ދައުލަތުގެ އެންމެހާ އިދާރާތަކުން ރާއްޖެ އާއި ރާއްޖެއިން ބޭރަށް ކުރާ ދަތުރުތަކުގެ ކަންކަން ގައުމީ އެއާލައިން މޯލްޑިވިއަން މެދުވެރިކޮށް ނޫން ގޮތަކަށް ނުކުރުމަށް ފިނޭންސް މިނިސްޓްރީ އިން ހުރިހާ އޮފީހަކަށް އަންގައިފި އެވެ.
ފިނޭންސް މިނިސްޓަރު އަބްދުﷲ ޖިހާދު ސޮއި ކުރައްވާ މިދިޔަ ހޯމަ ދުވަހު ނެރުއްވި ސާކިއުލާއެއްގައި ބުނެފައިވާ ގޮތުގައި ދައުލަތުގެ އެއްވެސް އިދާރާއަކުން ވައިގެ މަގުން ރާއްޖެ އާއި ރާއްޖެއިން ބޭރުގެ ގައުމުތަކަށް ދަތުރު ކުރުމުގެ ކަންކަން މީގެ ފަހުން ހަމަޖައްސަން ޖެހޭނީ ގައުމީ އެއާލައިން ހިންގާ ކުންފުނި އައިލެންޑް އޭވިއޭޝަން (އައިއޭއެސް)ގެ، ޓްރެވަލް ޑިވިޝަން، "މޯލްޑިވިއަން ހޮލިޑޭ" މެދުވެރިކޮށް ކަމަށެވެ. އެގޮތަށް ހަމަޖައްސަނީ ފިނޭންސުން ބުނި ގޮތުގައި ދައުލަތުގެ އިދާރާތަކުން ކުރާ ދަތުރުފަތުރުގެ ކަންކަން ހަރުދަނާ ކުރުމުގެ ގޮތުންނެވެ.
މޯލްޑިވިއަން އިން ދަތުރުތައް ހަމަޖެއްސުމުގައި 15 މީހުންނަށް ވުރެ މަދުން ދަތުރު ކުރާ ނަމަ، ހަތް ދުވަސް ކުރިން މޯލްޑިވިއަން ހޮލިޑޭޒްއަށް ބުކިންސް ހަދަން ފޮނުވަން ޖެހެ އެވެ. އަދި އެއަށް ވުރެ ގިނަ މީހުން ނަމަ، 14 ދުވަހުގެ ކުރިން އަންގަން ޖެހެ އެވެ.
މީގެ ކުރިން ސަރުކާރުގެ އޮފީސްތަކުން ރާއްޖެއިން ބޭރަށް ދަތުރުތައް ކުރަނީ އެކި އެއާލައިންތައް މެދުވެރިކޮށެވެ.
ގައުމީ އެއާލައިން، މޯލްޑިވިއަން.