ސިޔާސީ ނުފޫޒެއް ނުފޯރުވޭނޭ ކަމަށް ޕޮލިސް ކޮމިޝަނަރު މަހައްމަދު ހަމީދު ވިދާޅުވެއްޖެ އެވެ.
އިސްކަންދަރު ކޮށީގައި މިއަދު ކުރިއަށްދިޔަ ނޫސްވެރިންގެ ބައްދަލުވުމުގައި ސީޕީ ހަމީދު ވިދާޅުވީ އެއްވެސް މީހަކަށް އޭނާގެ މައްޗަށް ނުފޫޒު ނުފޯރުވޭނެ ކަމަށެވެ. އަދި ބައެއް މަޖިލިސް މެންބަރުން ސީޕީ ފާހަގަކޮށްފައި އޮންނަނީ ފޯނު ނުނަންނަގާ ބޭފުޅެއްގެ ގޮތުގައި ކަމަށް ވިދާޅުވި އެވެ.
"އަޅުގަނޑަކީ ވަކި މީހަކަށް ފަސޭހަވާނެހެން ކަނޑަ އެޅިފައިވާ ގަވައިދާ ހިލާފަށް ކަމެއް ކޮއްދޭނެ މީހެއް ނޫންކަން އަޅުގަނޑާ އެކީ މަސައްކަތް ކުރާ ބޭފުޅުންނަށް އެނގޭނެ،" ހަމީދު ވިދާޅުވި އެވެ.
ކޮމިޝަނަރެއްގެ ގޮތުގައި ހަތަރު އަހަރު ހޭދަކުރިއިރު އެއްވެސް ފަރާތެއްގެ ނުފޫޒުން އެއްްވެސް ކަމެއް ކުރައްވާފައި ނުވާނެ ކަމަށާ ކުރިއަށް އޮތް ދުވަސްތަކުގައިވެސް ބައެއްގެ ނުފޫޒުގެ ދަށަށް ނުދާނެ ކަމުގައިވެސް ވިދާޅުވި އެވެ.
ސީޕީ ވިދާޅުވީ އޭނާއަށް އެއްވެސް ފަރާތެއްގެ ނުފޫޒު ނެތް ނަމަވެސް ދައުލަތުގެ ބައެއް މުއައްސަސާތަކަށް ނުފޫޒު ފޯރުވުމަށް ބައެއް ފަރާތްތަކުން މަސައްކަތް ކުރާ ކަމަށެވެ. ނުފޫޒުގެ މައްސަލަ ހައްލުކުރެވޭނީ ދައުލަތުގެ މުއައްސަސާތަކުގައި މަސައްކަތް ކުރައްވާ ބޭފުޅުން ގުޅިގެން ކުރާ މަސައްކަތުން ކަމުގައިވެސް ވިދާޅުވި އެވެ.
"ބޮޑެތި ކުށްތަކަށް އަރައިގަންނަ މީހުންނާއި އެކަންކަން ރާވައިގެން ހިންގާ މީހުންނަށް އެކި ގޮތް ގޮތުން ލިބެން އޮންނަ އެންމެ ހަނި ފުރުސަތަކުންވެސް އެ ފަރާތްތަކަށް ފައިދާއެއް ހޯދައިދިނުމުގެ މަސްލަހަތު ދައުލަތުގެ ބައެއް މުއައްސަސާތަކުން ގެންގުޅޭ ކަން ފާހަގަކުރެވޭ،" ހަމީދު ވިދާޅުވި އެވެ.