ރާއްޖެ އަށް އެންމެ ފުރަތަމަ ޓޫރިސްޓުން އައި އެއް ގައުމު ކަމަށްވާ އިނގިރޭސިވިލާތް 13 އަހަރަށްފަހު ޓޫރިޒަމްގެ އެއްވަނަ މަގާމަށް އަނެއްކާ ވެސް އަރައިފި އެވެ.
ޓޫރިޒަމް މިނިސްޓްރީގެ ޓޫރިޒަމް މިނިސްޓްރީން މިމަހުގެ ހަ ވަނަ ދުވަހުގެ ނިޔަލަށް އާއްމުކުރި ތަފާސް ހިސާބުތައް ދައްކާ ގޮތުގައި ރާއްޖޭގެ އެއްވަނަ ޓޫރިޒަމް މާކެޓުގެ ގޮތުގައި މިހާރު އޮތީ ޔޫކޭ އެވެ. ޔޫކޭ އިން މި މަހުގެ ހަތް ވަނަ ދުވަހާ ހަމަ އަށް 58,608 ޓޫރިސްޓުން އައިސްފައިވެ އެވެ. މިހާރު ޔޫކޭ އިން ރާއްޖޭގެ ޓޫރިޒަމްގެ 12 ޕަސެންޓް ހިއްސާ ކުރެ އެވެ.
އެ ގައުމުން އަންނަ ޓޫރިސްޓުންގެ އަދަދު އިތުރުވި މައިގަނޑު އެއް ސަބަބަކީ ބްރިޓިޝް އެއާވޭސް އިން ސީދާ ރާއްޖެ އަށް ކުރަމުންދާ ދަތުރުތަކާއި އެހެނިހެން އެއާލައިން ތަކުން ޔޫކޭ ކަރެކްޝަން އިން އަންނަ ޓޫރިސްޓުން އިތުރުވުމެވެ.
ޓޫރިޒަމް މިނިސްޓްރީގެ ތަފާސް ހިސާބުތައް ދައްކާ ގޮތުން އިނގިރޭސިވިލާތް ރާއްޖޭގެ ޓޫރިޒަމްގެ އެއްވަނަ މަގާމުގައި އެންމެ ފަހުން އޮތީ 2009 ވަނަ އަހަރު އެވެ. އެ އަހަރު ޔޫކޭ އިން އައިސްފައިވަނީ 116,821 ޓޫރިސްޓުންނެވެ. އަދި އެ އަހަރު ދެވަނަ އަށް އެންމެ ގިނައިން ޓޫރިސްޓުން އައިސްފައިވާ އިޓަލީވިލާތުން 103,823 ޓޫރިސްޓުން އައިސްފައިވެ އެވެ.
އެންމެ ފަހުން ޔޫކޭ އިން އެންމެ ގިނައިން ޓޫރިސްޓުން އައިސްފައިވަނީ ޓޫރިޒަމްގެ ރެކޯޑެއް ގާއިމް ކުރި 2019 ވަނަ އަހަރު އެވެ. އެ އަހަރު ޓޫރިޒަމްގެ ތިން ވަނާގައި އޮތް ޔޫކޭ އިން 126,199 ޓޫރިސްޓުން ރާއްޖެއަށް ޒިޔާރަތް ކުރި އެވެ.
ޔޫކޭ މާކެޓާއި އިތުރުވި ސަބަބު
- ރާއްޖޭގެ އެންމެ ދުވަސްވީ އެއް މާކެޓު
- އެންމެ ފުރަތަމަ ހުޅުވި ރިސޯޓުތަކުގައި ޔޫކޭ މަގުބޫލު
- ބްރިޓިޝް އެއާވޭސްގެ ސީދާ ދަތުުރުތަކެއް ރާއްޖެއަށް ކުރޭ
- އެހެން އެއާލައިންތަކުގެ ޔޫކޭ ކަނެކްޝަން ރާއްޖެއަށް ގިނަ
- އެންމެ ފަހުން އެއްވަނަ އަށް އެރީ 2009 ގައި
- 2009 ގައި 116,821 ޔޫކޭ މީހުން އައި
ވޭތުވެދިޔަ 13 އަހަރަށް ބަލާއިރު ޓޫރިޒަމްގެ އެއްވަނާގައި އޮތީ ރާއްޖޭގެ ޓޫރިޒަމްގެ ގަދަ 10 ގައި އަބަދު ވެސް ހިމެނޭ ގައުމު ތަކެވެ. އެގޮތުން 2010 އަކުން ފެށިގެން 2019 އާ ހަމައަށް ޗައިނާ ރާއްޖޭގެ ޓޫރިޒަމްގެ ލީޑް ކުރި އެވެ. އަދި އޭގެ ފަހުން ޓޫރިޒަމަށް އެންމެ ބޮޑު ބަދަލެއް އައިސްފައިވަނީ ކޮވިޑް-19 އާ ގުޅިގެން ބޯޑަރުތައް ބަންދު ކުރުމުންނެވެ.
މި ބަންދު ކުރުމާއެކު ރާއްޖެ އާއި އިންޑިއާ އިން ހެދި ޓްރެވަލް ބަބަލްގެ ބޭނުންކޮށް ކަރަންޓީން ގިނަ އަދަދެއްގެ ޓޫރިސްޓުން ރާއްޖެ އައިސްފައިވެ އެވެ. އެހެންވެ ޓޫރިޒަމްގެ އެއްވަނަ ގައުމުގެ ގޮތުގައި 2020 ވަނަ އަހަރު އޮތީ އިންޑިޔާ އެވެ.
ޓޫރިޒަމް މިނިސްޓްރީން މިމަހުގެ ހަތް ވަނަ ދުވަހާ ހަމައަށް ނެރުނު ތަފާސް ހިސާބުތައް ދައްކާ ގޮތުން ރާއްޖޭގެ ދެވަނަ މާކެޓުގެ ގޮތުގައި އޮތީ ކުރިން އެއްވަނަ މާކެޓުގެ ގޮތުގައި އޮތް ރަޝިއާ އެވެ. އެ ގައުމުން 53,010 ޓޫރިސްޓުން އައިސްފައިވެ އެވެ. އަދި ތިން ވަނާގައި އޮތީ 50,242 ޓޫރިސްޓުންނާއެކު އިންޑިއާ އެވެ.