ދިރިތިބި ދެމަފިރިން ކައިރީގައި އެމީހުން މަރުވެއްޖެ ކަމަށް ބެންކަކުން ބުނެފި އެވެ. މިއީ ބިރުވެރި ފިލްމެއްގެ ވާހަކައެއް ފަދަ ވާހަކަ އެކެވެ. އެމީހުން ކައިރީގައި އެމީހުން މަރުވެފައިވާ ކަމަށް ބުނުމުން ދެމަފިރިންނަށް ވަރަށް ބޮޑު ޝޮކެއް ވަނީ ލިބިފަ އެވެ.
ބެން ގިބްސަން، 63، ކައިރީގައި އޭނާގެ އަންހެނުން ގިލް، 65، މަރުވެފައިވާ ކަމަށް ބެންކުގެ މުވައްޒަފަކު ބުނިއިރު އެމީހުންގެ ގޭގެ ސިޓިންރޫމް ސޯފާއެއްގައި ގިލް އިނެވެ.
"ބެންކަށް އަހަރެން ގުޅުމުން އެ ތަނުގެ ސްޓާފަކު އަހަރެން ކައިރީ ބުނި "އެކްސްކިއުޒް މީ ސާ އޭ. ކަލޭގެ އަންހެނުން މަރުވެފައޭ ވަނީ. އަހަރެން ބުނިން ނޫނެކޭ އޭނަ އެބަ އިނޭ ކުރިމަތިން ހުރި ކޮޓަރީގަ. ބޭނުންހޭ އޭނާ އާ ވާހަކަ ދައްކަން،" ބެން ކިޔައިދިނެވެ.
ހަމަ އެމަހުގެ ފަހުކޮޅު ބެން ބޭރުގައި އުޅެފައި ގެޔަށް އައިސް ވަންއިރު އޭނާގެ އަންހެނުން އިނީ ރޯށެވެ. އެއީ އޭނާގެ ފިރިމީހާ މަރުވެފައިވާ ކަމަށް ބުނެ ބެންކުން ފޮނުވި ތައުޒިޔާގެ ނޯޓެއް ކިޔާފަ އެވެ.
އިންގްލެންޑްގެ ސްޓްރެޓްފޯޑް-އަޕޯން-އޭވޮންގައި ދިރިއުޅޭ މި ދެމަފިރިން އެންމެ ފަހުން ބެންކަށް ގުޅައިގެން އެތަނުގެ މުވައްޒަފަކާ ވާހަކަ ދައްކައި އެމީހުން މަރުވީތޯ ދިރި ތިބިތޯ ސާފުކޮށްފައި ވެއެވެ. އެ މީހުން މަރުވެފައިވާ ކަމަށް ބުނެ ބެންކުން ބަންދުކުރި އެކައުންޓްތައް ވެސް އަދި މި ވަރުން ވެސް އަލުން ހުޅުވޭ ގޮތެއް ނުވި އެވެ.
ބެން ބުނި ގޮތުގައި މިއީ ބިރުވެރި ގޮތަކަށް ދިމާވި ކަމެކެވެ. އަދި ހިތްދަތި ތަޖުރިބާ އެކެވެ. އެމީހުންގެ ބެންކް އެކައުންޓްތައް ބަންދުކުރިޔަސް އެމީހުންނަށް މާބޮޑު ދަތިކަމެއް ކުރިމަތިނުވީ އެހެން އެކައުންޓެއްގައި ކޮންމެވެސް ވަރަކަށް ފައިސާ ބަހައްޓާފައި ހުރީމަ ކަމަށް ބެން ބުންޏެވެ. އަދި އެގޮތަށް ފައިސާކޮޅެއް އެހެން ބެންކެއްގައި ނުބަހައްޓާ ހުރިނަމަ އެމީހުންނަށް ޖެހޭނީ ކޮން ހާލެއްކަން ނޭނގޭ ކަމަށް ދުވަސްވީ ދެމަފިރިންގެ ތެރެއިން އަންހެން މީހާ ބުންޏެވެ.
މިއީ ބެންކަށް ހެދުނު ގޯހެއްކަން އެނގި މިހާރު ބެންކުން ވަނީ މި ދެމަފިރިންގެ ކިބައިން މައާފަށް އެދިފަ އެވެ. އަދި މިކަން ވީ ގޮތެއް ތަހުގީގުކުރަމުންދާ ކަމަށް ވެސް ބެންކުން އަންގާފައިވާ ކަމަށް ދެމަފިރިން ބުންޏެވެ.
ބެން އާއި ގިލް