ވެރިކަން ކުރާ ކޯލިޝަން ރޫޅިފައިވާ ކަމަށް ޖުމްހޫރީ ޕާޓީ (ޖޭޕީ) އިން ބުނި ނަމަވެސް ކޯލިޝަންގައި ޖޭޕީ ދެމި އޮތީ ކޯލިޝަން ރޫޅިފައި ކަމަށް އެޕާޓީން ގަބޫލުނުކުރާތީ ކަމަށް ސަރުކާރު ހިންގާ މައި ޕާޓީ -- އެމްޑީޕީން ބުނެފި އެވެ.
އެމްޑީޕީއާ އެކު ހެދި ކޯލިޝަން ރޫޅިފައިވާ ކަމަށް ޖޭޕީގެ ޑެޕިއުޓީ ލީޑަރު ޑރ. އަމީން އިބްރާހީމް މިދިޔަ އަންގާރަ ދުވަހު ވިދާޅުވެފައިވެ އެވެ.
އަމީންގެ ވާހަކަތަކަށް ރައްދުދެއްވަމުން އެމްޑީޕީގެ ޗެއާޕާސަން އަދި ރައީސް އޮފީހުގެ މިނިސްޓަރު އިބްރާހީމް ވަހީދު (އިބްރޭ) މިއަދު އަވަސްއަށް ވިދާޅުވީ ކޯލިޝަންގައި ޖޭޕީ އޮތީ ކޯލިޝަން ރޫޅިފައިވާ ކަމަށް ޖޭޕީން ގަބޫލުނުކުރާތީ ކަމަށެވެ.
"ކޯލިޝަން ރޫޅިފައިވާ ކަމަށް ޖޭޕީން ބުނި ނަމަވެސް ސަރުކާރުގެ ސިޔާސީ މަގާމުތަކުގައި މިހާރުވެސް ޖޭޕީގެ ބޭފުޅުން އެބަ ތިއްބެވި. ވަޒީރުންގެ ގޮތުގައިވެސް އެބަތިއްބެވި،" އިބްރޭ ވިދާޅުވި އެވެ.
ވެރިކަން ކުރާ ކޯލިޝަން ރޫޅިފައިވާ ކަމަށް ވިދާޅުވެ ޑރ. އަމީން ދެެއްކެވި ވާހަކަފުޅަކީ ސިޔާސީ ގޮތުން ދެއްކެވި ވާހަކަފުޅެއް ކަމަށްވެސް އިބްރޭ ވިދާޅުވި އެވެ. އަދި ރައީސް އިބްރާހީމް މުހައްމަދު ސޯލިހްގެ މި ދައުރު ނިމެންދެން މިހާރު އޮތް ކޯލިޝަން ދެމި އޮންނާނެ ކަމުގެ ޔަގީންކަން އިބްރޭ ދެއްވި އެވެ.
"ކޯލިޝަނުން ސިޔާސީ މަގާމުތަކުގައި ތިއްބެވި ބޭފުޅުން އެ މަގާމުތަކުގައި ނޮވެމްބަރު 17ގެ ނިޔަލަށް ތިއްބަވާނެ،" އިބްރޭ ވިދާޅުވި އެވެ.
ރިޔާސީ އިންތިހާބާ ގުޅޭ ގޮތުން ޖޭޕީ އާއި އެމްއާރްއެމުން މިދިޔަ އަންގާރަ ދުވަހު ބޭއްވި މަޝްވަރާތަކަށްފަހު ނޫސްވެރިންނާ ވާހަކަ ދައްކަވަމުން ޑރ. އަމީން ވިދާޅުވީ 2019 ވަނަ އަހަރު ބޭއްވި ރައްޔިތުންގެ މަޖިލީހުގެ އިންތިހާބާ ހަމައިން ކޯލިޝަން އެއްބަސްވުން ސަރުކާރުން ރޫޅާލާފައިވާ ކަމަށެވެ.
"ކޯލިޝަން އެއްބަސްވުމެއް އެބައޮތްތޯ؟" ޑރ. އަމީން ސުވާލު އުފެއްދެވި އެވެ.