ވިޔަފާރިވެރިންގެ ޖަމިއްޔާގެ އޮފީސް ތެރޭގައި މަރާލާފައި އޮއްވާ ފެނު އެ ޖަމިއްޔާގެ ކުރީގެ ސެކްރެޓަރީ އަޒްލީނާ ނަފީސްގެ ގާތިލް -- ހދ. ކުޅުދުއްފުށީ އަބްދުﷲ ޒުހައިރު (48 އ)ގައި މަރުވެފައި އޮއްވާ ފެނިއްޖެ އެވެ.
ޒުހައިރު މަރުވެފައި އޮތީ އޭނާ ދިރިއުޅޭ ކ. ދިއްފުށީ އަތިރިމަތީގައި ޖޯއްޔެއްގަ އެވެ. އެކަމަކު ޒުހައިރު މަރުވި ވަކި ސަބަބެއް އަދި އެނގިފައެއް ނުވެ އެވެ.
މީގެ 21 އަހަރު ކުރިން ހިންގި އަނިޔާވެރި މަރުގައި ހިމެނޭ ގާތިލް ޒުހައިރުގެ މަރުގެ މައްސަލައިގެ ތަހުގީގަށް ފުލުހުންގެ ޓީމެއް މިހާރު ވަނީ ދިއްފުއްޓަށް ގޮސްފަ އެވެ.
އޭޕްރީލް 5، 2001 ގައި އަނިޔާވެރިކަމާ އެކު އަޒްލީނާ މަރާލާފައި އޮތްވައި ފެނުނީ ވިޔަފާރިވެރިންގެ ޖަމިއްޔާގެ އޮފީހުގެ ފާހާނާ ތެރޭގަ އެވެ.
ޒުހައިރުގެ މައްޗަށް އަޒްލީނާ މަރާލިކަމުގެ ދައުވާ ސާބިތުވެ އޭނާ އުމުރަށް ޖަލަށްލާން ހުކުމް ކުރީ 2002 ވަނަ އަހަރު އެވެ. ނަމަވެސް، 2013 ވަނަ އަހަރު މިނިވަންވުމަށްފަހު އޭނާ އަންނަނީ ދިއްފުށީގައި ދިރިއުޅެމުންނެވެ.
އަޒްލީނާ މަރާލުމުގައި ޒުހައިރުއާ ބައިވެރިވިކަމުގެ ކުށް ސާބިތުވެ އިތުރު ދެ މީހަކު ވެސް ޖަލަށް ލާން ހުކުމް ކުރި އެވެ.