ކުރިއަށް އޮތް ރިޔާސީ އިންތިހާބަށް އެމްޑީޕީން އެކުލަވާލި ސިޔާސަތުތައް މިރޭ އިއުލާނު ކުރަން ފަށާނެ ކަމަށް އެ ޕާޓީގެ ރިޔާސީ ކެންޑިޑޭޓް ރައީސް އިބްރާހީމް މުހައްމަދު ސޯލިހު ވިދާޅުވެއްޖެ އެވެ.
ރިޔާސީ އިންތިހާބުގެ ކެމްޕޭންގައި ދ. ރިނބުދޫއަށް ވަޑައިގެން ރައީސް ސޯލިހު މިއަދު ވިދާޅުވި ރައްޔިތުންގެ ކަންބޮޑުވުންތަކަށް މިރޭ އިއުލާނުކުރަން ފަށާ ސިޔާސަތުތަކުން ހައްލު ލިބޭނެ ކަމަށެވެ.
"ތިޔަބޭފުޅުން ކަންބޮޑުވެވަޑައިގަންނަވާ ވަރަށް ގިނަ ކަންތައްތަކަށް އޭގެން ހައްލު ހޯދައިދޭނެ،" ރައީސް ސޯލިހު ވިދާޅުވި އެވެ.
ރައީސް ސޯލިހު ވިދާޅުވީ ކުރިއަށް އޮތް ދެ ހަފުތާގައި އެމްޑީޕީގެ އެކި ސިޔާސަތުތައް ހާމަކުރަމުންދާނެ ކަމަށެވެ.
އެމްޑީޕީގެ ސިޔާސަތުތައް މިރޭ އިއުލާނު ކުރަން ފަށާއިރު ރިޔާސީ އިންތިހާބުގައި ވާދަކުރައްވާ ކެންޑިޑޭޓުން ދަނީ އެ ކެންޑިޑޭޓުންގެ އެކި ސިޔާސަތުތައް ހާމަކުރައްވަމުންނެވެ.