ޕީޕަލްސް ނޭޝަނަލް ކޮންގްރެސް -- ޕީއެންސީގެ ރިޔާސީ ޓިކެޓަށް ހުޅުވާލި ފުރުސަތު ހަމަވިއިރު ކުރިމަތިލެއްވީ މާލޭގެ މޭޔަރު ޑރ. މުހައްމަދު މުއިއްޒު އާއި މަޑުއްވަރީ ދާއިރާގެ މެންބަރު އާދަމް ޝަރީފު ކަމަށް އެ ޕާޓީން ބުނެފި އެވެ.
ކުރިއަށް އޮތް ރިޔާސީ އިންތިހާބުގައި ވާދަކުރަން ޕީއެންސީން ނިންމީ މިއަދު ބޭއްވި އެ ޕާޓީގެ މަޝްވަރާ ބައްދަލުވުމުގަ އެވެ. ޕީއެންސީގެ ރިޔާސީ ޓިކެޓަށް ހުޅުވާލި ފުރުސަތު ހަމަވީ މިއަދު މެންދުރުފަހު 2:00 އަށެވެ.
ޕީއެންސީގެ ރިޔާސީ ޓިކެޓްގައި ވާދަކުރާނެ ބޭފުޅެއް ކަނޑައެޅުން އޮންނާނީ މިއަދު ހަވީރު 4:00ގައި ބާއްވާ ޕާޓީގެ މަޝްވަރާ މަޖިލީހުގަ އެވެ.
އެ ޕާޓީގެ ރިޔާސީ ޓިކެޓްގައި ވާދަކުރެއްވުމަށް މުއިއްޒު ކުރިމަތިލައްވާފައިވާއިރު މުއިއްޒު މިއަދު ވަނީ ޕީއެންސީއަށް ސޮއިކުރައްވާފަ އެވެ. ޕީއެންސީގެ އަސާސީ ގަވާއިދު ބުނާ ގޮތުން އެ ޕާޓީގެ ރިޔާސީ ޓިކެޓަށް ހުށަހެޅޭނީ އެ ޕާޓީގެ މެންބަރަކަށެވެ.
ރިޔާސީ އިންތިހާބުގައި ވާދަކުރަން ޕީއެންސީން ނިންމީ މިއަދު ބޭއްވި އެ ޕާޓީގެ މަޝްވަރާ މަޖިލީހުގައި ބައިވެރިވެވަޑައިގެންނެވި 47 މެންބަރުންގެ ތެރެއިން 44 މެންބަރުންގެ އަޣުލަބިއްޔަތުންނެވެ.