މަސްތުވާތަކެތީގެ ވިޔަފާރި ކުރަމުންދާ މީހުންނާއި ގޭންގުތަކާއި ގުޅުން އޮންނަ ކަމަށް ތުހުމަތުކުރެވޭ ސިޔާސީ މީހުންގެ ވަނަވަރު ރައްޔިތުން މަޖިލިހަށް ގެންނަވާނެ ކަމަށް ހޯމް މިނިސްޓަރު އިމްރާން އަބްދުﷲ ވިދާވެއްޖެ އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި އިމްރާން ވިދާޅުވީ ސިޔާސީ ބައެއް ބޭފުޅުންނާއި ވިޔަފާރިވެރިންގެ އިތުރުން މުއައްސަސާތަކުގެ ވެރިން ޑްރަގުގެ ނެޓްވޯކްތަކާއި ގުޅުން އޮންނަ ކަމަށެވެ. އަދި އެމީހުންގެ ނަންތައް މަޖިލީހަށް ހިއްސާ ކުރައްވާނެ ކަމަށްވެސް އިމްރާން ވިދާޅުވި އެވެ.
"ބަލަން ޖެހޭ ކަންކަން ބެލުމަށްފަހު އަޅުގަނޑު މިކަން ގެންނާނަން މަޖިލީހާއި ހަމައަށް. މަޖިލީހުގެ 241 ކޮމިޓީއަށް، މަޖިލީހާއި ހަމައަށް ގެންނާނަން އިރާދަ ކުރެއްވިއްޔާ،" އިމްރާން ވިދާޅުވި އެވެ.
އިމްރާން ވިދާޅުވީ ބަލަން ޖެހޭ ހުރިހާ ކަންކަން ނުނިމެނީސް މިފަދަ ވާހަކަތައް މަޖިލީހުގައި ދެއްކުން އެއީ އެންމެ ރަނގަޅު ގޮތް ނޫން ކަން މެންބަރުންނަށްވެސް އަދި މަނިލީހުގެ ރައީސަށްވެސް އެނގިވަޑައިގަންނަވާނެ ކަމަަށެވެ.
މަސްތުވާތަކެތީގެ ނެޓްވޯކްތަކާއި ގުޅުން ހުންނަ މީހުންގެ ތެރޭގައި ފުލުހުންގެ މީހުންވެސް ހިމެނޭ ކަމަށް އިމްރާން ވިދާޅުވި އެވެ. އަދި އެކަން އެނގޭ ކަމަށްވެސް ވިދާޅުވި އެވެ.
އެފަދަ އެތައް ފުލުހުންނެއް ސީދާ އެމަނިކުފާޏުގެ ސިޔާއިއެކު ކަނޑާލާފައިވާނެ ކަމަށް އިމްރާން ވަނީ ވިދާޅުވެފަ އެވެ. އަދި އެފަދަ މައްސަލަތަކުގައި ވަކި ކުރި ފުލުހުންގެ އަދަދުވެސް ހާމަ ކުރަން ޖެހުމުން ހާމަ ކުރައްވާނެ ކަމަށް އިމްރާން ވިދާޅުވި އެވެ.