ޗާގޯސްގެ ސިޔާދަތީ ބާރު ދޭނެ ބައެއް ކަނޑައެޅުމަށް ރާއްޖެއިން ވާހަކަ ދައްކަންވީ އިނގިރޭސިވިލާތާ ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެ އެވެ.
ރައީސް ނަޝީދު މިހެން ވިދާޅުވީ ރައްޔިތުންގެ މަޖިލީހުގެ އެމްޑީޕީގެ މެންބަރުން ތިއްބަވާ ވަޓްސްއެޕް ގްރޫޕަކަށް ފޮނުއްވެވި މެސެޖެއްގަ އެވެ.
ނަޝީދުގެ މެސެޖުގައި ވަނީ ތިން ކަމެއް ފާހަގަކުރައްވާ އެކަންކަމުގައި ރައީސް އިބްރާހީމް މުހައްމަދު ސޯލިހް އާއި މަޖިލީހުގެ މެންބަރުން އިނގިރޭސިވިލާތާއެކު ވަކާލާތުކުރަން ޖެހޭ ކަމަށް ވިދާޅުވެފަ އެވެ.
ޗާގޯސް ހިމެނެނީ ބްރިޓިޝް އިންޑިއަން އޯޝަން ޓެރިޓަރީގައިކަން ފާހަގަކުރައްވާ ނަޝީދު ވިދާޅުވީ ޗާގޯސްގެ ސިޔާދަތީ ބާރު އޮތީ އިނގިރޭސިވިލާތަށް ކަމަށެވެ.
އިނގިރޭސިން އެތަނުން ފައިބާއިރު އެތަން ހަވާލުކުރާނެ އެންމެ ރަނގަޅު ބައެއް ދެނެގަތުމަށް އެ ގައުމާއެކު މަޝްވަރާކުރަންޖެހޭ ކަމަށް ނަޝީދު ވިދާޅުވި އެވެ.
މީގެ އިތުރުން ޗާގޯސްގައި އިނގިރޭސިން ތިބޭއިރު އެ ސަރަހައްދުގެ ކަނޑުގައި މަސްވެރިކަން މަނާކުރުމަށާއި ޗާގޯސްގައި އިނގިރޭސިން ތިބޭއިރު ރާއްޖޭގެ ބޯޑަރު ކުރިންވެސް އޮތް ގޮތަށް ބޭނުންކުރެވޭ ގޮތް ހެދުމަށް މަޝްވަރާކުރަންޖެހޭ ކަމަށް ނަޝީދު ވިދާޅުވި އެވެ.
ރާއްޖެ އާއި މޮރިޝަސްގެ ކަނޑުގެ މައްސަލައިގައި ރާއްޖެއަށް ބޮޑު ބައި ލިބޭ ގޮތަށް އިންޓަނޭޝަނަލް ޓްރައިބިއުނަލް ފޮ ލޯ އޮފް ދަ ސީ (އިޓްލޮސް) އިން މައްސަލަ ނިންމީ އެޕްރީލް 28 ވަނަ ދުވަހު އެވެ.
އިޓްލޮސްގެ ނިންމުމާއެކު ރާއްޖެއަށް 47،232 އަކަ ކިލޯމީޓަރު ލިބޭއިރު މޮރިޝަސްއަށް ލިބެނީ 45،331 އަކަ ކިލޯމީޓަރުގެ ސަރަހައްދެކެވެ.
އިޓްލޮސްގެ ނިންމުމުގެ ސަބަބުން ރާއްޖެއިން ބައެއް ގެއްލިފައިވާ ކަމަށް ނަޝީދު ދަނީ ވިދާޅުވަމުންނެވެ.