އަނބިމީހާގެ މަރާ ގުޅިގެން ފުލުހުން ހައްޔަރުކޮށްފައި ހުރި ފިރިމީހާ، އދ. ފެންފުށީ، ރޯޒީ ވިލާ، އަބޫބަކުރު ފައިސަލް ދަންޖެހިގެން ފަރުވާ ދޭން ފަށައިފި އެވެ.
ހދ. ނޮޅިވަރަމް، އުމުރުން 28 އަހަރުގެ ނިޝާމާ މުހައްމަދުގެ މަރާއި ގުޅިގެން ފުލުހުން ހައްޔަރުކޮށްފައި ހުރި ފައިސަލް ދަންޖެހިފައިވަނީ ހދ. ކުޅުދުއްފުށީގައި ފުލުހުންގެ ބެލުމުގެ ދަށުގައި ހުއްޓަ އެވެ.
ފުލުހުން ބުނީ ފައިސަލް ދަންޖެހެން މަސައްކަތް ކުރަނިކޮށް ފެނުނީ ރޭ 11:15 ހާއިރު ކަމަށާއި އޭނާއަށް ކުޅުދުއްފުށީ ރީޖަނަލް ހޮސްޕިޓަލްގައި ފަރުވާ ދެމުންދާ ކަމަށެވެ.
ފައިސަލް ދަންޖެހިފައިވަނީ އޭނާގެ ބަންދަށް ކޯޓުން 15 ދުވަސް ޖަހާފައި ވަނިކޮށެވެ.
ފުލުހުން ފައިސަލް ހައްޔަރުކުރީ އޭނާ އަމިއްލައަށް ފުލުހަށް ހާޒިރުވެ ހަވާލުވުމުންނެވެ.
ނިޝާމާ މަރުވެފައި އޮއްވާ ފެނުނީ މިދިޔަ ހޮނިހިރު ދުވަހު އެވެ. ނިޝާމާގެ ހަށިގަނޑު ޕޯސްޓްމޯޓަމް ހެދުމަށް ފޮނުވުމުގެ މަސައްކަތް ފުލުހުން އަންނަނީ ކުރަމުންނެވެ.
ނިޝާމާ މަރުވެފައި އޮއްވާ ފެނުނު އިރު ހަށިގަނޑުގެ ބޭރު ފުށުން މާބޮޑު އަނިޔާއެއް ފެންނަން ނެތް ކަމަށް އެރަށުން އަވަސް އަށް މައުލޫމާތު ދިން މީހުން ބުނެފައިވެ އެވެ. ނަމަވެސް ނިޝާމާގެ ކަރުގައި އަނިޔާގެ ކޮންމެވެސް ނިޝާނެއް ހުރި ކަމަށް ބައެއް މީހުން ބުނެފައިވެ އެވެ.