ވ. ފެލިދޫ ގިރާ ސަރަހައްދު ހިމާޔަތް ކުރުމުގެ މަސައްކަތް އަންނަ މަހު ފެށުމަށް ހަމަޖެހިފައިވާ ކަމަށް ޕްލޭނިން މިނިސްޓަރު މުހައްމަދު އަސްލަމް ވިދާޅުވެއްޖެ އެވެ.
ފެލިދޫ ގިރާ ސަރަހައްދު ހިމާޔަތްކުރުމުގެ މަސައްކަތާއި ގުޅޭ ގޮތުން ދާއިރާގެ މެންބަރު އިބްރާހީމް ފަޒުލް ރަޝީދު ކުރެއްވި ސުވާލަށް ލިޔުމުން ދެއްވި ޖަވާބުގައި މިނިސްޓަރު އަސްލަމް ވިދާޅުވި ގޮތުގައި މަޝްރޫއުގެ މަސައްކަތް ކޮންޓްރެކްޓް ކުރެވުނީ ފެބްރުއަރީ ފުރަތަމަ ދުވަހު އެވެ.
"މިހާރު ކުރިއަށް ދަނީ މި މަޝްރޫއުގެ އީއައިއޭ ހެދުމުގެ މަސައްކަތް،" މިނިސްޓަރު އަސްލަމް ވިދާޅުވި އެވެ.
ސާސް-އީ ކޮންސްޓްރަކްޝަން ޕްރައިވެޓް ލިމިޓެޑާ ކޮންޓްރެކްޓް ކުރެވިފައިވާ މަޝްރޫއުގެ އަގަކީ 33.7 މިލިއަން ރުފިޔާ އެވެ.
މި މަޝްރޫއުގެ މުއްދަތަކީ 450 ދުވަހެވެ.