ރާއްޖެއަށް މިދިޔަ އަހަރުގެ ނޮވެމްބަރުގެ ނިޔަލަށް ދަތުރުކުރި ފްލައިޓްގެ އަދަދު 2021 ވަނަ އަހަރުގެ އެ މުއްދަތަށްވުރެ 18 ޕަސެންޓް އިތުރުވެއްޖެ އެވެ.
މަރުކަޒީ ބޭންކް -- މޯލްޑިވްސް މަނިޓަރީ އޮތޯރިޓީ (އެމްއެމްއޭ)ގެ ތަފާސްހިސާބުތައް ދައްކާ ގޮތުން މިދިޔަ އަހަރުގެ ޖެނުއަރީ އިން ނޮވެމްބަރުގެ ނިޔަލަށް ރާއްޖެ އައި އިންޓަނޭޝަނަލް ފްލައިޓްގެ އަދަދަކީ 13،707 އެވެ. 2021 ވަނަ އަހަރުގެ އެ މުއްދަތުގައި ރާއްޖެ އައީ 11،355 ފްލައިޓެވެ.
ޝެޑިއުލް ފްލައިޓް އަދި ކާގޯ ފްލައިޓް ހިމެނޭ ގޮތަށް މިދިޔަ އަހަރުގެ ނޮވެމްބަރުގެ ނިޔަލަށް ރާއްޖެއަށް 11،783 ފްލައިޓް ދަތުރުކުރި އެވެ. 2021 ވަނަ އަހަރުގެ އެ މުއްދަތުގައި އެ އަދަދު އުޅެނީ 9،164ގަ އެވެ.
އިންޓަނޭޝަނަލް ފްލައިޓްތަކުގެ ތެރެއިން ޝެޑިއުލް ފްލައިޓްގެ ދަތުރުތައް އިތުރުވި ނަމަވެސް ޗާޓަޑް ފްލައިޓް އަދި ޕްރައިވެޓް ޖެޓްގެ ދަތުރުތައް 2021 ވަނަ އަހަރަށްވުރެ މިދިޔަ އަހަރުގެ އެ މުއްދަތުގައި ހުރީ ދަށުގަ އެވެ.
ޕްރައިވެޓް ޖެޓު އަދި ޗާޓަޑް ފްލައިޓްގެ ގޮތުގައި މިދިޔަ އަހަރުގެ ނޮވެމްބަރުގެ ނިޔަލަށް 1،924 ފްލައިޓް ރާއްޖެ އައެވެ. 2021 ވަނަ އަހަރުގެ އެ މުއްދަތުގައި ޕްރައިވެޓް ޖެޓް އަދި ޗާޓަޑް ފްލައިޓްގެ ގޮތުގައި 2،191 ފްލައިޓް ރާއްޖެ އައެވެ.