މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އަށް މިދިޔަ އަހަރު ލިބުނު ފައިދާއިން ފަސް ރުފިޔާގެ މޫނުމަތީ އަގުގެ ހިއްސާއަކަށް ހަތަރު ރުފިޔާ ބެހުމަށް ކުންފުނީގެ ޑިރެކްޓަރުންގެ ބޯޑުން ނިންމައިފި އެވެ.
އެމްޓީސީސީ އަށް މިދިޔަ އަހަރު ލިބުނު ފައިދާ އިން ހިއްސާއަކަށް ހަތަރު ރުފިޔާ، ޖުމްލަ 32.15 މިލިއަން ރުފިޔާ ބަހާ ގޮތަށް އަހަރީ އާންމު ޖަލްސާއަށް ހުށަހެޅުމަށް ކުންފުނީގެ ޑިރެކްޓަރުންގެ ބޯޑުން ނިންމީ މިމަހުގެ 11 ވަނަ ދުވަހު ބޭއްވި ޑިރެކްޓަރުންގެ ބޯޑުގެ ޖަލްސާގަ އެވެ.
ހިއްސާގެ ފައިދާ ލިބޭނީ މިދިޔަ މަހުގެ 12 ވަނަ ދުވަހުގެ ނިޔަލަށް ކުންފުނީގެ ހިއްސާދާރުންގެ ގޮތުގައި ރަޖިސްޓްރީގައި ހިމެނިފައިވާ ހިއްސާދާރުންނަށް ކަމަށް އެމްޓީސީސީ އިން ވަނީ ބުނެފަ އެވެ.
އެމްޓީސީސީގެ 2022 ވަނަ އަހަރުގެ އަހަރީ އާންމު ޖަލްސާ ބާއްވާނެ ތާރީހެއް އަދި އިއުލާނެއް ނުކުރެ އެވެ.
އެމްޓީސީސީ އިން ބުނި މިދިޔަ އަހަރަކީ އެ ކުންފުނީގެ 42 އަހަރުގެ ތާރީހުގައިވެސް އެންމެ ބޮޑު އާމްދަނީއެއް ލިބުނު އަހަރެވެ.
މާލީ ހިސާބުތައް ދައްކާ ގޮތުން މިދިޔަ އަހަރު އެމްޓީސީސީއަށް އާމްދަނީގެ ގޮތުގައި 2.47 ބިލިއަން ރުފިޔާ ލިބުނެވެ. ހިންގުމުގެ ފައިދާގެ ގޮތުގައި 324.16 މިލިއަން ރުފިޔާ ލިބުނުއިރު ޓެކުހަށް ކެނޑުމުގެ ކުރިން ލިބުނު ފައިދާއަކީ 229.53 މިލިއަން ރުފިޔާ އެވެ.
އެމްޓީސީސީ އިން މިދިޔަ އަހަރު އުމްރާނީ ތަރައްގީގެ އާ 65 މަޝްރޫއުއަކާއި ހަވާލުވެ 42 މަޝްރޫއެއްގެ މަސައްކަތް ވަނީ ކާމިޔާބުކަމާއެކު ނިންމާލާފަ އެވެ.