ސައިބާ ކްރައިމްގެ 51 މައްސަލަ މިއަހަރުގެ ފުރަތަމަ ތިން މަސް ދުވަހުގެ ތެރޭގައި ފުލުހުންނަށް ހުށަހެޅިއްޖެ އެވެ.
ފުލުހުންގެ އިދާރާ އިން މިއަދު ހާމަކުރި މިއަހަރުގެ ފުރަތަމަ ތިން މަސް ދުވަހުގެ ތަފާސްހިސާބުގައިވާ ގޮތުން ސައިބާ ކްރައިމްގެ މައްސަލަތައް އެންމެ ގިނައިން ހުށަހެޅުނީ ފެބްރުއަރީ މަހު އެވެ.
އެ މަހު ސައިބާ ކްރައިމްގެ 30 މައްސަލަ ހުށަހެޅުނުއިރު ޖެނުއަރީ މަހު 14 މައްސަލަ އަދި މާޗް މަހު ހަތް މައްސަލަ ހުށަހެޅުނެވެ.
ސައިބާ ކްރައިމްގެ ތެރެއިން އެންމެ ގިނައީ ހެކްކުރުމުގެ މައްސަލަތައްކަން ފުލުހުން ފާހަގަކުރެ އެވެ. އެގޮތުން ހެކްކުރުމުގެ 33 މައްސަލަ ހުށަހެޅުނުއިރު ކްރެޑިޓް އަދި ޑެބިޓް ކާޑް ފްރޯޑްގެ 13 މައްސަލަ މިއަހަރުގެ ފުރަތަމަ ތިން މަސް ދުވަހުގެ ތެރޭގައި ހުށަހެޅުނެވެ. އައިޑެންޓިޓީ ތެފްޓްގެ މައްސަލައެއްގެ އިތުރުން ސައިބާކްރައިމްއާ ގުޅޭ އެހެނިހެން ހަތަރު މައްސަލަ ފުލުހުންނަށް ހުށަހެޅުނެވެ.
ސައިބާ ކްރައިމްގެ މައްސަލަތައް ރާއްޖޭގައި ވަރަށް ބޮޑަށް އިތުރުވެފައިވާއިރު އެފަދަ ކުށްތައް ހުއްޓުވޭނެ ގާނޫނެއްނެތެވެ.
ފުލުހުންގެ ތަފާސްހިސާބުތަކަށް ބަލާއިރު މިއަހަރުގެ ފުރަތަމަ ތިން މަސް ދުވަހުގެ ތެރޭގައި ކައުންޓާފީޓް އަދި ފޯޖަރީގެ 34 މައްސަލަ ހުށަހެޅުނެވެ. މީގެ ތެރޭގައި ސައްހަނޫން ލިޔެކިޔުން ހެދުމުގެ 24 މައްސަލަ އާއި ވަގު ޑޮލަރާއި ގުޅޭ ދެ މައްސަލައެއް ހިމެނެ އެވެ.
މީގެ އިތުރުން މިއަހަރުގެ ފުރަތަމަ ތިން މަސް ދުވަހުގެ ތެރޭގައި ބްލެކްމެއިލްގެ 39 މައްސަލައަކާޢި ހިޔާނާތްތެރިވުމުގެ 162 މައްސަލަ ފުލުހުންނަށް ހުށަހެޅިފައިވެ އެވެ.