރާ މީހުން ބުނަނީ މިއީ ދުރާލާ ރާވައިގެން ކޮށްފައި ހުރި ކަންކަން ކަމަށެވެ.
ދިވްޔާގެ ކުރު ފިލްމީ ކެރިއަރުގައި ރީތި ފިލްމުތަކެއް ކުޅެފައި ވެއެވެ. އޭގެ ތެރޭގައި ގޯވިންދާއާއެކު ކުޅުނު "ޝޯލާ އައުރު ޝަބްނަމް"، "ވިޝްވާތުމާ" އަދި ޝާހްރުކް ޚާނާއި ރިޝީ ކަޕޫރާއެކު ކުޅުނު "ދީވާނާ" ފާހަގަ ކޮށްލެވެ އެވެ.
އޭނާ މަރުވިއިރު ކުޅެން ފަށާފައިވާ ފިލްމުތަކުގެ ތެރެއިން އަނިލް ކަޕޫރުގެ "ލާޑްލާ"ގައި ދިވްޔާ ކުޅެމުންދިޔަ ރޯލު ފަހުން ކުޅުނީ ޝްރީދޭވީ އެވެ. އަދި "ދިލްވާލޭ"ގައި އޭނާ ކުޅުނު ބައި ފަހުން ކުޅުނި ރަވީނާ ޓަންޑަން އެވެ.
އަކްޝޭ ކުމާރާއެކު ކުޅެމުންދިޔަ "މޮހޮރާ" ވެސް ރަވީނާ އަށް ލިބުނުއިރު އަޖޭ ދޭވްގަންގެ "ވިޖޭޕަތު" ކުޅުނީ ތައްބޫ އެވެ.